छेम-ल्वा
पावलका ओराम सेलाखाजेम यूरोपडाम फिलिप्पी शहरडा बाट्पा ङादोम मण्डलीलाई र्याक्तु़म बाइडा। फिलिप्पी ने माकेडोनिया र्वाक्मा रोमीडाम ङा कोले शहर बाइडा। ओराम सेलाखाजेम र्याक्तु़लो पावल झ्यालखानगोडा ङा बाइडा, मा कोङनिम थो़रलु़पामिमका पावलकु कोर्थो़लाम जेम्डिमा उमा न नो़बेट्मिडिम बाइडा। मेकोतिलो फिलिप्पी मण्डलीडा लिमा सीसिमिम थो़बेत्तोङा बेम्डी। मेम्मिमका गु छो़म उमा दु़खा लुक्पा बाइडा। लावो पावलका ख्रीष्टडा थो़र बु़डु़मका उमा त्वारो़मडा गेर्सी नुङ न भ्रसी बर्डाम बु र्वाक्पा ल्वा ओराम खाजेमडा डार्सी।
ओराम सेलाखाजेम र्यामु बासिक्पा खोत्लेडाम डोक्पु ल्वा ने फिलिप्पीडाम थो़रलु़पामिमलाई आलासो़ र्वामु बासिक्पा बाइडा। मेर्मिमका पावललाई खेरेला दु़स्ताम थारीका गुलाई ख्लो़म्डिम बाइडा। गुका मेर्मिमलाई आला र्वाक्ताम थारीका ङा उ त्वाप नुङ मेर्मिमगोडा रोक्पा दु़खा थारीका वो सो-हन्बेन्मु मा थो़रलु़बेन्मु लागि ओराम सेलाखाजेम र्याक्तु़म सो़। मेर्मिमका उनी नसीहोम बोमु नुङ डोक्पु लिसिमुडाम ने येशू ख्रीष्टडा याक्के दु़म्मु सीसिमिनु़ र्वाक्साका लु़म्ला बेडु़मी। ख्रीष्टडा बाट्पा मेर्मिमकु त्वारो़म ने माम्चु़नीकु दिदाम सो़। ओराम मेर्मिमका यहूदी डु़म्ला मानेबेम्डिमका ल्वाम्डिम मेएँ, लावो मेर्मिमकु थो़रलु़सीलामका र्वाक्साका रेम्बु़। ख्रीष्टलाम त्वारो़म ल्वापामिमका माम्चु़नीलाममिम गेर्सी नुङ न-भ्रसी ल्वामी र्वाक्पा ल्वाकु दुथाम पावलका र्याक्तु़म बु।
ओराम सेलाखाजेमका त्वारो़मडा ल्वासिक्पा गेर्सी, थो़रलु़सी, दु़साका बुमु नुङ हेल्लो लोवो माम्चु़नीकु खारी बोमुम बुमु र्वाक्पा दुथाम जो़होमका र्याक्तु़म बु। ओराम सेलाखाजेमडा पावलका फिलिप्पी मण्डलीलाई हाङको रिखाम बु़थाल्लु़मी मेराम वो आसिन्डा रेम्बु़डु़म बु।
र्याक्मा ल्वामिम
छेम-ल्वा १:१-११
पावलका उमा त्वाकु दुथाम र्याक्तु़म १:१२-२६
ख्रीष्टडाम त्वारो़म १:२७–२:१८
तिमोथी नुङ इपाफ्रोडिटसकु दुथाम २:१९-३०
कोर्थो़लाम बक्पामिम नुङ ङिमलु़पा थारीडाम वाङ दु़म्पा ल्वाकु ङिमसासी ३:१–४:९
फिलिप्पी
