AMOS 2 - Tupuri Bible

Ne jar Mohab wo

¹ Manwur wãã doo kay nono : Ga diŋ wer ɓlagge maga Mohab joŋ ra swaʼa, Koh bà naa ɗa yaw, ndi fer ge le ti wããre maga ndi wããn go mo gà Diŋ wer maga á roɗ hm waŋ Edom go, Taa sããge ɓe go mono.

² Ndi ɓoʼ ge wùu yaŋ le ne Mohab ti, Se roɗ ge tiŋ waŋre ma Keriyodn wo yaŋ go, Day Mohab taw ge yaŋ go ti holaŋ ngarge jag ma kluu debaŋ, Ti holaŋ ngarge jag jaw wo de ʼwadge cõõ.

³ Ndi naa ge je car kiidan yaŋ go ni ɓe Day ndi id gi waŋre ɓen wo yaŋ go wer ɓe ni, Wããn diŋ Manwuri.

Ne jar Juda wo

⁴ Manwur wãã doo kay nono : Ga diŋ wer ɓlagge maga Juda joŋ ra swaʼa, Koh bà naa ɗa yaw, ndi fer ge le ti wããre maga ndi wããn go mo gà. Diŋ wer maga á tob wo jag liŋgi mani Manwurn go, Day ɗaw wo jag liŋgi faage seelen wo gà Diŋ wer maga á men wo see ɓaara go welge diŋ de geteʼ sen wo, Geteʼ maga pããre ɓaara hay tay wo go wer ɓe mono.

⁵ Ndi ɓoʼ ge wùu yaŋ le go ne Juda ti, Day á roɗ ge tiŋ waŋre ma Jerusalemn wo yaŋ go.

Ne jar Israyel wo

⁶ Wãã doo kay nono diŋ Manwuri : Ga diŋ wer ɓlagge maga Israyel joŋ ra swaʼa, Koh bà naa ɗa yaw, ndi fer ge le ti wããre maga ndi saʼn go mo gà. Diŋ wer maga á yee wo je ma keɗedn go wer solay, Yee wo je ma de coon go de taarag jag boŋ maga Hay poɗ go doo ɓe gà mono.

⁷ Á seɗ wo go ne jar ma de coon wo ti, Jag kiida mokay no, à srog wããre mani je coon wo go, Wel wo de pããben joŋ wo diŋ nday may po boŋ, Nen maga saara mo dem ɗúu ɓi ma bay ɗagn go.

⁸ Ti ngel siɗ jag ma honla ɓuy á suɗ wo go, Ti õõbe maga jar coo kaŋn wo ne hara kaŋge mono, Á jo wo yii maga saara car waŋ ti ɓaara Ɓi tiŋ baa ɓaaran wo no.

⁹ Day koɗa, ndi hay ɓlag jar Ammorid wo go ne hara pele, Maga gẽẽre ɓaara ciŋ hay go degaʼ de koo seder wo, Day egre ɓaara hay doo koore Cen wo no lay mono. Ndi hay ɓlag leʼge ɓaara ma ciŋn wo go, Ɓlag kããge ɓaara ma gesiŋn wo go lay.

¹⁰ Day koɗa hay hoo nday le go ɓi sir Ejipte diŋ ndi, Day ndi see le de ɓay ti puuli kiŋgi doo naa, ma lag Nday ɓi sir ni jar Ammorid wo.

¹¹ Ndi joŋ ga jar ndar nen wããre ma jag Baa mo hay wo yoo ɓay, Day jar ma joŋ nasiriyad mo hay wo yoo weere jõõre ɓayn wo. Bay doo kay no wa yawla jar ni Israyel wora? Kay diŋ jag Manwuri...

¹² Nday joŋ nen hã yii go ne jar maga wo de joŋ nasiriyad mono! Day ne jar ndar nen wããre ma jag Baan wo mo lay no, Nday wãã wããre ma kay go ne hara ga : Ndar we nen wããre go wa!

¹³ Ko we ɗa : Ndi ndreɗ nday go ti ngel ni, Doo maga pus durgi go de hoo coore ɓil par kal ndreɗ mopo go nono.

¹⁴ Jar ɗee debaŋ daʼge wo ngel daŋge gà Je maga de egre ɓil ɗa mono, daʼge ngel ma naa nen egre ɓen ge go gà lay, Day je durgin kããge ma yãã tenen ɓen go gà.

¹⁵ Je maga de ko jwaʼ waa mono, kãã ge ma ẽgge gà Je maga ɓaale ɓe ne hẽn wer gefeŋ mono daŋ ge go gà lay. Day je ma ti pirn yãã ge tenen ɓen go gà.

¹⁶ Soode maga diŋ je twar ma yoo kẽẽn mono, Daŋ ge glog koɗ wur seno Kay diŋ jag Manwuri.