ESDRAS 3 - Tupuri Bible

À fer tĩĩ wer siɗgi jagn wo

¹ Few ma de renam wo kolge mokay jar Israyel hay wo go ɓi leege ɓaaran wo. Jarn raw wo tayge go ɓuy Jerusalem doo jobo boŋ nono.

² Josuwe je ni Yotsadagn wo de hẽẽre ɓe jar siɗ jag wo, Sorobabel je ni Sealtiyeln wo de hẽẽre ɓen kal wo hooge, boo wo ngel siɗ jag mani Baa ma Israyel no, ma joŋ siɗgi jag maga à roɗ mo ɓen go ɓuy wo ti ɓe doo maga á de yerge ɓil jag liŋgi mani Moyis je mani Baan nono.

³ Saara fer boo ngel siɗ jagn ti ngel ɓe werga á hay wo go de caa hẽẽne doo jar ma ɓil sirn wo ni. Saara raw joŋ siɗgi jag maga à roɗ mo ɓen go ɓuy wo ne Manwuri, joŋ wo siɗgi jag maga à roɗ mo ɓen go ɓuy ma de jag toŋn wo de ma de lawn wo.

⁴ Saara raw joŋ few mburyugn wo doo maga á de yerge nono, day saara joŋ siɗgi jag maga à roɗ mo ɓen go ɓuyn wo tum ti naw doo maga á de ngaɓge ga à nen joŋge ɓe ɓaale no kay nen naw kaʼ no mono.

⁵ Blam ɓe saara raw joŋ siigi jag maga à roɗ mo ɓen go ɓuyn ma tum tum no, joŋ wo ma ti kolge fewn wo de ma ti wur fruygi maga wo go sagsag ma Manwur mono, joŋ wo ma wosela ɓuy maga á hã hãge de dage wo ne Manwur mono.

⁶ Ti naw ma taŋgu nen few ma de renamn mono, saara tĩĩ wer joŋ siɗgi jag maga à roɗ mo ɓen go ɓuyn ne Manwuri. Ane tiŋ mani Manwurn hay bay de ɓoʼ wer wa ɗa.

⁷ À raw hã solay ne jar ceɗ húulìn wo de jar ceɗ kooren wo, hã rege, fẽẽre joge wo de noo wo ne jar Sidoŋ wo de jar Tir wo nen maga á mo hoo wo koore seder ma Libaŋ wo le ti daage, mo á wo go de ɓe Jafa doo maga Sirus waŋ Perse hay wããn le nono.

⁸ Nen few ma de ɓogn ti kiŋgi ma de ɓogn blam age ɓaara go Jerusalem ti tiŋ mani Baan mono, Sorobabel je ni Sealtiyeln lay, Josuwe je ni Yotsadagn wo de te hẽẽre ɓaara jar siɗ jagn wo de jar Lefidn wo de jar maga hay wo le ti daŋgay ga fer wo le Jerusalem mo ɓuy kal wo tĩĩ joŋren wo. Saara raw wo wii jar Lefid maga kiŋgi ɓaara tĩĩ ti doo ɓog raw ciŋ ga á mo see wo de joŋre booge tiŋ mani Manwur no.

⁹ Day Josuwe wo de jar ni ɓe wo de hẽẽre ɓen wo, Kadmiyel wo de jar ni ɓe maga wo diŋ jar Juda mono, jar ni Henadad wo de weere ɓaara wo de hẽẽre ɓaara jar Lefidn raw wo yãã joŋre seege de jar maga hay wo joŋ joŋre tiŋ mani Baan ti ɓaara.

¹⁰ De maga jar boogen wo de ɓoʼ wer tiŋ mani Manwurn mono, à raw lag jar siɗ jag wo go de tee õõbe po boŋ ti taʼ de cõõ wo doo, lag jar Lefid jar ni Asaf wo go de soŋre wo doo lag nen maga á mo togoɗ wo Manwur doo maga Dafid, waŋ Israyel hay kaŋ nen jar ni nono.

¹¹ Á hay wo ferge ne kããra nen siŋ ma togoɗ Manwur ma maŋ ti ɓe ciŋ ga : Á de ele, werga koge decoo maga á ko decoo Israyel mbe wo tum tum. Jarn ngar wo jag debaŋ ma togoɗ Manwuri, werga à hay ɓoʼ wer tiŋ mani Manwur no.

¹² Jar debaŋ yoo jar siɗ jagn wo de jar Lefidn wo de waŋre ma ti feele maga hay wo de tããrebe ga hay ko tiŋ ma taŋgun ra wo debaŋ de maga à de ɓoʼ wer tiŋ sen mono. Jar ma tigriŋ wo debaŋ ʼwad wo war de fruygi lay.

¹³ Sen kol nen maga jarn bay wo go caa ɓil war fruygin wo de ron wo wa werga jarn hay wo ngar jag debaŋ day jar ma hãã hãã hay wo laa ngarge jag seno.