ESTER 2 - Tupuri Bible

Ester kol go ti wãywaŋ no

¹ Blam wããre sen wo mo deŋ ɓuy de maga ɓil waŋ Asuyerus fer go fuggi de ɓil waŋ ɓen mono, á ɗig ti fasti, ti fen maga á joŋ ne, de wããre maga à de wããge ɓe go ti ɓe mono.

² Ti ngel sen jar maga wo ti peele ne waŋ kal wo ga : Daga kiɗ mayre tigliiri ma de woore maga bay wo de woge see jobo wa ɗa le ne waŋ.

³ Daga waŋ mo lag jar ma joŋge diŋ joŋre sen tawa wo go ti ngel maga waŋ ɓen ni mo ɓuy, maga á mo tay wo ti tigliiri maga wo de woore wora. Nduu de ɓaara Sus ti meene sir no, ti tiŋ maga naare wo ni, ne Hege je ma de ndar ɓay maga de gor ti naare mani waŋn wo mono. Á hã ge fẽẽre maga wo de el ma yog see ɓaara yaŋ ne hara.

⁴ Day may maga woo ge we nen waŋ no, joŋ ge diŋ wãywaŋ ti ngel Fasti. Wããre sen mokay la waŋ kal yiŋ jag ti ɓe, day kal joŋ ge doosen nono.

⁵ Bloo po yaŋ ti meene sirn Sus ni, á ɗen ga Mardoke, á diŋ wel ma Yayir, wel ma Semay, wel ma Kis, ti wer mani Benjame no.

⁶ À hay baan le Jerusalem yoo jar maga à hoo ra wer waŋ Jekoniya, waŋ Juda mono. Hay hoo ra le diŋ Nebukadnesar waŋ Babilone.

⁷ Á gẽẽ Hadasa, ga diŋ Ester may pan ɓe, werga pan ɓe bay wa lay, man ɓe bay wa lay. May sen hay gẽẽ diŋ gẽẽre may tiglin tuu, day hay woo nen lay. De húulí pan ɓe wo de man ɓe mono, Mardoke maŋ ne, day gẽẽn go doo may ɓe nono.

⁸ De maga à wo go dus wããre mani waŋ ti jag maga á hay wããn go, day so, á raw tay ngaɓa tigliiri ma ɓi leege Sus ti meene sirn wo go so, ga Hegay de gor ti ɓaara mono, Ester hay de baage yoo kẽẽ ni lay. Á raw wo de ɓe ɓi tiŋ waŋn wer Hegay je ko el naare wo no.

⁹ May sen kal wooge nen ɓe, ɓil ɓe kal joŋge ti ɓe de ele. Deparday tuu, á kal kiɗ fẽẽre kneʼ see wo ne hẽn de rege. Á kal hoo tigliiri renam maga à hoo ra liŋ ni waŋ ni, ɓoʼn yoo ɓaara, ɓi tiŋ ma de el yoo mani naare wo no.

¹⁰ Ester laa dayge kaŋ nen jobo ti wer mani ɓe maga se biŋ ni mo gà. Sen diŋ werga Mardoke hay go de maŋ jag ɓe, ga á mo siin go ne jobo wa.

¹¹ Day tum mono, Mardoke caw dogge. Wo le, fer le, ɓi feele jag tiŋ mani naaren wo no, ma koge ga Ester bà ela, day à bà de joŋge ɓe nà joŋge la.

¹² May ma tigli ma honla ɓuy wo ɓiŋ waŋ Asuyerus, blam maga se joŋ few we go hwal ti ɓog joŋ fẽẽre maga á hay ngaɓ ra ne naaren wo mono. De wur sen mono á joŋ wo few hiiraʼ kneʼ see ɓaara de noo mire, blam ɓe few hiiraʼ pa tag noo trusa ma fõõre no wo see ɓaara ma fãã see ɓaara go.

¹³ Diŋ doo kay no so no ga may ma tiglin wo see waŋ. Fen maga á wiin ɓuy à hãn ne hẽne, ga à nen woge de ɓe doo le ɓi tiŋ maga saara de tay ti ni ma cegaɗge wo go see waŋ ɓi tiŋ waŋn mono.

¹⁴ Á wo see waŋ de law, toŋ ɓe mono se fer le go ɓi tiŋ naare ma de ɓogn wo no, ti ngel maga Sasgas je ma de ndar ɓayn de ko joŋre naare maga sen wo bay kol naare waŋ ɗa ni mono. Á fer wo see waŋ gà so, say ni waŋ joŋ de sãy ɓe ti, day ɗen wo de ɗúu ɓe.

¹⁵ De maga á wo kolge ti Ester may mani Abisayil no, may pan Mardoke maga á gẽẽn go doo may ɓe no mono, Ester wii ɓen diŋ fen maga kaŋ nen ɓe ti ɓe diŋ Hegay, je ma de ndar ɓay mani waŋ ma gor ti naare wo no. Ester hay koge de woore nen jar maga kon wo mo ɓuy no.

¹⁶ À kal woge de Ester ɓiŋ waŋ, ɓi tiŋ waŋ no, nen few ma de hwaln ga diŋ few maga à ɗen ga Tebeb, nen kiŋgi ma de renam maga se ti waŋn ni mono.

¹⁷ Waŋ kal da Ester dedaŋ naare lan wo ɓuy, Ester ko nen ɓe de ele, de woore dedaŋ tigliiri lan wora. Á kaŋ klaŋ waŋn ne hẽn ti, koln wãywaŋ ti ngel Fasti.

¹⁸ Waŋ kal joŋ few ma kluu ne waŋre ɓen wo de weere jõõre ɓen wo, joŋ few Estere. Á kal wããge ga jar sir sen ɓuy mo poɗ wo lombo wa ɗa so, á mo ig wo, day kal ɓes fẽẽre mbe ne jar hãy doo ga waŋ joŋ nono.

¹⁹ De maga á fer tay ti tigliirin wo ma de ɓog mokay no, Mardoke hay de hayle jag tiŋ ni waŋ ni.

²⁰ Ester hay bay de kaŋ nen jobo ti wer jar mani ɓe maga se biŋ ni mo wa ɗa, doo maga Mardoke hay siin go ne hẽn nono. Ester hay joŋge diŋ ti jag Mardoke doo maga se gẽẽ ni ɓe joŋge nono.

Mardoke daʼ jar po wo maŋ ɓaale waŋ

²¹ Ti wurpo Mardoke de hayle jag tiŋ ni waŋ, jar ma bay ɓay wo ɓog yoo jar maga wo de gor jag tiŋ no, ga diŋ Bigtam wo de Terese, kal wo leʼ waŋ blam kal wo kiɗ faage ma maŋ doo ciŋ see waŋ Asuyerus.

²² Wããre sen la kal leʼge ne Mardoke sugi, se kal ferge ɓe ne Estere, Ester kal fer wããre sen la ne waŋ ti ɗúu Mardoke.

²³ À kal kiɗ wer wããre se no, à wo daʼ ge ɓe doo sen no taw taw no, jar ma de ndar ɓay ma ɓogn wo la à ɓal ra go ciŋ jag koo. Wããre sen la à kal yerge ɓe ɓil kefder Kronig pel waŋ ni tuu seŋ.