ཤ་མུ་ཨེལ་གཉིས་པ། 2 - Tibetan Old Testament 2011

དཱ་བིད་ཡ་ཧུ་དཱའི་རྒྱལ་པོར་བསྐོ་བ།

¹ དེ་རྗེས་དཱ་བིད་ཀྱིས་གཙོ་བོ་དཀོན་མཆོག་ལ། ང་ཕྱིན་ནས་ཡ་ཧུ་དཱའི་གྲོང་ཁྱེར་ཞིག་དབང་དུ་བསྡུའམ་ཞེས་བཀའ་འདྲི་ཞུས་པས། ལན་དུ་གཙོ་བོ་དཀོན་མཆོག་གིས་བསྡུས་ཤིག་ཅེས་གསུངས་སོ། དཱ་བིད་ཀྱིས། གྲོང་ཁྱེར་གང་ཞིག་དབང་དུ་བསྡུའམ་ཞེས་ཞུས་པས། གཙོ་བོ་དཀོན་མཆོག་གིས་ཧེབ་རོན་གྲོང་ཁྱེར་དེ་དབང་དུ་བསྡུས་ཤིག་ཅེས་གསུངས་སོ།

² དེ་ནས་དཱ་བིད་རང་གི་ཆུང་མ་གཉིས་མཉམ་དུ་འཁྲིད་ནས་ཧེབ་རོན་དུ་ཕྱིན་ཞིང་། ཆུང་མ་གཅིག་ནི་ཡེཛ་རིལ་ནས་ཡིན་པ་མིང་ལ་ཨ་ཧི་ནོ་ཨམ་ཞེས་པ་དང་། གཞན་དེ་ནི་ཀར་མེལ་ནས་ཡིན་པ་འདས་པོ་ན་བྷལ་གྱི་ཆུང་མ་ཨ་བྷི་གེལ་ཞེས་པ་དེ་ཡིན་ནོ།

³ ཁོས་རང་གི་མི་རྣམས་དང་དེ་ཚོའི་ནང་མི་དང་བཅས་པ་འཁྲིད་ནས་ཧེབ་རོན་གྲོང་ཁྱེར་གྱི་ཉེ་ཁུལ་དུ་གཞིས་ཆགས་ནས་བསྡད་དོ།

⁴ དེ་ནས་ཡ་ཧུ་དཱའི་མི་རྣམས་ཧེབ་རོན་དུ་ཡོང་ནས་དཱ་བིད་ལ་ཡ་ཧུ་དཱའི་རྒྱལ་པོར་བསྔོ་འབུལ་བྱས་སོ། གྷིལ་ཨད་དུ་ཡོད་པའི་ཡ་བྷེཤའི་མི་རྣམས་ཀྱིས་ས་ཨུལ་གྱི་སྐུ་ཕུང་དུར་དུ་སྦས་པའི་སྐོར་དཱ་བིད་ཀྱིས་ཐོས་པ་དང་།

⁵ ཁོང་གིས་མི་འགའ་ཤས་བརྒྱུད་དེ་ལོན་བཏང་གསལ། ཁྱོད་ཚོའི་རང་གི་རྒྱལ་པོའི་སྐུ་ཕུང་དེ་དུར་དུ་སྦས་པའི་སྒོ་ནས་ཁོང་ལ་རྒྱལ་ཞེན་མངོན་པར་བྱས་པར་གཙོ་བོ་དཀོན་མཆོག་གིས་ཁྱོད་ཚོར་བྱིན་རླབས་གནང་བར་ཤོག

⁶ གཙོ་བོ་དཀོན་མཆོག་གིས་ཉིད་ཀྱི་བཀའ་འདྲིན་དང་དམ་ཚིག་ཁྱོད་ཚོར་བསྟན་པར་ཤོག ཁྱོད་ཚོའི་བྱེད་རྗེས་དེ་ལ་བརྟེན་པས་ད་ངས་ཀྱང་ཁྱོད་ཚོར་འབྲེལ་ལམ་བཟང་པོ་བྱེད་རྒྱུ་ཡིན།

⁷ སེམས་ཤུགས་སྐྱེད་ལ་བློ་སྟོབས་མ་ཉམས་པར་བྱོས་ཤིག ཁྱོད་ཚོའི་རྒྱལ་པོ་ཤ་ཨུལ་གྲོངས་ཟིན་པས། ཡ་ཧུ་དཱའི་མི་མང་ཚོས་ང་ལ་རང་གི་རྒྱལ་པོར་བསྔོ་འབུལ་བྱས་ཡོད་པ་ཡིན་ནོ༎

ཨིཤི་བྷོ་ཤེད་ཨིསི་རཱཨེལ་གྱི་རྒྱལ་པོར་བསྐོ་བ།

⁸ ས་ཨུལ་གྱི་དམག་དཔྱིད་ཨབ་ནེར་ཞེས་པ་དེ་ནི་ནེར་གྱི་བུ་ཡིན་ཅིང་། ཁོས་ས་ཨུལ་གྱི་བུ་ཨིཤི་བྷོ་ཤེད་མཉམ་དུ་འཁྲིད་དེ་ཡོར་དན་ཕར་ཕྱོགས་སུ་མ་ཧ་ནེམ་དུ་བྲོས་ཕྱིན་ནོ།

⁹ དེར་ཨབ་ནེར་གྱི་ཨིཤི་བྷོ་ཤེད་ལ་གྷིལ་ཨད་དང་། ཨ་ཤེར། ཡེཛ་རིལ། ཨེཕ་ར་ཡིམ་དང་བྷེན་ཡ་མིན་ས་ཁུལ་ཁག་གི་རྒྱལ་པོའམ། དོན་དམ་ཨིསི་རཱཨེལ་པ་ཡོངས་ཀྱི་རྒྱལ་པོར་བསྐོས་སོ།

¹⁰ ཁོང་ཨིསི་རཱཨེལ་གྱི་རྒྱལ་པོར་བསྐོ་བའི་སྐབས་སུ་དགུང་ལོ་བཞི་ཅུ་ལོན་ཡོད་པ་དང་། ཁོང་གིས་ལོ་ངོ་གཉིས་ཀྱི་རིང་རྒྱལ་སྲིད་བསྐྱངས་སོ། འོན་ཀྱང་ཡ་ཧུ་དཱའི་སྡེ་རིགས་ཀྱི་མི་རྣམས་ཀྱིས་དཱ་བིད་ལ་ཤ་ཞེན་བྱེད་ཀྱི་ཡོད་པ་ཡིན་ནོ།

¹¹ ཁོང་གིས་ཧེབ་རོན་དུ་ཡ་ཧུ་དཱའི་ཐོག་ཏུ་ལོ་བདུན་དང་ཕྱེད་ཀའི་རིང་རྒྱལ་སྲིད་བསྐྱངས་སོ༎

ཨིསི་རཱཨེལ་དང་ཡ་ཧུ་དཱའི་བར་ལ་དམག་འཁྲུགས་བྱུང་བ།

¹² ཨབ་ནེར་དང་ཨིཤི་བྷོ་ཤེད་ཀྱི་ལས་བྱེད་པ་རྣམས་མ་ཧ་ནེམ་ནས་གྷི་བི་ཨོན་གྲོང་ཁྱེར་དུ་ཕྱིན་ཞིང་།

¹³ ཛེ་རུ་ཡཱའི་བུ་ཡོ་ཨབ་དང་། དཱ་བིད་ཀྱི་ལས་བྱེད་པ་གཞན་རྣམས་རྫིང་བུའི་ཉེ་འགྲམ་དུ་ཐུག་པ་དང་། དེ་ཚོ་ཚོགས་ཁག་ཅིག་རྫིང་བུའི་ཚུར་ཕྱོགས་དང་གཞན་དེ་རྫིང་བུའི་ཕར་ཕྱོགས་སུ་ཕན་ཚུན་ཁ་སྤྲོད་བྱེད་ནས་བསྡད་དོ།

¹⁴ ཨབ་ནེར་གྱིས་ཡོ་ཨབ་ལ། ང་ཚོའི་དམག་མིའི་ཁོངས་ནས་གཞོན་པ་དགའ་ཤས་ལ་གོ་མཚོན་གྱི་འདྲན་བསྡུར་བྱེད་ཕྱིར་ཕན་ཚུན་དམག་འཐབ་བྱེད་བཅུག་དགོས་ཅེས་སྨྲས་སོ། དེའི་ལན་དུ་ཡོ་ཨབ་ཀྱིས་དེ་ག་རང་ཡོང་ང་ཞེས་སྨྲས་སོ།

¹⁵ དེ་ནས་ཨིཤི་བྷོ་ཤེད་དང་བྷེན་ཡ་མིན་གྱི་སྡེ་རིགས་ཀྱི་ཁོངས་གཏོགས་བྱེད་དེ་མི་གྲངས་ ༡༢ ཀྱིས་དཱ་བིད་ཀྱི་མི་ ༡༢ དང་དམག་འཐབ་བྱས་སོ།

¹⁶ མི་རེ་རེས་རང་གི་དགྲ་བོའི་མགོར་བཟུང་ནས་གཞོགས་ལ་རལ་གྲི་བཙུགས་པས། ཁོ་ཚོ་མི་ན་གཞོན་ ༢༤ སྡེབ་ཅིག་ལ་ས་ཁར་འགྱེལ་ནས་ཤིའོ། དེར་བརྟེན་པས་གྷི་བི་ཨོན་གྱི་ས་གནས་དེའི་མིང་ལ་རལ་གྲིའི་ཐང་ཀ་ཞེས་བརྗོད་སྲོལ་ཡོད་པ་ཡིན་ནོ།

¹⁷ དེ་རྗེས་དམག་འཁྲུགས་ཆེན་པོ་ཞིག་ལངས་ནས་དཱ་བིད་ཀྱི་མི་ཚོས་ཨབ་ནེར་དང་ཨིསི་རཱཨེལ་པ་རྣམས་འཕམ་པར་བྱས་སོ།

¹⁸ ཛེ་རུ་ཡཱའི་བུ་གསུམ་ནི་ཡོ་ཨབ་དང་། ཨ་བྷི་ཤེ་དང་། ཨ་ས་ཧེལ་ཡང་དེར་ཡོད་ཅིང་། ཡང་ཨཤེ་ཨེལ་ནི་རི་དགས་ཤ་བ་དང་འདྲ་བ་བང་མགྱོགས་ཆེ་བས།

¹⁹ ཨབ་ནེར་ལ་རྗེས་དེད་བྱས་ཏེ། ཐད་ཀར་རྒྱུགས་ཕྱིན་པ་དང་།

²⁰ ཨབ་ནེར་གྱིས་ཕྱི་མིག་བལྟས་ནས་སྨྲས་པ། ཨ་ས་ཧེལ་ལ་ཁྱོད་རང་རང་ཡིན་ནམ་ཞེས་དྲིས་པའི་ལན་དུ། ཁོས་ང་ཡིན་ཞེས་སྨྲས་སོ།

²¹ ཨབ་ནེར་གྱིས་ངའི་རྗེས་དེད་མ་བྱེད་ཅིག། འོན་ཀྱང་དམག་མི་ཞིག་གི་རྗེས་སུ་དེད་ནས་ཁོ་ལ་གང་ཡོད་པ་ཚང་མ་འཕྲོག་ཅིག་ཅེས་སྨྲས་ཀྱང་། ཨ་ས་ཧེལ་གྱིས་མུ་མཐུད་ནས་ཁོའི་རྗེས་དེད་བྱས་སོ།

²² ཨབ་ནེར་གྱིས་སྐྱར་དུ་སྨྲས་པ། ང་ལ་དེད་རྒྱུ་དེ་མཚམས་འཇོགས་བྱོས་ཤིག ངས་ཁྱོད་མ་བསད་ཀ་མེད་བྱེད་མ་བཅུག་ཅིག དེ་ལྟར་བྱུང་བ་ཡིན་ན་ངས་ཁྱོད་ཀྱི་ཨ་ཇོ་ཡོ་ཨབ་ལ་ཇི་ལྟར་གདོང་བསྟན་ནུས་སམ།

²³ འོན་ཀྱང་ཨ་ས་ཧེལ་མ་ཉན་པར་མུ་མཐུད་ཀྱིས་རྗེས་དེད་བྱས་པས། ཨབ་ནེར་གྱིས་རྒྱབ་ཕྱོགས་སུ་མདུང་འཕང་པས། ཁོའི་གྲོད་པར་ཟུག་ནས་རྒྱབ་ངོས་སུ་ཐོན་ནོ། དེ་རྗེས་ཨཤེ་ཨེལ་ས་ཁར་འགྱེལ་ནས་ཤི་བ་དང་། ཁོ་འགྱེལ་ཡོད་སར་སླེབས་པའི་མི་ཚང་མ་དེར་ལངས་བསྡད་དོ།

²⁴ འོན་ཀྱང་ཡོ་ཨབ་དང་ཨ་བྷི་ཤེ་གཉིས་ནི་ཨབ་ནེར་གྱི་རྗེས་སུ་ཕྱིན་ཞིང་། དགོང་དྲོ་ཉི་མ་ནུབ་མཚམས་སུ་དེ་ཚོ་ཨམ་མཱ་ཞེས་པའི་རི་བོར་སླེབས་པ་དང་། རི་བོ་དེ་ནི་གྷི་ཡཱའི་ཤར་ཕྱོགས་དང་གྷི་བི་ཨོན་འབྲོག་སྟོང་དུ་འགྲོ་བའི་ལམ་དུ་ཡོད་པ་ཡིན་ནོ།

²⁵ བྷེན་ཡ་མིན་གྱི་མི་རྣམས་སྐྱར་དུ་ཨབ་ནེར་གྱི་མཐའ་འཁོར་དུ་ལངས་ནས། དམག་འཐབ་བྱེད་ཕྱིར་རི་རྩེར་གྲ་སྒྲིག་བྱས་ནས་བསྡད་དོ།

²⁶ དེ་ནས་ཨབ་ནེར་གྱིས་ཡོ་ཨབ་ལ། ང་ཚོ་དུས་རྒྱུན་དུ་དམག་ཁོ་རང་འཐབ་ནས་སྡོད་དགོས་སམ། མཐའ་མར་དེའི་སྒྲུབ་འབྲས་ནི་འཁོན་སེམས་ཁོ་ན་ཡོང་རྒྱུ་ཡིན་པ་དེ་ཁྱོད་ཀྱིས་མི་རྟོགས་སམ། ང་ཚོ་ནི་ཡུལ་མི་གཅིག་པ་ཡིན་པས་ཁྱེད་ཀྱིས་རང་གི་མི་རྣམས་ལ་ང་ཚོའི་རྗེས་དེད་བྱེད་རྒྱུ་མཚམས་འཇོག་བྱེད་དགོས་ཅེས་ག་དུས་བཀའ་གནང་ངམ་ཞེས་སྨྲས་པ་དང་།

²⁷ དེའི་ལན་དུ་ཡོ་ཨབ་ཀྱིས། ངས་སྐུ་གསོན་པོར་བཞུགས་པའི་དཀོན་མཆོག་དཔང་དུ་བཙུག་ནས་བརྗོད་རྒྱུར། གལ་སྲིད་ཁྱོད་ཀྱིས་ཁ་སངས་པ་མ་ཡིན་ན། ངའི་མི་ཚོས་སང་ཞོག་ནམ་ལང་བར་དུ་མུ་མཐུད་དེ་ཁྱོད་ཆོའི་རྗེས་དེད་བྱས་པ་ཡོད་ཅེས་སྨྲས་སོ།

²⁸ དེ་ནས་ཡོ་ཨབ་ཀྱིས། ཨིསི་རཱཨེལ་པ་རྣམས་ལ་རྗེས་དེད་བྱེད་རྒྱུ་དེ་མཚམས་འཇོག་བྱེད་དགོས་པའི་བརྡ་གཏོང་ཞིང་དམག་དུང་འབུད་པས་དམག་མཚམས་འཇོག་བྱུང་བ་ཡིན་ནོ།

²⁹ དེ་ནས་ཨབ་ནེར་དང་ཁོའི་མི་རྣམས་མཚན་གང་ཡོར་དན་ལུང་གཤོང་བརྒྱུད་དེ་ཕྱིན་ཞིང་། གཙང་པོ་ཡོར་དན་རྒལ་ཏེ་སང་ཉིན་སྔ་དྲོ་ཉིན་གང་འགྲུལ་བསྐྱོད་བྱས་ནས་མཐར་མ་ཧ་ནེམ་དུ་ཕྱིར་ལོག་འབྱོར་རོ།

³⁰ ཡོ་ཨབ་ཀྱིས་རྗེས་དེད་མཚམས་འཇོག་བྱས་པའི་རྗེས་ལ་ཁོས་རང་གི་མི་ཡོངས་རྫོགས་བཀོང་ནས་གྲངས་བཤེར་བརྒྱབ་པས། ཨ་ས་ཧེལ་མ་རྩིས་པའི་མི་གྲངས་བཅུ་དགུ་མ་ཚང་ངོ་།

³¹ དཱ་བིད་ཀྱི་མི་ཚོས་ཨབ་ནེར་གྱི་མི་ཁོངས་ནས་ཡིན་པ་བྷེན་ཡ་མིན་གྱི་སྡེ་རིགས་ལས་མི་གྲངས་ ༣༦༠ ཙམ་བསད་པ་དང་།

³² ཡོ་ཨབ་དང་ཁོའི་མི་ཚོས་ཨ་ས་ཧེལ་གྱི་ཕུང་པོ་དེ་འཁྱེར་ནས་བྷེད་ལེ་ཧེམ་དུ་རང་གི་ནང་མིའི་དུར་ཁང་དུ་སྦས་སོ། དེ་ནས་དེ་ཚོ་མཚན་གང་འགྲུལ་བསྐྱོད་བྱས་ཏེ་སང་ཞོག་ནམ་ལངས་སྐབས་སུ་ཧེབ་རོན་དུ་སླེབས་སོ༎