DANYEL 2 - Tupuri Bible

Waŋ Babilon lwaʼa, Danyel naa wer ɓe go

¹ Nen kiŋgi ma de ɓog maga Nebukadnesar de ma joŋ waŋ mono, Nebukadnesar raw lwaʼge. See ɓe raw daŋge ɓe go day nen ɓe la baa nà gà.

² Waŋ raw ɗe jar halge wo le de jar ndar wer fẽẽre ma nen ngel ma ciŋn wo de jar gur-koon wo de jar Kalden wo le nen maga á mo naa wo wer lwaʼge waŋn go ne hẽne. Saara raw age lagge pel waŋ.

³ Waŋ day riŋ ra ga : Ndi hay lwaʼa, day see ɓi daŋ me go wer maga ndi hay daga ndi mo daʼ wer go ne lwaʼge seno.

⁴ Jar Kalden kal wo ferge ne waŋ de jag Arameyẽẽ ga : Daga waŋ mo hay ciŋ caw tum! Sii mbo lwaʼgen ne weere jõõre ɓon wo day ni wùr naa wer ɓe yaŋ ne ndo.

⁵ Waŋ fer wãã wããre day riŋ jar Kalden wo ga : Mokay diŋ fen maga ndi bag jag ɓe le go ɓil ɓi mono : Hayga nday sii lwaʼgen we go ne ndi de naage wer ɓen gà no, à taw nday go, day tiŋ ɓayn kol ge wo go diŋ tabul ma de cor ɗugul ne kẽẽ ti.

⁶ Day hayga nday sii lwaʼgen we go ne ndi de naage wer ɓen no, ndi hã ge fẽẽre yaŋ wo ne nday debaŋ, ndi hã ge mandekoɗ wo yaŋ ne nday, ndi hã ge kluuri yaŋ ne nday. Diŋ wersen so, sii we lwaʼgen go ne ndi de naage wer ɓe no.

⁷ Saara raw fer wããre ne waŋ ma de ɓog pa ga : Daga waŋ mo sii mbe lwaʼgen ne weere jõõre ɓen wo, ni wùr naa wer ɓe yaŋ go.

⁸ Waŋ fer wãã wããre tigriŋ day ga : Ndi de koge kidolgi ga nday kiɗ nà diŋ ngel ma yorge go wer maga nday go de ko fen maga ndi bag jag ɓe le go ɓil ɓi mono.

⁹ Hayga nday kaŋ nen ɓi we ti lwaʼgen gà no, re sen caa ge nday ɓuy. Nday go de gragge ma wãɗ wããre geteʼ wo de ma jãɗ ndi ne ndi, ma gorge ga ɗiggi ɓi fer yaŋ cooge. Diŋ wersen sii we lwaʼgen ne ndi, ni ndi ko yaŋ so ga nday yaŋ mbay de kãã ge ma naa wer ɓe go ne ndi.

¹⁰ Jar Kalden kal wo ferge ne waŋ ga : Jobo ti tamsir la bay de kããge ma sii fen maga waŋ wiin mo wa. Diŋ wersen ga waŋ po kluu de egre kaŋ põõre te mo ma kay ti boŋ ne je ko wer fẽẽre po, ne je ndar wer fẽẽre ma nen ngel ma ciŋ po noga ne je Kalde po ti gà mono.

¹¹ Fen maga waŋ wiin diŋ fen ma de gaali, jobo boŋ draʼ kãã ma wããge ɓe ne waŋ gà ni se diŋ baa maga ngel lagge ɓaara bay yoo jar téebeere wo la wa mono.

¹² De sen mokay ɓil waŋ raw cege ɓe, ɓil ɓe raw sõõge debaŋ. Se raw hã jag ga id jar ko re ma Babilon wo go ɓuy.

¹³ À dus wããre sen go, à hay go maŋ ma id jar ma de ko reen wo go, day à hay kiɗ Danyel wo de kããre ɓen wo, ma id rage go lay.

Baa naa nen lwaʼgen go ne Danyele

¹⁴ Mo so no Danyel kal fer wããre de ɗeŋ lay de gẽẽge ma de el lay ne Ariyog waŋ jar gor ti waŋn wo, diŋ je maga hay kal go ma id jar ma de ko re ma Babilon wo go mono.

¹⁵ Se kal wãã wããre day riŋ Ariyog je kluu jar gor ti waŋn wo ga : Wer mayse ga re se ma jag waŋn de hãã doosen no la? Ariyog raw bag blam re sen ne Danyele.

¹⁶ Day Danyel raw woge se waŋ day kamn nen maga á mo hã naw ne se nen maga se naa wer lwaʼgen go ne waŋ.

¹⁷ Blam sen Danyel kal rawge liŋ ni ɓe, raw bag blam re sen ne Hananiya, Mikayel wo de Asariya, kããre ɓen wo;

¹⁸ nen maga á mo joŋ wo kam kam ne Baa ma ciŋn ti fen ma de yoŋre seno, nen maga à mo id Danyel wo de kããre ɓen wo de te jar ko re ma Babilon wo go wa.

¹⁹ Mo so no à raw naa nen fen ma de yoŋren go ne Danyel nen lwaʼge de suŋ. Danyel raw togoɗ Baa ma ciŋ no.

²⁰ Danyel kal wãã wããre day ga : Ɗúu Baa mo hay de bosaʼ ti ma tum!

²¹ Koge reen wo de egre wo diŋ ma ɓe. Cor wurn wo de naw wo nà diŋ se, Srog waŋre wo go gesiŋ nà diŋ se, Day lag waŋre wo ti paale nà diŋ se lay. A hã koge re ne jar ma de ko re wo, A hã koge ne jar ma de tin wo.

²² Ndar wer fen ma kuɗum ma de yoŋre go nà diŋ se. Go de daʼ wer ne mo ma nen suŋgu nà diŋ se, Day poɗagn le nà see ɓe.

²³ Baa mani pããre ɓin wo, Ndi maŋ ti ɓo ciŋ, ndi joŋ suseʼ mo, Wer koge re wo de egre maga ndo hã me mono. Werga, ndo kaŋ nen ɓi go ti fen maga Wùr hay wiin doo ɓo mono, Day ndo naa nen re mani waŋn go ne wùri!

²⁴ Blam ɓe Danyel raw woge see Ariyog maga waŋ hay hã jag ne hẽn ga á mo id jar ko re ma Babilon wo go mono. Á kal woge day wiin doo kay nono ga : Taw jar ko re ma Babilon wo go wa. Wo de ɓi pel waŋ day ni ndi naa wer lwaʼgen yaŋ go ne waŋ.

²⁵ Ariyog raw woge de Danyel deparday pel waŋ day riŋn doo kay nono ga : Ndi yaŋ de daʼ jobo yoo jar maga à hoo ra le ti sir Juda wo la ma naa wer lwaʼgen go ne waŋ.

Danyel naa wer lwaʼgen go ne waŋ

²⁶ Waŋ kal wãã wããre day wii Danyel maga à hay ɗege ɓe ga Belsatsar ga : Ndo yaŋ de kããge ma kaŋ nen ɓi ti lwaʼge maga ndi lwaʼn de naage wer ɓen yawla?

²⁷ Danyel raw fer wããre pel waŋ ni day ga : Fen ma de yoŋre maga waŋ wiin mono, je kaŋ nen waŋ ti ɓe bay diŋ jar ko reen wo, jar ndar wer fẽẽre ma nen ngel ma ciŋn wo, jar ko wer fẽẽren wo de jar kaŋ halgen wo wa,

²⁸ ama Baa yaŋ le ciŋ boŋ, á ndar nen fẽẽre ma de yoŋre wo go day se hay naa nen fen maga joŋ ge yaŋ wo ti wur ma peln wo go ne waŋ Nebukadnesare. Lwaʼge ɓon wo de fẽẽre maga hay mbuɗ wo nen ɓo ti fen suuli ɓo wo doo kay nono :

²⁹ Ti fen suuli ɓo, waŋ, ndo hay ɗiggi ti fẽẽre maga joŋ ge wo wo wurpo ti naw ma pel wo mono day je maga ndar nen fẽẽre ma de yoŋre wo go raw kaŋ nen ɓo go ti fen maga joŋ ge wo wurpo mono.

³⁰ Hayba ga à naa wer fen ma de yoŋre sen go ne ndi so layblaʼ no, sen nà bay diŋ ga koge re ɓi de daŋ ma jar maga wo tenen mo tiʼ ɓuy wa. Ama á naa nen ɓe go maga à mo naa wer lwaʼgen go ne waŋ day ndo mo daʼ wer go ne ɗiggi maga wo le ɓil ɓo mono.

³¹ Waŋ, mopo mbuɗ nen ɓo, diŋ fodo mopo kluu taʼa. Fodo sen hay kluu debaŋ lay, hay sagge sara lay. Á hay de oole pel ɓo deŋ deele day nen ɓe hay joŋ hẽẽne lay.

³² Ti fodo sen hay diŋ boo biŋni ma bay sir nene, jag jiili ɓe wo de doo ɓe hay wo diŋ boo solay, ɓil ɓe wo de kũũni ɓe hay wo diŋ boo dobe,

³³ Koyor ɓe wo diŋ boo, faale ɓaale ɓe wo plaŋ diŋ boo, plaŋ diŋ pãy.

³⁴ Ndo hay de kaŋ nen ɓo taʼ koge, kola húulì po yãã mbe le de see ɓe tuu bay ga jobo ɓoʼn le wa lay, raw leʼge ne faale ɓaale fodo maga wo plaŋ boo, plaŋ pãy ti day raw naŋ nen ɓaara go.

³⁵ Mo so no, boo no, pãy no, boo dob no, boo solayn wo de boo biŋnin dwas wo go kol wo go doo hoole maga pud ti yaage ti hisi nono. Leege raw rawge de ɓaara day à daʼ fuɗgi ɓaara gà so hase. Ama húulì maga hay leʼ ne fodon ti kal kolge diŋ húulì ma kluu kaʼa, yãã tamsir go ɓuy.

³⁶ Mokay diŋ lwaʼge no day wùr naa wer ɓe yaŋ go pel waŋ la.

³⁷ Waŋ, ndo diŋ waŋ ma waŋren wo werga Baa ma ciŋn hã tway ne ndo, hã kluu, egre wo de togoɗge ne ndo.

³⁸ A hã weere jar téebeere wo, nàyre ma ti sir wo de dweere ma ciŋ wo go ne ndo ɓi coo doo ɓuy ti ngel ma honla ɓuy, day hay ndo go ti ɓaara wãã re ɓaara ɓuy, ti maga diŋ boo biŋni nà diŋ ndo.

³⁹ Blam ɓo mono, waŋ po kol ge yaŋ day sir ɓen joŋ ge klee de daŋ ɓo no. Ma de swaʼ kol ge yaŋ sen joŋ ge doo boo dob nono day wãã ge re tamsir yaŋ go ɓuy.

⁴⁰ Ma de naa kol ge yaŋ graŋ doo boo nono. Doo maga boo naŋ nen fẽẽre go day mbug ra go ɓuy no mono, se naŋ ge nen fẽẽre yaŋ go, mbug gi fẽẽre yaŋ go ɓuy doo ga boo mbug fẽẽre wo go ɓuy nono.

⁴¹ Day doo maga ndo hay ko faale ɓaalen wo de weere ɓaalen wo plaŋ diŋ pãy booge, plaŋ diŋ boo mono, sir waŋ sen joŋ ge yaŋ de caa ɓili. Á ne fen po joŋ ge yaŋ ɓil ɓe ni de egre doo boo nono, sen diŋ boo maga ndo hay kon de neege see pãyn mono.

⁴² Day wer maga weere ɓaalen hay wo plaŋ diŋ boo, plaŋ diŋ pãy mono, sir waŋ sen joŋ ge plaŋ de egre, plaŋ de gayre.

⁴³ Ndo hay ko boo de neege see pãy nà wer maga á tay ge wo jag yaŋ ti dage naare ti holaŋ ɓaara, ane á tay ge wo see kããra gà doo ga boo tay nen go de pãy gà no lay no.

⁴⁴ Ti kal mani waŋre sen ge wo mono, Baa ma ciŋn a ge yaŋ de sir waŋ po maga à ɓlagn ge go gà has yaŋ, day sir waŋ sen kol ge go doo wer jar ma tigriŋ wo gà. Waŋ ɓen naŋ ge nen sir waŋre ma se deŋn wo go ɓuy, yee ge nen ɓaara go day se de see ɓe joŋ ge yaŋ ma tum.

⁴⁵ Sen nà diŋ húulì maga ndo hay kon ga yãã mbe le de see ɓe ti húulì tuu bay ga jobo ɓoʼn le wa lay mono, diŋ húulì se ga hay naŋ nen boo no, boo dob no, pãy wo de boo solayn wo de boo biŋnin wo go mono. Baa ma kluun kaŋ nen waŋ go ti fen maga a ge le blam waŋ mono. Lwaʼgen cwãy day naage wer ɓe diŋ fen maga à nen kaŋ ɗiggi ti ɓe.

⁴⁶ Mo so no waŋ Nebukadnesar raw leʼ monɗra gesiŋ pel Danyele, day se raw hã jag ga à mo joŋ siigi jag wo ne hẽne, à mo roɗ fen fõõre wo ne hẽn lay.

⁴⁷ Waŋ kal wãã wããre ne Danyel day riŋn ga : Kidolgi Baa ɓayn diŋ Baa ma baan wo, á diŋ Waŋkluu waŋren wo. Á yaŋ mbe ndar nen fẽẽre ma de yoŋre wo go, werga ndo daʼ wer go ne fen ma de yoŋre sen mono.

⁴⁸ Blam ɓe waŋ raw hã kluu ne Danyele, hã horog mani jar egren wo ne hẽn debaŋ. Se kal hayge ɓe wãã re prog ma Babilon no, hayn diŋ waŋ ma ti taw ma wãã re jar ko re ma Babilon wo ɓuy.

⁴⁹ Danyel raw kem waŋ ga á mo hã re prog ma Babilonn ne Sadrag, Mesag wo de Abed-Nego doo. Danyel hay ɓen ɓi feele mani waŋ no.