ESTER 1 - Tupuri Bible

Rege ma kluu mani waŋ Asuyerus no

¹ Wããre sen joŋ mokay diŋ ti wur mani waŋ Asuyerus no. Asuyerus sen diŋ je maga hay wãã wããre sir tiɗ tiɗ kis ti ɓe doo ɓog ti renam. Tĩĩ wer le Eŋde kaʼ hãã nduu go kaŋge Etiyopi.

² Ti wursen waŋ Asuyerus kal age hayge ti paale waŋ ɓen Susi, maga diŋ meene sir ma Susn mono.

³ Nen kiŋgi ma de swaʼ maga se ti waŋ ɓen ni mono, á kal joŋ few ma hã rege ne waŋre ɓen wo de weere jõõre ɓen wo. Jar egre ma Persen wo de ma Meden wo, jar kluurin wo de waŋre sirn wo, kal wo tayge le pel ɓe.

⁴ Á kal naa nen togoɗge horog ɓen wo go de kluu waŋ ɓen nen naw kisi, ti ɓe doo nenmaʼa.

⁵ De wur maga naw sen wo go baa jag mono, waŋ kal joŋ rege ne jar maga wo wursen ti meene sirn Sus ni mo ɓuy no, je kluu, weklee. Regen joŋ naw renam. Á joŋn ɓil pay sugnee ɓe ma ɓiŋ tiŋ waŋ no.

⁶ Fẽẽre ma de lag lar de piiri wo, ma waysaɓ-waysaɓe, ma de tebere suɓɓa, hay wo go de saɗge de saale mbaaraw ma depuy ceɗceɗ, ma de sẽẽ burburi, de saɗge jag boore maaway ma de gaɗge deger deger wo, de saɗge see mbal ma de gùr see de piiri wo ɓuy deŋ. Fẽẽre suulin wo diŋ de boo biŋni wo, de boo maaway wo. Á hay wo de laage ti ngel ma de daʼge go de gurgi de sẽẽ, depuy, de laa lare, de gurgi see ma de tàabay.

⁷ Hããre maga à hã fẽẽre ma joge wo ɓil ɓaara mokay no, wo de joŋge diŋ de boo biŋni wo wer sar sare, yii waŋ hay mbe ɗros ɗros deŋ koɗe, sen diŋ see doo waŋ mbe koɗ so.

⁸ Wosela ɓuy jo diŋ doo ga ɓil ɓe da nono. Waŋ hay siin go taŋgu ne jar kluuri ma liŋ ni ɓen wo nà diŋ doo sen nono, ga joŋ doole jobo de ɓe wa, ama á mo hay diŋ ti dage wosela.

⁹ Fasti wãywaŋ lay, joŋ rege ne naare wo ɓi feele tiŋ waŋ mani waŋ Asuyerusn ni lay.

À naa wãywaŋ Fasti go

¹⁰ Wur naw ma de renamn mono, yii kal fruy jiili waŋ, á raw wii Mehuman, Bista, Harbona, Bigta, Abagta, Setar wo de Karkas, jar ma renam ma de ndar ɓay maga wo ti peele pel waŋ Asuyerus, ga á mo ɗe wo wãywaŋ Fasti le.

¹¹ Ga á mo á le pel waŋ de klaŋ waŋ ɓen ti, ma kaŋ nen jar ɓuy, de waŋren wo ti woore ɓe no, werga á de woore debaŋ.

¹² Ama Fasti laa dayge age ti wããre maga waŋ wããn wo ne jar ma de ndar ɓayn wo jag mo gà. Waŋ raw taage go de waŋ hãã ɓil ɓe taa wùu go gum.

¹³ Waŋ kal wii jar ma de ko reen wo, jar ko ngel ma pel wo no. Werga à hay ɓod faare wããre mani waŋn wo nà diŋ doo sen nono, pel jar maga wo de ko wer jag liŋgi wo de wããre ma de deele wo mono.

¹⁴ Jar maga wo ti jeŋ ɓe ni diŋ : Karsema, Setar, Admata, Tarsis, Meres, Marsena, Memukan, waŋre Perse wo de mede wo renam maga hay wo ko nen waŋ. Á wo diŋ jar ma pel taw ti waŋ tuu diŋ saara.

¹⁵ Waŋ day so ga, à joŋ ge joŋre diŋ de jag liŋgi ma hon ti wãywaŋ Fasti mo ne, ti maga waŋ Asuyerus laa jar ma bay ɓayn wo wiigi ɓe day se laa dayge nduugi gà mono?

¹⁶ Menukan kal maŋ wããre pel waŋ, pel waŋren wo gana : wãywaŋ Fasti joŋ doo kay no mo hãʼ bay diŋ see waŋ tawa wa. Fen maga á joŋn mokay á joŋn diŋ see waŋren wo, de jar sir mani waŋ Asuyerus maga wo go ti cõõ sirn mo ɓuy no.

¹⁷ Werga wããre mani wãywaŋn mokay raw ge yaŋ, day naare laan ge wo yaŋ go ɓuy, day se kaŋ ge wer ɓaara yaŋ ɓuy mbuɗ foo werpiiri ɓaara wo. Naare yaʼ ge wo la ga, waŋ Asuyerus hay wii wãy ɓe Fasti la ga á mo á le pel se, day se day gà ɓaa yaw so lay no.

¹⁸ Wursen mokay waŋre ma Persen wo de ma Meden wo, maga laa ge wo fen maga wãywaŋ joŋn mono, yaʼ ge wo wããge ɓe ne waŋre mani waŋn wo ɓuy. Ti ngel sen mokay mbuɗgi foo wo de cege jag jiili joŋ ge wo yaŋ ge.

¹⁹ Hayga waŋ daʼ sen mokay yaŋ de el no, daga dus wããre go ti jag waŋ. Wããre sen mokay yern yoo jag liŋgi ma Persen wo de ma Mede no, dig jar go ga, jobo mo cegaɗn go wa. Wããre ma ti jag waŋn joŋ ge mokay diŋ ga, Fasti a ge wurpo pel waŋ Asuyerus gà so hase, day waŋ hã ge ɗúu wãywaŋn go diŋ ne wãy ma tigriŋ maga de kããge de el dedaŋge ɓe mono.

²⁰ Wããre ma ti jag waŋn mokay la à koŋn ge yaŋ wo go ti ngel maga waŋ ɓen wo go de mbeɗ jag ni mo ɓuy, koh de kluu ɓen ɓuy. Day naare wo ɓuy hoo ge wo sug yaŋ ti werpiiri ɓaara wo, tĩĩ wer ti ma klee hãã leʼ go ti ma kluu.

²¹ Ɗiggi sen kal coge jag waŋ de waŋren wo, waŋ kal joŋge ɓe doo maga Menukan wãã nono.

²² Á Kal ɓod kefder wo go ti cõõ sir maga waŋ ɓen ni mo ɓuy, ti cõõ sir ma honla ɓuy diŋ de faage maga saara yer jag ɓaara doosen no mono, de jag maga à wããn ni ɓaara doosen no mono.