فیلیپیلِر 1 - مُقادِّس کیتاب1 عیسی مسیحینگ خیدماتچیسی بُلان مِن پولسدِن و تیموتاوس‌دان عیسی مسیحینگ اوستو بیلِن مُقادِّسلِره باغلی بُلان فیلیپیلِرینگ بارینا، و هِم کِلیسا باشلیقلارینا و خیدماتچیلارینا دُغایی سالام! 2 آتامیز خودایینگ و تانگریمیز عیسی مسیحینگ مِرحِمِتی و پاراحاتلیغی، قُی، سیزه بُلسون! شوکور و دُغا 3 مِن هِر گِزِک سیز بارادا یاد اِدِنیمده، خوداییما شوکور اِدیَرین. 4 سیزینگ هِمَّه‌نگیز اوچین شاتلانیپ، هِمیشه خودایا دُغا اِدیَرین. 5 چونکی سیز اَوَّلکی گوندِن تا شو واقتا چِنلی خوش خاباری یایراتماقدا شِریکدینگیز. 6 سیزده یاخشی ایشی باشلان خودایینگ مونی عیسی مسیحینگ گِلجِک گونونه چِنلی کِمالا یِتیرجِکدیگینه اینانیارین. 7 مِن زینداندا بُلسام-دا، خوش خاباری قُریپ-ساقلاپ و اُنی تاصدیق اِتسِم-ده، سیزینگ هِمَّه‌نگیز خودایینگ مانگا بِرِن مِرحِمِتینده شِریکسینگیز. شُنونگ اوچین-ده مِن سیز باباتدا شِیله فیکرلِنمَگَه حاقلیدیرین. چونکی یورِگیمینگ دویبونده جایینگیز بار آخیرین! 8 مِن سیزی عیسی مسیحینگ سُیگوسی بیلِن گُرمَگه زاردیغیما خودایینگ اِدیل اُزی شاهاتدیر. 9 مِن سُیگینگیزینگ بیلیمده و گویچلی فَهیملیک دِرِجه دُلوپ-آقماغینی دیلِیَرین. 10 چونکی مِن سیزینگ قاوی زاتلاری بیلیپ، عیسی مسیحینگ گِلجِک گونونده پَک و عایپسیز بُلماغینگیزی ایسلِیَرین. 11 قُی، یاشایشینگیز دینگه عیسی مسیحینگ اوستو بیلِن گِلیَن تاقوالیغینگ میوه‌لِریندِن دُلوپ-آقسین، خودایا بِییکلیک و اُوگی گِتیرسین. خوش خابارینگ یایراماغانینگ اُوونه گِچیپ بُلمایار 12 ایندی بُلسا، اِی عزیزلِر، سیزه شولاری معلیم اِدِسیم گِلیَر: مِنینگ باشیما دوشِن عاذاپلار دُغرودان-دا خوش خابارینگ یایراماغینا کُمِک اِتدی. 13 شونلوقدا، مِنینگ مسیح سِبَپلی زیندان اِدیلِندیگیم کُشگی قُریپ ساقلایانچیلارینا و بِیلِکیلِرینگ بارینا معلیم بُلدی. 14 مِنینگ بو زیندانلیغیم ایمانداقی دُغانلاریمینگ هِمّه‌سینی قوواتلاندیردی. اُلار قُرقمان، باتیرلیق بیلِن خودایینگ سُزونی آیدیارلار. 15 هاووا، اُلارینگ کَبیرلِری عیسی مسیحی باخیل‍لیقدان و کِمغالماجاقدان، کَبیرلِری بُلسا یاخشی نییِتدِن واغیظ اِدیَرلِر. 16 بولار مِنینگ خوش خاباری قُریماق اوچین سایلاناندیغیمی بیلیپ، اُنی سُیگی بیلِن واغیظ اِدیَرلِر. 17 اِمّا بِیلِکیلِر مسیحی پَک یورِکدِن دَل-ده، اُز خاییرلارینی آغتارماق اوچین واغیظ اِدیپ، زیندانداقی عاذاپلاریمی آرتدیرماقچی بُلیارلار. 18 اِدِنلِرینده نَمه! هِر نَهیلی بُلسا-دا، ایسله بِد نییِتدِن، ایسله-ده یاخشی نییِتدِن، باریبیر اُلار عیسی مسیحی واغیظ اِدیَرلِر و مِن مونگا بِگِنیَرین. هاووا، نَچه گِزِک بِگِنِرین، 19 سِبَبی دُغالارینگیز و عیسی مسیحینگ روحونینگ کُمِگی بیلِن بو عاذاپلارینگ مانگا آزادلیق گِتیرجِکدیگینی بیلیَرین. 20 چونکی اومیدیم بار مِن آصلا اوتانجدا قالماجاقدیغیما، هِمیشه‌کیم یالی ایندی هِم باتیرلیق بیلِن حِرِکِت اِتجِکدیگیمه اینانیارین. مِن یاشاسام-دا، اُلسِم-ده، مسیح بِیگِلدیلِر. 21 چونکی مِنینگ اوچین یاشاییش مسیحدیر، اُلوم-ده خاییرلیدیر. 22 اِمّا یاشاسام، نِتیجه‌لی زَحمِت چِکِرین. شُنونگ اوچین-ده هایسیسینی سایلاجاغیمی بیلمِیَرین. 23 مِن ایکی داغینگ آراسیندا قالدیم: مِن دونیَه‌دِن وافات اِدیپ، مسیحینگ یانیندا بُلماق ایسلِیَرین. بو خاص قاویدیر. 24 اِمّا مِنینگ دیری قالماغیم سیزه خاص-دا گِرِکلیدیر. 25 مِن شو باباتدا اینامیم بُلانی اوچین، دیری قالجاقدیغیمی بیلیَرین. هاووا، ایماندا و اُنونگ بِریَن شاتلیغیندا اُسوپ بیلِرینگیز یالی، مِن یِنه-ده سیزینگ آرانگیزدا قالارین. 26 شُنگا گُرَه-ده، مِن زینداندان بُشاپ، یانینگیزا بارانیمدا، سیز عیسی مسیحینگ مِنینگ اوچین اِدِنلِری باباتدا خاص-دا کَن قابارلانیپ بیلِرسینگیز. 27 اِی عزیزلِر، یاشاییش و گِزیشینگیز مسیحینگ خوش خابارینا لاییق بُلسون. شُندا یانینگیزا باریپ سیزی گُرسِم-ده، یانینگیزدا بُلمان، سیز بارادا اِشیتسِم-ده، خوش خابارا دایانیان ایمان اوغروندا بیر بِدِن یالی گُرِشیپ، یِکه بیر روحدا قاییم دوراندیغینگیزی بیلِرین. 28 شِیله-ده، اُزونگیزه قارشی چیقیانلاردان آصلا قُرقمایاندیغینگیزی بیلِرین. سیزینگ ایماندا شِیله قاییم دورماغینگیز اُلارینگ هِلَک بُلجاقدیغیندان، سیزینگ بُلسا نِجات بِریلجِکدیگینگیزدِن نیشانیدیر. بولار خودای طارافینداندیر. 29 چونکی سیزه یِکه مسیحه ایمان گِتیرمِک دَل، اُندا اُنونگ خاطیراسینا قینچیلیق چِکمِک هِم بِرلِندیر. 30 سیز مِنینگ چالیشیانیمی اُزونگیز گُردونگیز، اُل بارادا حَضیر هِم اِشیدیَنسینگیز و بو چالیشیانیما سیز هِم شِریکسینگیز. |
© Turkmen Truth