ESTER 3 - Tupuri Bible

Leʼge kããra ma ti holaŋ Haman wo de Mardoke

¹ Blam wããre sen wo mokay, waŋ Asuyerus kal kaŋ Haman je ni Hamedata ma ti wer mani Agag ti ngel egre ma kluu. Á kaŋn ti ngel kluu maga go tinoo, hã ngel hayle go ne hẽn ciŋ ti waŋre ma ɓiŋ ɓen wo ɓuy.

² Weere jõõre waŋ maga wo de lagge jag tiŋ ni mokay laa wo kõyõgre leɗ monɗra pel Haman ɓuy, waŋ hay wãã go doosen nono. Ama Mardoke hay bay dayge laa kõyõgre pel ɓe wa has, bay leʼ monɗra pel ɓe wa lay.

³ Weere jõõre waŋ maga wo de lagge jag jiŋ ni waŋ mokay kal wo wii Mardoke ga : Ndo cegaɗ jag waŋ go nà ga le la?

⁴ De maga á wo tum ti naw jag dogge ɓe ne hẽn day se bay laage ɓe wa mokay no, á kal wo fer wããre sen ne Haman ma koge ga Mardoke baa mbe wùu yaŋ joŋge doo maga se go de ɗiggi ɓe no lay bla, doo ga á hay go de wii rage ga se diŋ Jwifi.

⁵ De maga Haman wo koge ga Mardoke bay laa kõyõgre pel se wa, bay leʼ monɗra pel se wa mono, kal tĩĩgi go de waŋ.

⁶ Ama á kal koge ga Mardoke de see ɓe boŋ tawa mokay se duʼn gà ɗa, de el ɓen diŋ ga se caa wer mani ɓe maga wo ɓi sir ni waŋ Asuyerus ni mono go ɓuy, werga á hay sii wer jar maga Mardoke á le ni mono ne hẽne.

⁷ Nen few ma taŋgun ga diŋ few Nisan, nen kiŋgi ma de hwal ti ɓog maga waŋ Asuyerus ti waŋ ɓen mono, á raw ɓoʼ Puri, kaŋ nen ga à raw ndar wãywáale pel Haman nen naw tum, nen few tum hãã go ti few ma de hwal ti ɓog ga diŋ few Adar mono.

Haman grag go ma taw jar jwif wo go

⁸ Ti ngel sen Haman kal wii waŋ Asuyerus ga : Ti cõõ sir ɓon wo ɓuy maga waŋ ɓon de baa jag ni mono, jar po yaŋ wo le go de dusgi la ni, wo sar de jar sir ɓo lan wo no. Á wo de wããre liŋgi ɓaara sar de jar ma ɓuy no, day bay wo seege wer jag liŋgi mani waŋn wa. Jar sen wo mo hãʼ men ge wo waŋ ɗeged gà day daʼge ɓe po bay see ɓaara ni wa hase.

⁹ Hayga sen coo yaŋ jag waŋ no, daga yer wããre po go ti jag waŋ ma taw rage go, day ni ndi ngaɓ solay yaŋ go nen boo solay ton kiskis swaʼ ma hãge ne jar joŋren wo doo ma laage ɓi boole solay mani waŋ no.

¹⁰ Waŋ kal naa boo ma doo ɓen go hãn ne Haman je ni Hamedata, wer mani Agag je hee jar jwif wo no.

¹¹ Waŋ wii Haman ga : Ɗaw mbo solay ɓo no, ama ma jar sen wo mo hãʼ joŋ mbo ra doo ga ɓil ɓo da nono, ndi go de hã rage mo doo.

¹² Á kal ɗe jar yerge mani waŋn wo le nen naw ma de hwal ti swaʼ no, nen few ma taŋgu no. Á kal yer wããre maga Haman wãã ra ne satrapn wo de guferner ma ti cõõ sir mani waŋn wo ma honla ɓuy yoo ɓaara, ne waŋre wer jar ma honla maga wo ti cõõ sir no, faage maga á yer wo jag ɓaara de ɓe, ne jar ma hon wo la de jag ɓaara. Á joŋ nen yer yerge sen wo diŋ ti ɗúu waŋ Asuyerus, blam ɓe boo ma doo ɓen de kaŋge ni.

¹³ Á kal laa jar peele wo de kefder go ti cõõ sir mani waŋ wo ɓuy ma ndreɗ rage go, ma id rage go, ma caa wer jar Jwif wo go ɓuy, ma jõõ, ma de tããbe, weere kleere wo de naare wo ɓuy. Sen diŋ nen naw boŋ, naw ma de hwal ti swaʼ nen few ma de hwal ti ɓogn ga diŋ few Adare, blam ɓe ni fẽẽre ɓaaran ɓuy frum ra go.

¹⁴ Kefder sen wo mokay te ɓe yaŋ ni ma ɓesge wo go day ma wããge wo go ti cõõ sir wo ɓuy, wii jarn wo ni ɓuy ga á mo lag wo go gorge wur sen mbaŋe.

¹⁵ Jar peelen kal wo rawge de ɗee deparday ti jag waŋ. Wããre ma ti jag waŋ la à dusn go ɓi leege Sus meene sirn lay. De sen ni mono waŋ wo de Haman wo de jo yii ɓaara, de maga ɓi leege Sus ɓuy de daɗge mono.