பிலிப்பியர் 3 - இலங்கை இலகு தமிழ் மொழிபெயர்ப்பு

மனிதர்களுடைய வழிமுறைகளில் நம்பிக்கை வைக்க வேண்டாம்

¹ கடைசியாக, பிரியமானவர்களே, கர்த்தரில் மகிழ்ச்சியாய் இருங்கள். எழுதியதையே மீண்டும் எழுதுவதில் எனக்குச் சிரமம் ஏதும் இல்லை, அது உங்களுக்குப் பாதுகாப்பாக இருக்கும்.

² பொல்லாத நாய்கள் குறித்து எச்சரிக்கையாக இருங்கள், தீமை செய்கின்றவர்களுக்கு எச்சரிக்கையாக இருங்கள், விருத்தசேதனம் செய்பவர்களைக் குறித்து எச்சரிக்கையாக இருங்கள்.

³ ஏனென்றால் மனித முயற்சியில் நம்பிக்கை வைக்காமல் இறைவனின் ஆவியானவரது உதவியினாலே வழிபட்டு, கிறிஸ்து இயேசுவை மகிமைப்படுத்தும் நாமே உண்மையான விருத்தசேதனம் செய்து கொண்டவர்கள்.

⁴ உண்மையில், மனித முயற்சியில் நம்பிக்கை வைப்பதானால் அதற்குரிய தன்மைகள் என்னிடமும் உள்ளன. மனித முயற்சியின் மீது நம்பிக்கை வைப்பதற்குரிய தன்மைகள் தன்னிடம் இருப்பதாக எவராவது எண்ணுவாரானால், என்னிடம் அது அதிகமாகவே உள்ளது.

⁵ ஏனெனில், நான் பிறந்து எட்டாவது நாளில் விருத்தசேதனம் செய்யப்பட்டவன், இஸ்ரயேல் வம்சத்தைச் சேர்ந்தவன், பென்யமீன் கோத்திரத்தைச் சேர்ந்தவன், எபிரேயருக்குப் பிறந்த எபிரேயன், நீதிச்சட்டத்தின்படி நான் ஒரு பரிசேயன்,

⁶ பக்தி வைராக்கியத்தின் காரணமாக திருச்சபையைத் துன்புறுத்தியவன், நீதிச்சட்டத்தின் அடிப்படையிலான நீதியின்படி குற்றமில்லாதவன்.

⁷ ஆனாலும், எனக்குப் பயன் தரும் என்று நான் எண்ணிய எல்லாவற்றையும் கிறிஸ்துவுக்காக இப்போது பயன் அற்றவையாகக் கருதுகிறேன்.

⁸ அதுமட்டுமல்ல, என் ஆண்டவர் கிறிஸ்து இயேசுவை அறியும் அந்த அறிவின் மேன்மையுடன் ஒப்பிடும்போது மற்ற எல்லாமே ஒரு இழப்பு என்பதாகக் கருதி, அவருக்காக அவை எல்லாவற்றையும் நிராகரித்துவிட்டேன். கிறிஸ்துவை நான் ஆதாயமாகப் பெற, அவைகளைக் குப்பையாக எண்ணுகிறேன்.

⁹ அத்துடன் அவரோடு நான் இணைந்திருக்கவே விரும்புகிறேன். நீதிச்சட்டத்தினால் வரும் சுயநீதியை உடையவனாயிராமல், கிறிஸ்துவில் வைக்கும் விசுவாசத்தின் ஊடாக வருகின்ற அவருடைய நீதியை உடையவனாய் இருக்கவே விரும்புகிறேன். இந்த நீதியானது விசுவாசத்தின் அடிப்படையில் இறைவனிடம் இருந்து வருகின்றது.

¹⁰ நான் கிறிஸ்துவையும் அவருடைய உயிர்த்தெழுதலின் வல்லமையையும் அறிந்துகொண்டவனாய், அவரைப் போலவே மரணத்திலும்கூட அவருடைய மரணத்துக்கு ஒத்திருந்து, அவர் அடைந்த வேதனைகளில் ஒன்றிணைந்து பங்குகொண்டு,

¹¹ இப்படியாக ஏதோ ஒருவிதத்தில் நானும் இறந்தோரின் உயிர்த்தெழுதலை அடைய வேண்டும்.

¹² இவை எல்லாவற்றையும் நான் ஏற்கெனவே பெற்றுவிட்டேன் என்றோ, ஏற்கெனவே முழுமை நிலை அடைந்துவிட்டேன் என்றோ சொல்லவில்லை. மாறாக, கிறிஸ்து இயேசு என்னை ஆட்கொண்டதற்கான நோக்கத்தை அடைவதற்காகத் தொடர்ந்து கடும் முயற்சி செய்கின்றேன்.

¹³ பிரியமானவர்களே, அந்த இலக்கை அடைந்துவிட்டேன் என்று நான் எண்ணவில்லை. ஆனால், நான் ஒன்றைச் செய்கின்றேன். கடந்துபோனவற்றை மறந்து, முன்னால் உள்ளவற்றை நோக்கி,

¹⁴ பரிசை வென்றெடுப்பதற்காக இலக்கை நோக்கி அயராது ஓடுகிறேன். இறைவன் கொடுக்கின்ற பரிசாகிய பரலோக வாழ்வைப் பெற்றுக்கொள்ளும்படி, கிறிஸ்து இயேசுவின் மூலமாக அவர் என்னை அழைத்திருக்கிறார்.

பவுலின் முன்மாதிரியை பின்பற்றுதல்

¹⁵ எனவே நம்மில் முதிர்ச்சி அடைந்தோர் யாவரும் இதே மனநிலையைக் கொண்டிருக்க வேண்டும். எதைக் குறித்தாவது உங்களுக்கு வேறுபட்ட கருத்து இருக்குமானால் அதையும் இறைவனே உங்களுக்குத் தெளிவுபடுத்துவார்.

¹⁶ எது எப்படியானாலும் நாம் ஏற்கெனவே அடைந்த வளர்ச்சிக்கு ஏற்றவிதமாய் வாழ முயற்சிப்போம்.

¹⁷ பிரியமானவர்களே, என்னுடைய முன்மாதிரியைப் பின்பற்றுபவர்களோடு நீங்களும் இணைந்து, நாங்கள் உங்களுக்கு வாழ்ந்து காட்டிய முன்மாதிரியின்படி வாழ்கின்றவர்களைக் கவனத்திற்கொள்ளுங்கள்.

¹⁸ ஏனெனில் அநேகர் கிறிஸ்துவின் சிலுவைக்குப் பகைவர்களாகவே வாழ்கின்றார்கள். இதைப்பற்றி அடிக்கடி உங்களுக்குச் சொல்லியிருக்கின்றேன். இப்போது மீண்டும் அதைக் கண்ணீருடன் சொல்கின்றேன்.

¹⁹ அவர்களது முடிவு அழிவு, அவர்களது தெய்வம் வயிறு, தமது வெட்கக்கேடானவைகளில் அவர்கள் பெருமைகொள்கின்றார்கள். உலகத்துக்கு உரியவைகளிலேயே சிந்தனையாய் இருக்கின்றார்கள்.

²⁰ ஆனால், நமது குடியுரிமை பரலோகத்தில் உள்ளது. அங்கிருந்தே இரட்சகராகிய ஆண்டவர் இயேசு கிறிஸ்து வருவாரென ஆவலுடன் எதிர்பார்த்துக் காத்திருக்கிறோம்.

²¹ அவர் எல்லாவற்றையும் தமது கட்டுப்பாட்டின் கீழ் கொண்டுவரச் செய்கின்ற தம்முடைய வல்லமையான ஆற்றலினால், நமது பலவீனமான அழிவுக்குரிய உடல்களை அவரது மகிமையுள்ள உடலைப் போல மாற்றுவார்.