ཡེར་མི་ཡཱ 1 - Tibetan Old Testament 2011

ཡེར་མི་ཡཱ།

¹ དེབ་འདིའི་ལོ་རྒྱུས་རྣམས་བྷེན་ཡ་མིན་གྱི་མངའ་ཁུལ་གྱི་ཨ་ན་ཐོད་ཀྱི་གྲོང་ཁྱེར་གི་བླ་མའི་ཁོངས་སུ་གཏོགས་པ་ཧིལ་ཀི་ཡཱའི་བུ་ཡེར་མི་ཡཱས་གསུངས་པ་ཁག་ཡིན་ནོ།

² གཙོ་བོ་དཀོན་མཆོག་གིས་ཨ་མོན་གྱི་སྲས་ཡོ་ཤི་ཡཱ་ཡ་ཧུ་དཱ་པའི་རྒྱལ་པོ་གནང་བའི་ལོ་བཅུ་གསུམ་པར་ཡེར་མི་ཡཱ་ལ་བཀའ་གནང་བ།

³ ཡང་སྐྱར་ཁོང་གིས་ཡོ་ཤི་ཡཱའི་སྲས་ཡེ་ཧོ་ཡ་ཀིམ་རྒྱལ་པོ་ཡིན་སྐབས་ཁོང་ལ་བཀའ་གནང་ཡོད། དེའི་རྗེས་གཙོ་བོ་དཀོན་མཆོག་གིས་ཡོ་ཤི་ཡཱའི་སྲས་ཛེ་དེ་ཀི་ཡཱས་རྒྱལ་སྲིད་སྐྱོངས་བའི་ལོ་ངོ་བཅུ་གཅིག་བར་ཐེངས་མང་པོར་ཁོང་ལ་བཀའ་གནང་ཡོད། ལོ་དེའི་ཟླ་བ་ལྔ་པར་ཡེ་རུ་ཤ་ལེམ་གྱི་མི་མང་རྣམས་བཙན་བྱོལ་དུ་འཁྲིད་དོ༎

ཡེར་མི་ཡཱ་འབོད་པ།

⁴ གཙོ་བོ་དཀོན་མཆོག་གིས་ང་ལ་བཀའ་གནང་བ།

⁵ ངས་ཁྱོད་ལ་སྲོག་མ་བྱིན་པའི་སྔོན་དུ་ཁྱོད་ལ་འདམས་པ་དང་། ཁྱོད་མ་སྐྱེས་པའི་སྔོན་ལ་ངས་ཁྱོད་མི་རིགས་ཚོའི་ཆེད་དུ་ལུང་སྟོན་པར་འདམས་པ་ཡིན་ནོ།

⁶ ཀྱེ་བླ་ན་མེད་པའིི་གཙོ་བོ་དཀོན་མཆོག། ང་ཧ་ཅང་ཆུང་བས་ངས་ཇི་ལྟར་སྨྲ་དགོས་པ་མི་ཤེས་ཅེས་ངས་ལན་ཞུས་པ་ཡིན།

⁷ འོན་ཀྱང་གཙོ་བོ་དཀོན་མཆོག་གིས་ང་ལ་བཀའ་གནང་བ། ཁྱོད་ཧ་ཅང་ལོ་ཆུང་བ་ཡིན་ཞེས་མ་ཟེར་ཞིག། ངས་ཁྱོད་ལ་གཏོང་བའི་མི་མང་ཚོའི་སར་སོང་ལ་ངས་ཁྱོད་ལ་ཇི་ལྟར་བཀའ་བསྒོ་བ་རྣམས་དེ་ཚོ་ལ་ཤོད་ཞིག

⁸ ཁྱོད་དེ་ཚོ་ལ་མ་འཇིགས་ཤིག། གང་ལ་ཟེར་ན། ང་ཁྱོད་དང་མཉམ་དུ་སྐྱོབས་པའི་ཕྱིར་འགྲོག་པར་བྱ་ཞེས། ང་གཙོ་བོ་དཀོན་མཆོག་གིས་སྨྲས་པ་ཡིན་ནོ།

⁹ དེ་ནས་གཙོ་བོ་དཀོན་མཆོག་གིས། ཕྱག་བརྐྱངས་ནས་ངའི་མཆུ་ལྟོ་ལ་རེག་ནས་ང་ལ་བཀའ་གནང་བ། ཉོན་ཞིག། ངས་ཁྱོད་ཀྱིས་སྨྲ་དགོས་པའི་གཏམ་རྣམས་ཁྱོད་ལ་སྟེར་བར་བྱའོ།

¹⁰ དེ་རིང་ངས་ཁྱོད་ལ་མི་རིགས་དང་རྒྱལ་ཁབ་ཚོ་རྩ་བཀོག་གཏང་བ་དང་མར་རློག་པ་དང་མེད་པར་བཟོ་བ་དང་མགོ་མཛུག་སློག་པ་དང་བཞེངས་པ་དང་འཛུགས་པ་བཅས་ཀྱི་དབང་ཆ་སྤྲོད་རྒྱུ་ཡིན་ཞེས་གསུངས་སོ༎

ཞལ་གཟིགས་ཁག་གཉིས།

¹¹ གཙོ་བོ་དཀོན་མཆོག་གིས། ཀྱེ་ཡེར་མི་ཡཱ་ཁྱོད་ཀྱིས་ག་རེ་མཐོང་ངམ་ཟེར་ང་ལ་བཀའ་འདྲི་གནང་བྱུང་། ངས་ལན་དུ་སྟར་གའི་ཤིང་གི་ཡལ་ག་ཞིག་མཐོང་གི་འདུག་ཅེས་ཞུས་པ་ཡིན།

¹² གཙོ་བོ་དཀོན་མཆོག་གིས། ཁྱོད་ཀྱིས་མཐོང་བ་དེ་བདེན་པ་རེད། ངས་ངའི་བཀའ་རྣམས་དངོས་སུ་སྒྲུབ་པ་དེ་བལྟ་བར་འགུག་བསྡད་ཡོད་ཅེས་བཀའ་གནང་ངོ་།

¹³ དེ་ནས་གཙོ་བོ་དཀོན་མཆོག་གིས། ང་ལ་ཡང་སྐྱར་བཀའ་གནང་བྱུང་། ཁོང་གིས། ད་ཁྱོད་ཀྱིས་ཅི་མཐོང་ངམ་ཞེས་བཀའ་འདྲི་གནང་བས། ངས་བྱང་དུ་སྣོད་ཅིག་འཁོལ་བ་མཐོང་བ་དང་། དེ་འདིའི་ཕྱོགས་ལུད་གྲབ་འདུག་ཅེས་ཞུས་པ་ཡིན།

¹⁴ གཙོ་བོ་དཀོན་མཆོག་གིས་ང་ལ་བཀའ་གནང་བ། ཡུལ་འདིར་སྡོད་མི་རྣམས་ཐོག་བྱང་ཕྱོགས་ནས་འཇིག་པ་ཁོལ་ནས་ལུད་གྲབ་འདུག

¹⁵ གང་ལ་ཟེར་ན། ངས་བྱང་ཕྱོགས་སུ་ཡོད་པའི་རྒྱལ་ཁབ་ཚང་མར་ཡོང་བར་འབོད་བཞིན་ཡོད། དེ་ཚོའི་རྒྱལ་པོ་ཚོས་རང་གི་རྒྱལ་ཁྲི་རྣམས་ཡེ་རུ་ཤ་ལེམ་གྱི་རྒྱལ་སྒོ་རྣམས་དང་དེའི་མཐའ་འཁོར་གྱི་ལྕགས་རི་རྣམས་དང་ཡ་ཧུ་དཱ་པའི་གྲོང་ཁྱེར་གཞན་ཚོའི་མཐའ་འཁོར་དུ་རྒྱབ་པར་བྱའོ།

¹⁶ ངས་ངའི་མི་མང་ལ་ཆད་པ་གཏོང་བར་བྱ། གང་ལ་ཟེར་ན། དེ་ཚོས་སྡིག་པ་གྱིས་ཡོད། དེ་ཚོས་ང་སྤངས་ནས་ལྷ་གཞན་ལ་དམར་མཆོད་ཕུལ་བ་དང་སྐུ་འདྲ་བཟོས་པ་དང་དེ་ཚོ་ལ་མཆོད་འབུལ་བྱེད་ཡོད་དོ།

¹⁷ ཡེར་མི་ཡཱ་གྲ་སྒྲིགས་བྱོས་ཤིག། ཁྱོད་སོང་ལ་ཁྱོད་ལ་ཇི་ལྟར་བཀའ་བསྒོ་བ་རྣམས་དེ་ཚོ་ལ་སྨྲོས་ཤིག ད་ཁྱོད་དེ་ཚོ་ལ་མ་འཇིགས་ཤིག དེ་མིན་ངས་ཁྱོད་དེ་ཚོ་མཉམ་དུ་ཡོད་སྐབས་སུ་ཧ་ཅང་འཇིག་དགོས་པ་བཟོ་རྒྱུ་ཡིན།

^18-19 ཡེར་མི་ཡཱ་ཉོན་ཞིག། ཡུལ་འདིའི་ནང་ཡོད་པའི་ཡ་ཧུ་དཱ་པའི་རྒྱལ་པོ་ཚོ་དང་ལས་བྱེད་པ་ཚོ་དང་བླ་མ་ཚོ་དང་མི་མང་ཚོ་བཅས་ཚང་མ་ཁྱོད་ཀྱི་རྒྱབ་འགལ་དུ་ཡིན་པར་འགྱུར། འོན་ཀྱང་ངས་ཁྱོད་ཀྱིས་དེ་ཚོ་ལ་གདོང་ལེན་བྱེད་པའི་ནུས་སྟོབས་སྤྲོད་རྒྱུ་ཡིན། ཁྱོད་ནི་བཙན་པོར་བཟོས་པའི་གྲོང་ཁྱེར། ལྕགས་ཀྱི་ཀ་བ་དང་ལིའི་ལྕགས་རི་ལྟ་བུར་བྱུང་བར་འགྱུར། དེ་ཚོས་ཁྱོད་ལ་ཕམ་པར་མི་བྱེས། གང་ལ་ཟེར་ན། ཁྱོད་སྐྱོབས་པར་ང་ཁྱོད་དང་མཉམ་དུ་ཡོད་དོ། ང་གཙོ་བ་དཀོན་མཆོག་གིས་སྨྲས་པ་ཡིན་ཞེས་སོ༎