कुलुसिऔं 2 - बुक्सा1 मैं चाँहौ हौं कै तुमकै जौ बात पतो चल जाय कै मैं तुमरे ताँई और लौदीकिया के बिसवासी लोगौ के ताँई और उन सबई लोगौ के ताँई जिनौनै मैंकै कबी देखोई ना है, कैसी मैहनत कर रओ हौं। 2 जिस्सै उनके मनौ मै सान्ति होए और बे पियार की एकता के संग आपस मै बंधे रैंह, और बे पूरी समज को सैरो धन पाकै परमेसर के गुप्त बात कै, मतलब मसी कै पैचान लैं, 3 जिसमै समज और गियान को पूरो भन्डार लुको भओ है। 4 मैं ऐंसो इसताँई कैरओ हौं कै कोई आदमी तुमकै मीठी मीठी बातौं सै धोको ना दे दै। 5 मैं अबी तुमसै भौत दूर हौं पर दिल सै तुम लोगौ के संग हौं और मैंकै जौ बात सुनकै भौत खुसी होवै है कै, तुम अपनी जिन्दगी मै नियम सै चल रए हौ और तुमरो बिसवास मसी मै पक्को है। झूँटे सिकानै बारौ सै बचे रौह 6 इसताँई जैसो तुम ईसु मसी कै परभु मानौ हौ, बैसेई बामै बने रौह। 7 और बाई मै तुम गैहराई सै जड़ पकड़ौ और बढ़ते जाऔ और जैसो तुमकै सिकाओ है बैसेई बिसवास मै मजबूत होते जाऔ, और परमेसर को जादा सै जादा धन्नबाद करते रौह। 8 चौकस रौह, कहीं ऐंसो ना होए कै तुमकै आदमी को गियान, झूँटी और बेकार की बातौं सै कोई अपने कबजा मै ना कर लै, जो आदमिऔ और दुनिया के बनाए भए रीती रिबाज के ऊपर टिके हैं, पर मसी की सिक्छा ऐंसी ना है। 9 कैसेकै मसी के सरीर मै परमेसर पूरी तरै सै बसो भओ है। 10 और तुम मसी मै भरपूर हो गए हौ, कैसेकै बौ सिगरे राजाऔं और अधकारिऔं के ऊपर राज करै है। 11 और बाई मै तुमरो खतना बी भओ है, बौ खतना आदमी को ना है, बौ तौ मसी को है जिसके दुआरा पाप बारो सरीर लिकारकै फैंक दओ जावै है। 12 तुम लोग जल संस्कार के बखत मसी के संग गाड़े गए और बाईके संग फिर सै जिन्दे बी करे गए। कैसेकै तुमनै परमेसर की सकति मै बिसवास करो है, जिसनै बाकै मरे भएऔं मै सै फिर सै जिन्दो करो है। 13 तुम लोग पापौं की बजै सै और बगैर खतना के मर गए हे, पर परमेसर नै तुमकै मसी के संग फिर सै जिन्दो करो है और हमरे सिगरे पापौं कै माफ बी करो है। 14 बे नियम की बात जो हमरे बिरोद मै लिखी गई हीं, बानै कुरूस की कीलौं कै ठौंक कै मिटा दंई। 15 बानै आसमान के बुरे सासकौं और अधकारिऔं को हक छीन लओ और सबके सामने उनकी मजाक बनाई और कुरूस के दुआरा उनकै हरा दओ। 16 इसताँई तुमरे खानै पीनै, या तौहारौ, या नए चाँद के तौहार, या आराम कन्नै बारे दिनौ कै लेकै तुमरो कोई फैसला ना करै। 17 जे तौ आनै बारी बातौं की छाँई हैं, पर पक्की सच्चाई मसी है। 18 कोई बी आदमी अपनी झूँटी दीनता सै या सुरगदूतौं की पूजा करबाकै तुमरे ईनाम कै ना लूट सकै है, ऐंसो आदमी देखी भई बातौं के पिच्छे लगो रैहबै है और अपने पाप बारी सोच के ऊपर बिना बजै के घमंड करै है। 19 और बे खुद कै मसी के आधीन रखनो ना चाँहै हैं, जो मुखिया हैं। मसी बौ अंग है जो सरीर कै सकति देवै और जोड़ौ कै और नसौ कै बिनकै अग्गे बढ़ाबै है और जौ सबई कुछ परमेसर की सकति सै होवै है। 20 कैसेकै तुम मसी के संग मर चुके हौ और तुमकै दुनिया के रीती रिबाज सै छुटकारो दिब्बाओ जा चुको है। तौ तुम ऐंसो बरताब काए करौ हौ, जैसे कै तुम जा दुनिया के हौ? और ऐंसे रीती रिबाजौ कै मानौ हौ जैसे कै, 21 “जाकै हात मत लगाऔ, जाकै चाखौ मत, जाकै छूँऔ मत?” 22 जे सबई आदमी की आगियाँ और सिक्छा के हिसाब सै बनाए भए रीती रिबाज है और जे काम मै आते आते नास हो जांगे। 23 जे नियम देखनै मै गियान बारे लगै हैं पर इनमै भक्ति कन्नै को दिखाबो, झूँटी दीनता और सरीर कै कसट दैनै को रिबाज है। जे सबई बात सरीर की बुरी इच्छाऔं कै ना रोक सकै हैं। |
New Life Compute Institute [NLCI] - CC BY-NC-ND 4.0