फिलिप्पी 3 - थुलुङ राईख्रीष्टलाई ल्वामु ने खोत्लेडाम हापा थिकाम 1 हुम-दडा, आमा वा-ल्वाकनी, ङाचो़ येशूडा गेर्सी द्वाक्नी। गो ङादो र्याक्तोम ल्वा आथावो गानीलाई र्यामु गो मेघ्रु़म्ङु, मा मेराम ल्वा ने गानीलाई बोपा-थार्पा सो़। 2 मेजो़पा खारी बेपामिम, मा सेल्सिमु लागि मिरो़मडा कोक्ते क्रिम्मु बासी र्वाक्पा ख्लेबामिमडाम चङचङया बानी वो! 3 हेङालोने माम्चु़नी-पेललाम सो़रलोले बेपा, येशू ख्रीष्टडा नो़ डोक्पु बेपा मा मु़चु़कु बेसी-दोसीडा थो़र मेलु़पा गुइङा आच्छाङा कोक्ते खिरिरि क्रिप्मा माम्चु़नीकु मु़चु़ सो़। 4 मेम्मा वो गोनुङ ने आरेप्माम नो़ डोक्पु बेपा ल्वामिम बु। कोङनिमका त्वाकु बेसी-दोसीडा नो़ डोक्पु बेपा ल्वामिम बु र्वाक्पा मिम्सी माला मेरामकामडाम वो हापा गोनुङ बुमी: 5 गो लेतलेम नेमकाम बाङडोलो आमा कोक्ते खिरिरि क्रिप्सी दु़स्ताम। गो इस्राएलीमिमगोडाम बेन्यामिन दोचो़लाममिम। गो आच्छाङाम हिब्रू, हेङालोने आमा मामपाप हिब्रू सो़। डु़म्लाकु दुथाम र्वाकी माला गो मेरामडा जो़मका दोपा कोले फरिसी, 6 माम्चु़नीकु लाले-पाङके बोमु नकु फेसिलोक्पाकु दुथाम र्वाकी माला येशूडा थो़र लु़पामिमकु थो़मतेर्साक्तोमिम, डु़म्ला होम्साका जो़पा दु़म्सीडा र्वाकी माला मेख्लो़साका मेराम होम्साका दोङडोम। 7 लावो आमा लागि मे हा-हाम छो़म जो़पा मिम्तोम बाइडा, ओम्लो ख्रीष्टकाम लागि मेराम ने हाम ना हामकाम लु़ङु। 8 मेकोति कोङङा मेएँ, ख्रीष्ट येशू आमा ङाचो़लाई छेत्तोमका हापा थिकाम ल्वानुङ थो़प्सीडा खोत्ले ल्वा हाम वो मेएँ र्वाक्पा लु़ङु। ख्रीष्टलाई गो ल्वाउनु़ मा गो गुमीनुङ दु़म्ङुनु़ र्वाक्साका खोत्ले ल्वा हाम ना हामकाम दु़म्बेत्तो मा मेर्मिम ने पारिमिम घ्राम्लु़पा कोतिम लु़ङु। 9 गो माम्चु़नीडा जो़पा दु़म्मु ने डु़म्ला होम्साका दोसाका मेएँ, लावो ख्रीष्टडलाम थो़रका जो़पा दु़म्ङु। माम्चु़नीडा जो़पा दु़म्सी ने गुमीलामका रो मा ओराम खारी थो़रलामका दु़म। 10 ख्रीष्टलाई नुङ सिमुलाम गुमीलाई फक्पा यु़मलाई गो जो़होमका छेमु न बु। गुमीका ल्वाम्डिम होङङा दु़खा ल्वामु मा उनी साम लक्सीडा गुमी होङङा दु़म्मु न बु, 11 मेम्साका सिमुलाम हेसाका लोवो गो बङुनु़ र्वाक्पा आमा न बु। डार्मु न बेम्मा ल्वाथो़ किसिसी 12 ओर्मिम खोत्ले गो ल्वामु दु़म्तोम बु डे, जो़पा दु़म्मु दु़म्ङोडोम बु र्वाक्साका ने मेएँ, लावो मेर्मिम ल्वा जेन्मु लागि आमा सो हन, उहेम ल्वाकाम लागि ख्रीष्ट येशूका गोलाई जेट्ङिडिमी। 13 वा-ल्वाकनी, ओर्मिम जेन्मु डु़म्तोम बु र्वाक्पा गो आ त्वापलाई लु़डाम मिबु। लावो कोले ल्वा गो बेउ, मेराम चङनोम ल्वा प्ल्वासाका ङादोनोम ल्वाथो़ आमा सो हन। 14 गो पुरस्कार घ्ल्वामु लागि मेरामथो़ उन्सिङु। मेरामकाम लागि ख्रीष्ट येशूडा माम्चु़नीका पाह्रीला येट्ङिडिमिम बु। 15 थो़रलु़सीडा गुइ डोक्पुमिम खोत्ले ने ओर्मिमकु दुथाम आरेसाका न जु़ल्मु बासी। कोङनिम ल्वाडा गानी वाङङा मिम्निम बु माला माम्चु़नीका गानीलाई जो़होमका थेसिथेन्बेनिमी। 16 हाम लोवो, आथावो गुइ बान्ते रोक्फाड्डिम, मेराम होङ्ङा बेसी-दोसीडा बोमुम बुमु बासी। 17 वा-ल्वाकनी, गो बेउमिम होप्माङा बेपा मु़चु़ दु़म्नी। मेम्मा गुकु गानीलाई ग्वाक्तोकोम आकी बेसी होङङा बेपामिमलामका सीन्सिट्नी। 18 ङादो गो गानीनुङ सो़उथाल्तो मा ओम्लो वो प्ल आल्तो र्वाङु, हापा मु़चु़मिम ख्रीष्टकु क्रूसकाम स्वाक्चिमो होङङा बुमी-दोमी। 19 मेर्मिमकु लखोप ने पुयु़लुक्पाथो़, मेर्मिमकु मिरो़मका हाम मालु़ मेराम होम्साका बुमी-दोमी, मा मेर्मिम उनी क्रो़मलु़मु बासिक्पा ल्वाडा डोक्पु लिम्सिमी। मेर्मिमकु न सुबुडा बाट्पा ल्वामिमडा बु। 20 लावो इकीमा नेब्दी ने पाह्रीला सो़। मेलामका योक्पा गुइलाई सेल्पा ङाचो़ येशू ख्रीष्टलाई गुइ छो़मका लथाडिमिम बु। 21 गुमीनुङ खोत्लेलाई उनीमा ल्वाडा जु़ल्मु यु़म बु। मेराम यु़मका इकीमा सिपा मिरो़म उनीमा झ्वाक्पा मिरो़म होप्माम दु़म्नु़ र्वाक्साका गुमीका ख्लोक्साक्सामी। |
© Wycliffe Bible Translators, Inc. All rights reserved.
Wycliffe Bible Translators, Inc.