Lukas 12 - Tinongaran nu Kinoringan: Pinongurugan Lagu Pontudukan om Porojonjian Wagu (Tombonuo)

Baanda suat so lobuw musingkopoimaid

¹ Iya oono boribu-ribu sampuw nu lobuw sampai koputotomping om kopuiingkag nu akod. Mutongaro yo si Yisus so mompomaid Niyo ri nu, “Ingato muyu yo pontudukan nu lobuw Parisi, nosiro kondiri nga dai poimaid.

² Onu yo po nokosusut, osiou-a ong wagu, om onu yo po so inawo nga oilaan-a ong wagu.

³ Onu yo po tongaron muyu so kotuongan, orongou-a nu kiawi' lobuw so konowawan ong wagu, om onu-onu burungon muyu so bilik, kotuturan-a so lobuw suang,” koo si Yisus.

Lumaa' yo nu Kinoringan

⁴ Mutongaro yo si Yisus nu, “Oo su kouna'an Ku, ondomo muyu yo! Ikod kou yo kilaa' nu lobuw ontob kopomatoi nu koyuwan muyu, nga dai ya kopomatoi nu atod muyu no.

⁵ Tudukan Ku ya kou ong isai su opatut kololaa'an muyu. Kinoringan-o su kolaa'an muyu, so' Iyo yo su kikopogboya'an momatoi nu lobuw om posubo nu atod nosiro so noraka. Mongaabar Aku so kou nu, laa' kou yo nu Kinoringan!

⁶ Nga ikod kou kigagau ong Kinoringan-o su opatut kolaa'an muyu, so' soko itu pomikiran Niyo, ono yo pudi ong pirit su ginis nu bombolog nu omura (limo pirit duo yo siin orogo), insan ido dai ya olupaan nu Kinoringan.

⁷ Indadi, ikod kou yo kigagau so' boorogo kou po ko' pirit om insan obuk muyu no nga noiap-o kiawi',” koo si Yisus.

Mongakun ko' mongolim so si Kristus

⁸ Mutongaro po si Yisus nu, “Mongaabar Aku so kou nu, isai mongakun so lobuw suang nu Aku yo su kosongapan so iyo, Aku, Anak nu Riniba nga mongakun-a so iyo so tiningkuangon nu susuu'on nu Kinoringan so surga.

⁹ Nga isai mongolim so lobuw suang suat so Aku, Aku nga mongolim-a so iyo so tiningkuangon nu susuu'on nu Kinoringan.

¹⁰ Om isai mutangar lumawan so Aku Anak nu Riniba, oompunan-a, nga isai mubaag nu Atod nu Kinoringan, dai oompunan.

¹¹ Bang doowaan kou nu lobuw so pubisora'an so' maid kou so Aku, ikod kou yo kigagau ong onu nisambut muyu.

¹² Iya oono, Atod nu Kinoringan kondiri su montuduk so kou onu mupatut tongaron muyu,” koo si Yisus.

Lobuw doyaan nga olowong

¹³ Ido koyuwan kiat so lobuw suang-i minutangar so si Yisus nu, “Oo Guru, tongaro po sulod ku no su' oboogi'an aku nu pusaka nokoogol ni amo mai no,” koo.

¹⁴ Sumombuto yo si Yisus nu, “Oo lakitu, dai su otoop popubaagi' so kou nu orata' oono,” koo.

¹⁵ Mutongaro yo sono si Yisus so lobuw suang-i nu, “Ingato muyu yo, ikod kou yo kosimpou so' kowiawan muyu no okon ko suat-a nu orata' so wonuo tu,” koo.

¹⁶ Musolig-soligo yo sono si Yisus montuduk nu lobuw suang-i nu, “Ido koyuwan doyaan so' kitana' nu owarong, om dadan osuang pinumpung niyo.

¹⁷ Momikiro yo sono iyo so inawo nu, ‘D'ado ong itu korumposan nu pinumpung ku tu. Onu gaam itu waalon ku?

¹⁸ Itu yo su waalon ku. Uyason ku waloi laid ku tu, om momuwaloi aku koimbagu nu maayo po ko' waloi laid ku tu, su' orumpos kiawi' pinumpung nu tonoman om orata' ku no.

¹⁹ Oopod ku yo waloi oono, k'aku sono so inawo ku, Osanang aku yo sono! Nokaalap aku yo nu onu yo po owarong, om muuma' aku yo nu itu botoun-toun. Mintoron aku po sono om mongokan monginum om murami-rami,’ koo so inawo nu lobuw doyaan oono.

²⁰ Nga mutangar sono Kinoringan so iyo nu, ‘Oo su lobuw olowong. Awi ya iitu matoi ko! Lobuw-a sondiang kosongapan nu orata' mu no,’ koo.

²¹ Soko ono yo koompusan nu lobuw mokikokaya suat-a so wonuo tu, nga ado pikiran momaal nu koinginan nu Kinoringan,” koo si Yisus.

Adang-o bogagau nu kosimpitan muyu

²² Mutongaro yo si Yisus so mompomaid Niyo ri nu, “Mongaabar Aku so kou nu ikod kou yo kigagau suat so ingkookan intawa pokakas muyu.

²³ Oogot po kowiawan ko' ingkookan, om oogot po koyuwan ko' pinokokasan.

²⁴ Udioo muyu ya bombolog-o. Dai ya mutonoman, dai ya momaroi, om d'ado ya gudang intawa lingkut, nga pookanon-a nu Kinoringan. Sobana ko boorogo kou po ko' bombolog-o!

²⁵ Ado ido so kou kopusintogui sabat, pudi bogagau.

²⁶ Bang insan ono nga dai muyu owaal, adang kou yo bogagau nu wokon.

²⁷ Udioo muyu tanom-tanom momuwusak. Dai ya mugogoma'on intawa mongoraro, nga insan si Raja Salumu ya silaid-i su landu osuang pokakas owarong, dai ya koimbas pokakas niyo nu koowarong nu tanom-tanom oono.

²⁸ Siowi muyu rikut tumuu' so umo. Tumuu' nu runat tu om suab ondikuton-o om susulan, nga poriora'on-a nu Kinoringan. Makin po ong kou nga poriora'on-a Niyo. Indadi nokuro su dai po poimaid kou sobana?

²⁹ Ikod kou yo dadan kigagau suat nu okanon inumon muyu.

³⁰ Ono yo kiawi' su didiumon nu lobuw dai poimaid so Kinoringan. Nga, Amo muyu so surga su koilo nu oogot kou nu ono.

³¹ Indadi podulo muyu po Kinoringan mogkuasa so kou, om onu yo po kosimpitan muyu nga insukupan-a Niyo,” koo si Yisus.

Impugon-o orata' dii so surga

³² Mutongaro po si Yisus nu, “Ikod kou yo kilaa' pudi owako kou poimaid, so' kou yo su koinginan nu Kinoringan kowaid so Pogkuosaan Niyo.

³³ Wolii yo kiawi' orata' muyu no om toyad-toyado muyu siin-o so lobuw kikosimpitan. Bang waalon muyu ono, soko momaal kou nu poianan nu siin dai musiba', ono yo orata' nitou' so surga, so' dii yo po so surga d'ado yo lobuw monakou, om d'ado yo gagat mongoraag.

³⁴ Siombo-ombo ya orata' muyu no, nai ya inawo muyu no,” koo si Yisus.

Mingat-ingat

^35-36 Musolig-soligo po si Yisus suat nu kologa'an Niyo koimbagu nu, “Mingat-ingat kou yo dadan soko kouriponan sumodia' mongindad nu kouli' tuan nosiro no kiat so rami-rami muontun. Mupokakas nosiro om dai mupoda' nu politaan. Bang kouli' tuan oono om mongoritik nu pintu, osukaban iyo osikap.

^37-38 Osanang-o kouriponan osunsungan nu tuan niyo no sumodia' mongindad so iyo nu kouli', pudi tonga' yo nu awi om kologa' nai' intawa olaid po kiat nu ono. Mongaabar aku so kou nu, tuan oono kondiri posodia', momaau so nosiro poogom om momolak nu kookanan so nosiro.

³⁹ Ondomo muyu yo itu, bang oilaan nu songapan nu waloi nu lumoga' lobuw monakou so waloi niyo no, tantu dai iyo moturuw su' dai kologa' moonakou oono.

⁴⁰ Ono yo ko', sumodia' kou yo, so' dai muyu oilaan ong sombiya kologa'an Ku koimbagu, Anak nu Riniba,” koo si Yisus.

Uripon ototog om dai ototog

⁴¹ Mongoduato yo si Pitrus so si Yisus nu, “Oo Tuhan, suat-a ka so kai salig-salig oono intawa kiawi' ya lobuw tu?” koo.

⁴² Sumombuto yo Tuhan nu, “Uripon ototog om moilo, iyo yo su pongkaton nu tuan niyo no nu mongipat nu kouriponan wokon om pookan so nosiro, nu notantu yo niyo.

⁴³ Osanang-o uripon ong lumoga' tuan niyo no, om osunsungan mugogoma'on nu ipogama' so iyo no.

⁴⁴ Obaran Ku kou, pongkaton sono iyo nu tuan niyo no, urugon nu pongoorapan nu kiawi' orata' niyo no.

⁴⁵ Nga bang mutangar uripon oono so inawo nu, ‘Olaid ong si tuan lumoga',’ koo, lubakon-o sono niyo kouriponan wokon-i woinoi kusoi, mongokan monginum om musingawuk.

⁴⁶ Dai yo sono niyo noilo-ilaan, lumoga' tuan niyo no om nosunsungan nu gogoma'on niyo iiri. Om sobana ko pogiontoban nu tuan niyo no mononsara' om pinoinsuw nu lobuw dai mongowaid nu ponuu'an nu Kinoringan.

⁴⁷ Iri yo po uripon koilo yo laid nu koinginan nu tuan niyo no, nga tomodon-a dai mongowaid, osuang po lulubak oirosaan niyo.

⁴⁸ Nga iri uripon dai po koilo nu koinginan nu tuan niyo no, om kopomaal nu kororaayan nu tuan niyo no, owako ya lulubak oirosaan. Lobuw notaakan nu osuang, osuang-a uli'on nai so iyo, om lobuw pinongoorapan nu osuang, osuang-a uli'on nai so iyo,” koo.

Dii yo si Yisus su kopupinigan nu lobuw

⁴⁹ Mutongaro po si Yisus nu, “Tomod Ku yo po lumoga' nga popilai nu apui so pilolongkop nu wonuo tu, ono yo ukuman, om koinginan Ku, apui oono sumikit nu ono sono tu.

⁵⁰ Subai osonsara' Aku po laid so kayu salib, om sobana ko aagut inawo Ku no ong dai po kotalib ono.

⁵¹ Monokod kou gaam nu linumoga' Aku so wonuo tu mongowit nu kopusulutan. Okon ko kopusulutan, ala' nai' kopuolodan.

⁵² Kiat nu ono sono tu, bang kuwai limo koyuwan so sompungu, tolu koyuwan mongolawan nu duo no, intawa duo mongolawan nu tolu no.

⁵³ Dadan nosiro mualod. Amo no mongalod nu anak niyo kusoi-o, om anak kusoi-o lumawan nu amo no. Ino no mongalod nu anak niyo woinoi-o, om anak niyo woinoi-o lumawan nu ino no. Iwan mongalod nu anak kotakin, om anak kotakin lumawan nu iwan,” koo si Yisus.

Monondu' nu kogoyaan nu wonuo tu

⁵⁴ Mutongaro yo sono si Yisus so lobuw suang-i nu, “Bang kosiou kou nu mongitom so lidopan, tokodon muyu nu muran, om bana-bana ya nu muran.

⁵⁵ Om bang muos kiat so solatan, tokodon muyu nu muas, om bana-bana ya nu muas.

⁵⁶ Oo su lobuw ongo roraai! Koorati kou nu mongitom om uos, nga dai kou koorati nu ponondu'an nu ono sono tu,” koo si Yisus.

Musulut nu alod-alod

⁵⁷ Mutongaro po si Yisus nu, “Kopotutan-o po, kou yo su monantu so inawo muyu ong ombo su obana.

⁵⁸ Bang doowaan ko so pubisora'an, pokimusayu po laid so iyo nu dai po kologa' so pubisora'an, so' bang okon ko soko ono, owiton ko niyo so moongobisara' om nikomouli' ko nu moongobisara' no so pulis, om jiilon ko sono nu pulis-o.

⁵⁹ Mongaabar Aku so kou nu dai ko po kolabus so jiil oono, ong dai muyu po aawi' mongobarai utang muyu no,” koo si Yisus.