ESTER 4 - Tupuri Bible

Mardoke wii Ester ga á mo wãã mopo go

¹ Mardoke laa wããre sen ɓuy, kal ngar õõbe ma ti ɓen go, kal laa õõbe ma de yugudgi ti ɓe, kal bug sããge ti ɓe. Blam ɓe kal rawge ɓi leege ngar jag debaycõõre kloŋ kloŋe.

² Raw wo jag tiŋ ni waŋ ti ngel maga faage bay de hãge ne jobo ma kalge liŋ ni de õõbe ma de yugudgi ti ni wa mono.

³ Ti cõõ sirn wo ɓuy ti ngel maga wããre waŋn go de dayge ni doo maga á go de wããge no mono, lawge ma kluu raw joŋge ti holaŋ jar Jwif wo debaŋ. Á hẽẽ wo bii, ra wo, law wo yoo ɓaara debaŋ, suɗ wo de õõbe ma de yugudgi wo de sããge ti.

⁴ Naare ma ti peele ne Estern wo de jar ma de ndar ɓayn kal wo age fer wããre sen la ne hẽne, hẽẽne kal caage ɓe debaŋ. Á kal coŋ õõbe wo ne Mardoke ma laage ne hẽn ti, maga á mo naa õõbe ma de yugudgi ma ti ɓen go, ama se laa dayge yãã rage gà.

⁵ Doo kay nono, Ester raw ɗe Hatak je ma yoo jar ma de ndar ɓay mani waŋn wo, maga à hay kaŋn ɓiŋ ɓe, á kal wiigi ɓe ga á mo wo wii Mardoke ti fen maga joŋ, day diŋ wer may ga á joŋ doo sen no la?

⁶ Hatak kal rawge see Mardoke ɓi leege, jag jiŋ ni waŋ.

⁷ Mardoke kal bag blam wããre maga joŋn ne hẽn ɓuy, ngaɓ solay maga Haman hay wãã ga se hãn yaŋ ma laage ɓi boole mani waŋ no, ti maga à taw ge jar Jwif wo go mono ne hẽne.

⁸ Á kal hã te wããre ma ti jag waŋ maga á hay go de dusgi ɓe ɓi leege Sus ma taw rage go mono, maga á mo kaŋ nen Ester ni, mo sii ra ne hẽn ɓuy. Á kal wããge ne hẽn ni ga Ester mo wo see waŋ joŋ kamkam ne hẽne maga á mo joŋ jar sen wo de ele.

⁹ Hatak kal age daʼ Ester de wããre Mardoke wo no.

¹⁰ Ester kal wii Hatak ga á mo wo wii Mardoke ga :

¹¹ Weere jõõre waŋ wo, de jar ma ti cõõ sir wo ɓuy wo de koge ga jag liŋgi po yaŋ. Jag liŋgi sen go de wããge ga je ma honla ɓuy twãy noga tware, kal wo feele ni waŋ nen ɓil ga à ɗen we wo ɗege gà no, joŋ tenen caw pa mokay say ni waŋ coŋ graw boo biŋni ɓen ne hẽne. Day ndi mo hãʼ so no, yaŋ wara naw doo swaʼ waŋ ɗe me wo gà.

¹² De maga á wo woge de wããre Estern ne Mardoke mokay no,

¹³ Mardoke kal ferge le ne Ester ga : Ɗag ti ɓo ga ndo gwaʼ ge yaŋ yoo jar Jwif wo boŋ tawa werga ndo liŋ ni waŋ nà enla mo hãʼ ɗag doosen no wa.

¹⁴ Ama de maga ndo hay bà go la baʼ no, kayge ma age yãã jar Jwif wo gon naa ge mbe nen yaŋ le ti ngel po, ma ɓon nday de jar ni pan ɓo nday bas ge go. Day wose bà de koge ga diŋ wer fen maga de joŋge mo hãʼ ga ndo daʼ faage ma kalge wo ti waŋn ni mo taʼ gà ne?

¹⁵ Ester kal ɓoʼ jobo wo see Mardoke ma wiigi ɓe ga :

¹⁶ See, tay ti jar jwif maga wo ɓi leege Sus la ɓuy, hẽẽ we bii ti ɓi, re we wa, jo we wa lay ko de suŋ, ko de cege nen naw swaʼa. Ndi joŋ nen hẽẽ bii de mayre gebeere ɓin wo lay, blam ɓe ndi kal ge yaŋ wo see waŋ, de jag liŋgin mbe doo ɓuy. Tiga á diŋ ma húulí sen so, ni ndi mo huu mbi go so.

¹⁷ Mandoke kal rawge wo joŋ fen maga Ester ngaɓn ne hẽn mo ɓuy no.