ESAYI 2 - Tupuri Bible

Wer jar ɓuy lwaʼ ge wo yaŋ wo Jerusalem

¹ Wããre maga à naa nen ɓaara ne Esay je ni Amots nen mbuɗgi nen ti Juda wo de Jerusalem mono.

² Wo ge dayge ti wur ma blam tawn mono, Húulì maga tiŋ mani Manwur ti ɓe Joŋ ge yaŋ go de kaŋge ciŋ tipẽẽge ti húulì wo. Á naa ge ti yaŋ go ciŋ de daŋ ngel ma de gẽẽren wo ɓuy, Day wer jar lwaʼ ge wo yaŋ wo ti ɓe.

³ Wer jar wo debaŋ wo ge wo yaŋ ni, Day wãɗ ge wo yaŋ ga : Á we le, naa ɗii we ti húulì mani Manwur no, Wo ɓil tiŋ mani Baa ma Israyel no, Nen maga á mo kaŋ nen naa ti faage ɓen wo, Day ni naa mo see ti blam faage ɓen wo. Werga jag liŋgin kal ge le go nà Siyoŋ, Wããre Manwurn a ge le nà Jerusalem.

⁴ Manwur joŋ ge diŋ je cag re ma ti holaŋ wer jar wora, Á joŋ ge diŋ je blaw jar wo ngaɓa. Jar tor ge wo saŋ soŋre ɓaaran wo ge go de moslamre ɓaaran wo, Tor ge wo saŋ wo go de jawre ma doo ɓaaran wo. Wer jar po hoo ge wo moslamre ciŋ see jar tigriŋ wo gà so hase, Day à had ge jar de durgi gà so lay.

⁵ Nday jar ma liŋ ni Jakob no, A we le naa see we nen poɗag mani Manwur no!

Wur kiida mani Manwur no

⁶ Werga ndo hay tob jar mani ɓo, jar ni Jakob wo go, Werga á bag wo sir ɓaara go de joŋre mani jar ma nen wur botoŋn wo, Joŋ wo sogway doo jar Filisti wo nono, Wer maga á wo de tay jag de weere waaren wo mono.

⁷ Sir ɓaaran go de bagge de solay wo de boo biŋni, Horog ɓaaran bay wo ma keege wa. Sir ɓaaran go de bagge de piiri wo, pus durgi ɓaaran bay wo ma keege wa.

⁸ Sir ɓaaran go de bagge de baa maga bay wo diŋ Baa cwãy wa wo. Jar Israyel leɗ wo monɗra nà pel fen maga saara joŋ sen wo de doo ɓaara mono, Pel fẽẽre maga weere doo ɓaara kneʼn wo mono.

⁹ Je tabayn fer see ɓe go gesiŋ, á kaŋ sõõre go ne see ɓe ti, Diŋ wer sen fug ɓil go ne hara ti wa!

¹⁰ Kal yoo húulì wo day ni ndo yoŋ nen sir go hãã, Doo hẽẽne Manwuri, doo sagge kluu ɓe no.

¹¹ Nen je táabay maga far ti see ɓe ciŋn fer ge yaŋ go gesiŋ, Mbarge jag jiili mani jar tabayn ham ge jag yaŋ go : Manwur boŋ tuu joŋ ge yaŋ go ciŋ ti jar ti wur seno.

¹² Werga, Manwur Pantway go de ngaɓ wur see fen po ɓuy Maga keɗ see ɓe day mbar jag jiili ɓe mono, See fen maga far ti see ɓe ciŋ mono, day á fern yaŋ go gesiŋ.

¹³ Á go de ngaɓ wur see koore seder ma Libaŋ Ma de gẽẽre ciŋ hãã hããn wo ɓuy, See koore cen ma Basan wo ɓuy,

¹⁴ See húulì ma de gẽẽren wo ɓuy, See ngel ma de farge ciŋn wo ɓuy,

¹⁵ See tiŋ ma de gẽẽre ma gor ngeln wo ɓuy, See kor ma kiŋkiŋn wo ɓuy,

¹⁶ See daage ma Tarsisn wo ɓuy, See fẽẽre maga ɗiggi de kaŋge ti ɓaara mo ɓuy no.

¹⁷ Farge ti ciŋ mani je tabayn fer ge yaŋ go gesiŋ, Daŋ mbarge jag jiili mani jar tabayn ham ge jag yaŋ go lay Manwur boŋ tuu joŋ ge yaŋ go ciŋ ti jar ti wur seno.

¹⁸ Baa maga bay wo diŋ Baa cwãy wa yee ge wo nen yaŋ go.

¹⁹ À lag ge yaŋ go ɓi rum húulì, Go ɓi tuu nen sir doo hẽẽne Manwuri, Doo sagge kluu ɓe no. Sen nà de maga á ur gi le ma caa hẽẽne tamsir mono.

²⁰ Ti wur sen mono, je táabay lag ge baa ɓe maga bay wo diŋ Baa cwãy wa, Ga wo de joŋge de boo solay wo de boo biŋni wo yaŋ go. A lag ge baa ɓe maga se hay joŋ ra ma leɗ monɗra pel ɓaara Wo yaŋ go ne klumri wo de gulẽẽ-gulẽẽ wo.

²¹ À lag ge yaŋ ti rum húulì wo de hlug húulì wo, Go hãã doo hẽẽne Manwuri, Doo sagge kluu ɓen de maga á ur gi le ciŋ ma caa hẽẽne tamsir mono.

²² Men we kaŋ ɗiggi go ti je táabay Maga egre ma hũy ɓe hoo go jag taʼ boŋ mono, Werga de el ɓe bay wa.