ཕི་ལིབ་པི། 2 - Tshangla New Testament (BSI)

ཁིརིས་ད་བུ་རང་ ཉམ་ཆུང་ཨོ་ཕེ་ཁེ༌ལེ།

¹ ཁིརིས་ག་གི་ཝ་ཨ་དེན་གེ་ སེམས་གསོ་ཏེ་ཉོང་ལ་སྨོ། ཉི་རོ་ཀ་སྙིང་རྗེ་གི་ སྐྱིད་པུ་ཉོང་ལ་སྨོ། ཐུགས་ཉིད་ཀབ་ཉི་ ཆོས་གྲོགས་ཏེ་ཨན་ཅ་སྨོ། ཉི་ན་ཧ་སེམས་ཀ་ བྱམས་པར་དང་ སྙིང་རྗེ་ཅ་སྨོ།

² ཉི་ལ་ ན་ཧ་སེམས་ཅིག་པ་རི་ཉི་ ཐུར་དང་ཐུར་ག་ སྙིང་རྗེ་ཀེ་ཉི་ ཉི་སེམས་དང་ དེན་ཐ་ཐུར་ཨན་ ལའི་ཨ་ཉི་ ཇང་གནམ་མེད་ས་མེད་ ཤོ་ནང་ཕེ་ཝ་ཅོད༌ཅོ།

³ རང་ཏེན་ག་དེན་གེ་ཤ་མི་ཉི་ ཧང་རང་མ་ཨའི། ཉི་རང་ཏེན་ ཆི་ལུ་རི་ལེ་གོད་ཉི་བུ་མ་ཨའི། དག་པ་ཀབ་ཉི་ ན་ཧ་བ་ ཉམ་ཆུང་རི་ཉི་ བཱརའ་སོ་ངོ་བ་ ན་ཧ་བ་ཀེ་དྲག་ཅ་དག་ཉི་མི།

⁴ ནའི་ནའི་ཏེན་ག་དེན་གེ་ཤ་ མ་གོད༌ཅོ། དག་པ་ཀབ་ཉི་ བཱརའ་སོ་ངོ་བ་ཀ་དེན་གེ་བུ་ གོད༌ཅོ།

⁵ ན་ཧ་སེམས་ཤོ་ ཁིརིས་ཡི་ཤུ་ག་ད་བུ་རང་ ཨོ་ཕེ་ཁེ༌ལེ།

⁶ རོག་རང་བཞིན་གེ་རང་ དཀོན་མཆོག་གི་ནེ་བུ་ དཀོན་མཆོག་ཀབ་ཉི་ དོ་ལུ་ཨ་ཉི་ བཞུགས་པེ་མ་གོད་ཁཱན་ཁེ་པ་ ཧ་གོ་ལེ་ཁེ་ཝ་ག་ ཆཱས་གི༌ལ།

⁷ ལག་ཏང་ རོ་ཀི་རོག་ཏེན་ ཧང་རང་མ་ཝ་ཅོད་ཐཱན་ ཉམ་ཆུང་གཡོག་པ་ཨ་ཉི་ སོ་ངོ་རི་ཉི་བྱོན༌མ།

⁸ ཉི་སོ་ངོ་རི་ཉི་བྱོན་དེན་གེ་ ཉམ་ཆུང་ཨ་ཉི་ ཤི་སྲོག་སག་པུ་བུ་ བཀའ་འགྲུབ་ཉི་ ཁྲིམས་ཤིང་ཐུང་ཀ་ གཤགས་ཉི་གནང༌མ།

⁹ ཨོ་ཉི་ཨ་དེན་གེ་ དཀོན་མཆོག་གི་ རོག་ཐམས་ཅན་གེ་ ག་དུང་ཐཱན་ བཱརའ་མིང་ཐམས་ཅན་གེ་ རོ་ཀ་མཚན་ཆི་ལུ་ཅོད་ཉི་གནང་མ༌ཅ།

¹⁰ ཉི་ཞིང་ཁམས་དག་པེ་མ་ཝ་ འཛམ་གླིང་དག་པེ་མ་ཝ་ ཉི་འཛམ་གླིང་ཕརའ་ཁ་དག་པེ་མ་ཝ་ ཐམས་ཅན་གི་ ཡི་ཤུ་ག་མཚན་ག་ ཏོང་ཟིང་ཏེས་པེ་ཁེ༌ལེ།

¹¹ ཉི་ཡབ་དཀོན་མཆོག་ག་ གཟི་བརྗིད་ག་དེན་གེ་ ནོ་ཝང་ཐམས་ཅན་གི་ ཡི་ཤུ་ཁིརིས་ཁེ་པ་ གཙོ་བོ་ཨ་ཉི་ཁ་དོག་པེ་ཁེ༌ལེ༎

འཛམ་གླིང་ག་འོད་ཟེར་རི་ཉི་ ཤར་བེ་ག།

¹² ཇི་གི་ཕང་ཁཱན་ཇ་རོ་བ་ ཇི་གི་ཡེག་པ་ཀབ་ཉི་ ན་ཤི་ཧ་ལ་ཨ་ནེ་བུ་ ན་ཝ་དང་ཏུ་ཉི་ ཇང་ན་ཧ་པོང་ཀ་ ཆོ་ལ་ཀབ་ཉི་ཤ་ མང་གི་ཝ་ ཨོ་མ་ཇང་ ན་ཧ་བ་ཀབ་ཉི་ མ་ལཱན་ཆོ་ལ་ཀབ་ཉི་ཏ་ ལག་ཏང་ མང་པུ་ཨ་ཉི་ ན་ཧ་ཐར་པ་ག་དེན་གེ་ ཡོང་ཁེ་ཉི་ ཁང་ནེང་ནེང་ཨ་ཝ་ ལའི་ཨ་ཉི་རང་ཆོ་ལེ་ཁེ༌ལེ།

¹³ ཧང་ཡ་དག་ནེ་ལ་ རོ་ཀ་དེན་ཐ་ལེག་པུ་ཁེ་པ་ ཨ་ལེ་ག་སེམས་དང་ ཨ་ལེ་རེ་བ་ག་ཤུག་ གནང་མེ་དེན་གེ་ དཀོན་མཆོག་གི་ ན་ཧ་བར་ཀ་ ཕྱག་ལཱ་གནང་མེ་གང༌ཅ།

¹⁴ ལའི་ཧང་རང་ཨ་ནེ་བུ་ བེརེག་ཏོང་མ་ཇིག་པཱན་ ཉི་དྲི་ཝ་མ་ཇི་མཱན་ཨའི།

¹⁵ ཧང་ཡ་དག་ནེ་ལ་ ན་ཧ་བ་ སོ་ངོ་དྲང་པུ་མ་ཁཱན་དང་ སྡིག་ཅན་བ་ཀ་པོང་ཀ་ཆོན་ཅ་ཨ་ཉི་ ཅོན་ད་སུ་རང་གོད་པེ་མར་ཁཱན་ ཙང་མ་དང་ཅོན་མ་ཁཱན་ དཀོན་མཆོག་ག་ སྲས་སྲས་མོ་རིན་ཆེན་ ཉི་ངབ་ཀ་ཤར་ཁཱན་ སྐར་མ་སྨིན་དྲུག་བ་ད་བུ་ ན་ཤི་རོག་ཏེ་བ་ཀ་པོང་ཀ་ཤར་ཤོ།

¹⁶ ཁིརིས་ག་ནོང་ཀ་ ཇི་གི་བང་ཇུག་ཁཱན་དང་ ལའི་ཨ་ཁཱན་ཁེ་པ་ བ་ཏོང་མ་དི་ཝ་ལ་དག་སེ་ཉི་ ཇང་ངལ་རངས་པེ་དེན་གེ་ ཚེ་ག་གསུང་ཁེ་པ་ ཏེབ་ཀེན་ཨ་ཉི་ཙུང་ཤོ།

¹⁷ ན་ཧ་དད་པ་གེ་ཨ་ཉི་ ཕུལ་ཁཱན་མཆོད་པ་ག་ཐུང་ཀ་ ཇ་ག་ཚེ་ཆང་ མཆོད་པ་ཨ་ཉི་ ཕུལ་བེ་ཁེ་ནེ་བུ་ ཇང་ངལ་རངས་ཉི་ ཉི་ན་ཧ་བ་ཀབ་ཉི་ ཤོ་ནང་ཕེ་ཉི་ཆོ༌ལེ།

¹⁸ ཨུ་ཉུ་པུརུས་ཀིན་ཨ་ཉི་ ན་ཧ་བ་བུ་ ངལ་རངས་ཉི་ ཉི་ཇང་ཀབ་ཉི་ ཤོ་ནང་ཕེ་ཉི་ཆོ་ལེ་ཁེ༌ལེ༎

ཏི་མོ་ཐི་དང་ ཨི་པ་ཕོ་དྲི་ཏྲས་

¹⁹ གཙོ་བོ་ཡི་ཤུ་ག་ ཐུགས་བཞེད་ཆོ་ནེ་ལ་ ན་ཧ་ཚང་ན་ཐ་ཉི་ ཇང་ཤོ་ནང་ཕེ་ལེ་དེན་གེ་ དོ་ཟོ་རང་ ཇི་གི་ཏི་མོ་ཐི་ ནའི་ཆོ་ས་ག་ ཀུན་ཏི་ལེ་ག་ རེ་ཆ་ཨ་ཝ༌ཅ།

²⁰ ན་ཧ་བ་ལེག་པུ་ཅོད་པེ་དེན་གེ་ གནམ་མེད་ས་མེད་ སྡུག་བསྔལ་བང་ཁཱན་ ཏི་མོ་ཐི་ད་བུ་ བཱརའ་ཨི་བི་རང་ ཇང་ཀབ་ཉི་མཱན༌ཅ།

²¹ བཱརའ་ཐམས་ཅན་གི་ རོག་ཏེ་བ་ཀ་དེན་གེ་ཤ་ ཨ་ལེ་གོད༌ཅ། དག་པ་ཀབ་ཉི་ ཡི་ཤུ་ཁིརིས་ག་དེན་གེ་ གོད་པུ་མཱན༌ཅ།

²² དག་པ་ཀབ་ཉི་ ཟ་གི་ཨ་པ་ག་ ཨ་ཝ་ད་བུ་རང་ ཏི་མོ་ཐི་གི་ འཐེན་ལེག་པུ་བཤད་པེ་ག་ ཇ་ག་རུམ་ཉི་ རོག་རོག་ཏེན་ག་ཀོར་གེ་ ཧང་ཏེན་ཁུངས་ཀེ་བ་གི་ལ་སྨོ་ ན་ཤི་སེན༌ཅ།

²³ ཐ་ ཇ་ག་ཐུང་ཀ་ ཧང་ཇུང་མེ་གི་ལ་སྨོ་ སེ་ཝ་ཐུར་ག་རང་ ཇི་གི་རོག་ ན་ཧ་བཱརང་ཀ་ ཀུན་ཏི་ལེ་དག་ཉི་ མི་ཝ༌ཅ།

²⁴ ཇང་ཇང་ཏེན་བུ་ དོ་ཟོ་རང་ ན་ཧ་བཱརང་ཀ་ ཨོ་ཕེ་རེ་བེ་དག་ཉི་ ཇི་གི་གཙོ་བོ་ག་ ལོ་ཏེན་མ༌ཅ།

²⁵ ཨི་པ་ཕོ་དྲི་ཏྲས་ ན་ཧ་བཱརང་ཀ་ལོག་ཉི་ ཀུན་ཏི་ལེ་ག་ ཁག་ཆི་ལུ་གི་ལ་དག་ཉི་ ཇི་གི་མི་ཝ༌ཅ། རོག་ཤོ་ ཇ་ག་ཀོ་ཏ་ ཉི་ཇ་ག་ལའི་རུམ་ཁཱན་ ལའི་པ་དང་ ཇང་ཀབ་ཉི་དམག་མི་ནང་ཀ༌ཅ། ཉི་ཇང་ཚཱས་པ་ཀབ་ཉི་ རུམ་ཅེན་དག་པ་གི་ ན་ཤི་ཀུན་ཏི་ཁཱན་ ན་ཧ་འཐེན་པ་བུ་གི༌ལ།

²⁶ རོག་ན་ཧ་བ་རུ་མེ་ག་ སེམས་ཨ་ཝ༌ཅ། ཉི་ན་ཤི་ རོག་མར་བ་ཅ་དག་ཉི་ སེ་ཝ་ཨ་དེན་གེ་ རོག་གནམ་མེད་ས་མེད་ སྡུག་བསྔལ་ཁེ་ཝ༌ཅ།

²⁷ དེན་པ་རང་ རོག་མར་བ་ཆོ༌ཝ། ཉི་རོག་ ཤི་ལེ་རང་ཅམ༌པ། དག་པ་ཀབ་ཉི་ དཀོན་མཆོག་གི་ རོ་ཀ་ཏཱན་ སྐྱིད་སྡུག་གཟིགས་ཉི་གནང༌མ། གོ་མ་གེ་རང་ ཁོ་དང་ཆཱད་པ་ཐུང་ཀ་ ཨོམ་ཆང་རང་ ཁོ་དང་མ་ཆཱད་ཆེན་དག་པ་གི་ དཀོན་མཆོག་གི་ རོ་ཀ་ཤ་མང་གི་ཝ་ ཇ་ག་བུ་ སྐྱིད་སྡུག་གཟིགས་ཉི་གནང༌མ།

²⁸ ཨོ་ཉི་ཨ་དེན་གེ་ ཇི་གི་རོག་ ན་ཧ་བཱརང་ཀ་ ཀུན་ཏི་ལེ་ག་སེམས་ གནམ་མེད་ས་མེད་ ཨ་ཝ༌ཅ། ཧང་ཡ་དག་ནེ་ལ་ རོག་རུ་མ་ཀབ་ཉི་ ན་ཧ་བ་ ཤོ་ནང་ཕེ་ལེ་དག་ཉི་ ཇི་གི་སེན༌ཅ། ཉི་ཨུ་ཉུ་གི་ ཇ་ག་སྡུག་བསྔལ་ཉུང་པུ་ཅོད༌པེ།

²⁹ ཨོ་ཉི་ཨ་དེན་གེ་ གཙོ་བོ་ག་མཚན་ག་ གནམ་མེད་ས་མེད་ ཤོ་ནང་ཕེ་ཉི་ རོ་ཀ་འབྱོན་པར་ལེགས་སོ་ཨའི། ཉི་ཨུ་ཉུ་ད་བུ་སོ་ངོ་ག་ གུས་ཞབས་ཨའི།

³⁰ ཧང་ཡ་དག་ནེ་ལ་ ཁིརིས་ག་ལའི་ག་ཡོར་ཀེ་ རོག་ཤི་ལེ་རང་ཅམ༌པ། ཉི་ན་ཧ་ཚབ་ཀ་ རོ་ཀི་ཇ་ག་ ཇ་རོ་ཨན་ཅ་ཨ་ཉི་ རོ་ཀ་ཚེ་ གནམ་མེད་ས་མེད་ ཀ་ལུ་ཏཱད༌པ༎