फिलिप्पी 4 - थुलुङ राई1 मेम्मिमका वा-ल्वाकनी, ङाचो़डा थो़र बेनिम बानी। द्वादीबुङ ङोप्सो़नी, गो गानीलाई रिखाम बोनिनी मा क्रो़म्मु न बु। गानी ने आमा भ्रसी नुङ आमा मुकुट सो़। सो हन्बेसाक्सी 2 इयोदिया नुङ सुन्तुखे, गो गाचीलाई छो़म र्वाङु, ङाचो़ येशूडा दु़चिमा बाची। 3 थो़रलु़इमिम ङोप्सो़, ओर्चिप मेसेमलाई दु़मु ख्लो़याची र्वाक्साका गो गानालाई छो़म र्वाङु, हेङालोने जो़पा-सेला थो़बेन्मुडा ओर्चिपका गोनुङ मेझापातो खारीमिम बेच्चिम बु। ओर्चिपका क्लेमेसनुङ दु़म्साका मा गोनुङ खारी बेपा वाङमिम, उहेममिमकु नङ त्वारो़मकु खाजेमडा र्यास्ताम बु, मेर्मिमनुङ दु़म्साका वो खारी बेच्चिम बु। 4 ङाचो़ येशूडा हेल्लो लोवो भ्रन्सिट्नी। आथावो गो र्वाङु, भ्रन्सिट्नी। 5 इनीमा जो़पा बासी-दोसी खोत्ले मु़चु़का ल्वामिनु़। ङाचो़ योमुङा खाप्मी। 6 हामकाम वो मिम्ताम-सो़र्ताम मेबेनी, लावो खोत्लेडा सो़म्दी नुङ येप्सीका मा गुमीलाई आलासो़ ग्वाक्तो माम्चु़नीकाडा गानी बिनी। 7 मेम्मा खोत्ले थेसिथेन्मुडाम वो डोक्पु माम्चु़नीकु न भ्रसी बेसीका ख्रीष्ट येशूडा इनीमा न नुङ गो बोमी-थार्मी। 8 हुम-दडा, वा-ल्वाकनी, जो़पा नुङ कोमुका घ्रेट्पा ल्वामिम इनीमा नडा मिम्नी। मेर्मिम ल्वा: आच्छाङाकाम, डोक्पु मिम्मुका घ्रेट्पा, माम्चु़नीकु मिक्सीलामडा जो़पा, सेपा, द्वादीबुङ, सो़मुका घ्रेट्पा। 9 गानी हाम ल्वा गोलामका सीन्सिट्नी, रन्नी, थो़न्नी मा आमाडा ल्वान्नी मेङा बेनी। मेम्मा न-भ्रसिबेट्पा माम्चु़नी गानीनुङ दु़म्मी। पावललाई ग्वाम्डिम ग्वा-ग्वाकु दुथाम गु आला-तोमानुङमा दु़स्ताम 10 गानी हापा चङडा आथावो आमा मिम्ताम बेन्निमका ङाचो़ येशूडा गो छो़म भ्रङसिङु। आच्छाङा, ङादो वो गानी आमा दुथाम हेल्लो लोवो मिम्ताम बेन्निम ङा बान्नी, लावो गोलाई ख्लो़मु जो़पा थारी मेडार्निवा। 11 गोलाई चाइदु़स्ता र्वाक्साका आरे र्वाङुमिम मेएँ, हेङालोने हेप्माम थारीमिमडा लोवो गो तिम्सिमु गो सीसिङ्डोम बु। 12 मेलिट्पाडा हेसाका बुमु बासी मा लिट्पाडा हेसाका बुमु बासी र्वाक्पा गो चक्पु। ख्वाचेप कोदोडा दु़म्नु़का क्रु़मडा, लिट्पाडा दु़म्नु़का मेबासीडा, खोत्ले थारीडा गो तिम्सिमुमा हेसाका बुमु बासी गो सीसिङ्डोम बु। 13 गो ख्रीष्टका ग्वाङडिमिम यु़मका ओराम खोत्ले ल्वा बोमु चापु। 14 मेम्मा वो गानी गोलाई आमा दु़खाडा ख्लो़ङ्डिनी, मेराम जो़पा दु़स्ता। 15 गानी फिलिप्पीडाम मु़चु़का वो चनिमिम बु, ङादो गो गानीलाई जो़पा-सेला थो़बेट्निनिम बिलि मा इनीमा नेब्दी माकेडोनिया डिट्जो़ल्तोमा लङडोलो आमा खेरे-खेरेडा ख्लो़पा गानीडाम वाङमिम कोले मण्डली मेबायावा। 16 गो थेसलोनिके शहरडा बाङडोलो वो गोलाई चाइदु़स्ताम बाइडालो गोलाई ख्लो़मु नकखेप थु़र्निम बाइडा। 17 गो ख्लो़ला सो़सिमु मालुमिम मेएँ, लावो गानी ग्वानिमका माम्चु़नीलाम ल्वानिमिम इनीमा पुरस्कार काम्सिक्तो लनु़ र्वाक्पा आमा न बु। 18 गोलाई चाइदु़म्पाडाम वो हापा ल्वाउतोम बु, गो लिट्पा बुङु। गानी इपाफ्रोडिटसकाडा थु़र्निम ख्लो़सीमिम डार्तो। मेर्मिम ने माम्चु़नीका रमिमिम मा मेराम ने गुमीलाई गेर्सिबेट्पा भ्रपा नेम्पा ग्वा-ग्वा होप्माम बु। 19 आमा माम्चु़नीका र्वामु मेझापा उनीमा खाप्चीलामका गानी चाहे बोनिमिम खोत्ले ख्रीष्ट येशूडा ग्वानिमी। 20 इकीमा माम्चु़नी नुङ पापकाम नङ हेल्लो लोवो डोक्पु दु़म्नु़म बुनु़। आमेन। पावलकु चक्थो़म सेव 21 ख्रीष्ट येशूडा बाट्पा खोत्ले सेपा मु़चु़मिमलाई सेव र्वाङसाङनी। आसिन्डा गोनुङ बाट्पा थो़र लु़पामिमका वो सेव र्वाम्डिम बु। 22 खोत्ले सेपा मु़चु़मिमका, मेगोडाम रोमी हप कैसरकु नेमडाममिमका वो, गानीलाई सेव र्वाम्डिम बु। 23 ङाचो़ येशू ख्रीष्टकु दिदाम गानी खोत्लेनुङ दु़म्नु़। आमेन। |
© Wycliffe Bible Translators, Inc. All rights reserved.
Wycliffe Bible Translators, Inc.