फिलिप्पी 2 - थुलुङ राईख्रीष्ट याक्के दु़म्मिडिम 1 ख्रीष्ट नुङ कोले दु़म्निमका इनीमा सोहन्पा बु। उनीमा रिखामका न बन्सिक्पा बुनी, माम्चु़नी-पेलनुङ हेमकेमडा बुनी, द्वामसिमु नुङ नाम्नाम्चो़ लु़निमिमका, 2 गानी कोलेङा नकाम दु़म्साका, मेमकाङा रिखाम बेबेसाका, कोले थो़मकाम दु़म्साका, नुङ बेपा न कोलेङा दु़म्साका हापा गेर्सिबेट्ङिनी। 3 त्वाप कोङङा जो़पा दु़म्मु माल्पा मा डोक्पु लिसिक्पा नका हाम वो मेबेनी। लावो इनी त्वाप-त्वाप गोडा याक्के दु़म्नी मा वाङमिमलाई इनी त्वापडाम जो़पा लु़नी। 4 गानी खोत्लेका त्वापलाई नु़पा कोङङा मेमाल्नी, लावो वाङमिमलाई नु़पा वो माल्नी। 5 ख्रीष्ट येशूकाम होप्मामङा इनीमा न दु़म्मु बासी। 6 गुमी आच्छाङा माम्चु़नी बाम्डी, लावो माम्चु़नी कोतिमङा दु़म्मु मेमाल्मिवा, 7 गुमीका खोत्ले ङेट्मिडी, डु़ल्चो़ होप्माम दु़म्मिडी मा मु़चु़ दु़म्साका गम्डी, 8 गुमी मु़चु़ दु़म्साका उनी त्वापलाई याक्के दु़म्बेट्मिडी, मा क्रूसडला सिम्डिमसम्मङा माम्चु़नीका र्वाम्डिम होम्साका बेम्डी। 9 मेम्मिमका माम्चु़नीका गुमीलाई खोत्लेडाम येपाला कोम्डी, मा गुमीलाई खोत्लेडाम गेलेम नङ ग्वाम्डी, 10 मेम्साका पाह्रीला, सुबुडा मा सुबुकु गोयु़ बाट्पामिम खोत्लेका येशूकु नङडा क्रचु़खुम बोमु बासी, 11 मा माम्चु़नी पापकु नङ डोक्पु बोमु येशू ख्रीष्टङा ङाचो़ र्वाक्साका खोत्लेका र्वामी। सोरलुङ होङका झ्वाक्नी 12 मेम्मिमका आमा द्वादीबुङ वा-ल्वाकनी, माम्चु़नीका र्वाम्डिम होम्साका हेल्लो लोवो बोनिमिम होङङा गो गानीनुङ बाङडोलो कोङङा मेएँ, लावो गानीनुङ मेबुङुलो वो सेल्सिमु ल्वान्निम मु़चु़ दु़म्निमा माम्चु़नीडा ङिम जु़ल्साका गुमीका र्वाम्डिम होम्साका आथावो छो़म बेनी। 13 हेङालोने गानी गुमीलाई गेर्सिबेट्पा खारी बोमु चापा नुङ बोमु माल्पा दु़म्बेन्मु लागि माम्चु़नीकाङा गानीगोडा खारी बेत्तोङा लेन्मी। 14 सु़म्बुर्मा मेकिसाका नुङ कुमेबेसाका खोत्ले खारी बेनी। 15 मेम्साका गानी मुमा मेबेडिमिम नुङ आच्छाङाकाम दु़म्साका थो़र मेलु़इमिम नुङ मेजो़पा मु़चु़मिम गोडा मेख्लो़ट्पा माम्चु़नीकु चो़ दु़म्नी। मेर्मिम मु़चु़ गोडा गानी सु़म्दिसेरडा झ्वाक्पा सोरलुङ होङका झ्वानी। 16 त्वारो़म ग्वाक्पा सिजेम जेन्थाट्नी। मेम्मा गो ओन्ङोडोम नुङ ब्राम्दु़ल्वा बेउतोम मेडेङा मेदु़प्सावा र्वाक्साका ख्रीष्ट योमिलो आमा धक्ची ह्वाक्पु। 17 माम्चु़नीडा इनीमा थो़र नुङ बोनिमिम खारी ने गुमीलाई ग्वामा सासेन्मु होप्माम बु। आमा त्वाकु सिसि मेराम सासेन्मुडला अम्सिमुङा बासी लोवो गेर्सिक्पा बुङु, मा गानी खोत्लेनुङ भ्रसिद्वाङु। 18 मेम्साकाङा गानी वो गोनुङ गेर्सिद्वामु नुङ भ्रम्सिमु बासी। तिमोथी नुङ इपाफ्रोडिटस 19 ङाचो़ येशूका न बेम्डी माला दालाङा गो तिमोथीलाई इनीमाडा थु़रु र्वाक्पा आमा न बु, मेम्साका इनीमा दुथाममिम सेला थो़उमा गो गेर्सी द्वाङु। 20 आच्छाङा इनीमा दुथाम जो़होमका मिम्पा मु़चु़ गुडाम वाङमिम सु़ वो गोनुङ मेबुमी। 21 वाङमिमका ने येशू ख्रीष्टका हाम न बोमी र्वाक्पा मेएँ, उनी त्वाकु नथो़ कोङङा न सोमी। 22 लावो तिमोथी ने हेप्माम मु़चु़ र्वाक्पा गानी चनिमङा बु, मा चो़का उमा पापनुङ बु़मिम होङङा गुका गोनुङ जो़पा-सेलाकु खारी बु़डु़म बु। 23 मेम्मिमका गोडला हा-हाम दु़म, मेराम चक्पु मेडे तिमोथीलाई थु़रु र्वाक्पा न बु। 24 मेम्मा गो आ त्वाप दालाङा रोङु र्वाक्पा ङाचो़ येशूडा थो़र लु़ङडोम बु। 25 लावो इपाफ्रोडिटस आमा ल्वाकलाई इनीमाडाङा थु़र्मु बासिक्पा लु़ङु। गु गोनुङ खारी बेपा मा आमालाम बासिक्साका जो़पा-सेला थो़बेन्मुडा क्वाल्बा बेपा सिपाही सो़, गु इनीमा सेलाचो़ मा आमा खेरेलाडा गोलाई रेम्मु लागि गानी थु़र्निम। 26 हेङालोने गुका गानी खोत्लेनुङ छो़म घ्रो़म्मु न बु़मिम बु, मा गु नो़पा बाइडा र्वाक्पा गानी थो़न्निमका छो़म मिम्ताम-सो़र्ताम बु़डु़म बु। 27 गु आच्छाङा छो़म नो़डा मा सिल्याड्डामङा बाइडा। लावो माम्चु़नीका गुडला न-थो़म रेम्बेम्डी। गुडला कोङङा मेएँ, लावो आमा मेभ्रसिसीडला वो मेभ्रसिसी मेदु़म्नु़ र्वाक्साका गुमीका न-थो़म रेम्बेम्डी। 28 मेम्मिमका गुलाई थु़र्मु छो़म आमा न बु, मेम्साका गानी गुलाई आथावो डार्निमा गेर्सी द्वानी। मेम्मा गो हापा मिम्ताम-सो़र्ताम बोमु मेबासी। 29 गुलाई ङाचो़ येशूडा छो़म गेर्सी द्वाक्साका रनी। आरेप्माम मु़चु़मिमलाई डोक्पु बेनी। 30 हेङालोने ख्रीष्टकु खारीकाम लागि गु र्वाप्डाङा सिडा, मा गानी गोलाई ग्वामु मेचाप्निवाम ख्लो़सीडा खारी बोम्सोमु लागि सिमु बासि लोवो हाम होङ्ङा मेलु़यावाम बाइडा। |
© Wycliffe Bible Translators, Inc. All rights reserved.
Wycliffe Bible Translators, Inc.