फिलिप्पी 2 - राना थारु नयाँ नियम

¹ काहेकी तुम ख्रीष्टके हओ, तभीमारे तुम प्रोत्साहित भए हओ, काहेकी ख्रीष्टको प्रेम तुमर ताहीं भओ हए। तभीमारे तुम सान्त्वना पाएहओ, काहेकी तुम पबित्र आत्माको संगतीमे हओ, और ख्रीष्ट तुमर प्रति नम्र और दयालु हए।

² उइसो हए कहेसे मोके खुसी करनके तुम एकए बिचार करन बारे, एकए प्रेममे रहान बारे और एकए मनके होबओ, कहिके मए तुमके बिन्ती करत हओं।

³ स्वार्थ और घमण्डके ताहीं कुछ मत् करओ, पर नम्र हुइके एक-दुस्रेके अपनेसे जद्धा जरुरी समझओ।

⁴ तुम सब अपने भलाइके इकल्लो मत् ढुणओ, पर औरनके भलोके ताहीं फिर चिन्ता करओ।

ख्रीष्टको नम्रता और महानता

⁵ जैसे येशू ख्रीष्टको स्वाभाव रहए उइसीयए तुमर स्वाभाव होबए।

⁶ बा परमेश्वर हुइके फिर बा परमेश्वरके बराबर होन बारो बातके अपने पकणी रहान बारो चीज जैसो नाए सम्झी।

⁷ और बा सब कुछ छोड दइ, और कमैयाको रुप लइ, और बा एक आदमी बनिगओ।

⁸ और आदमीके रुपमे प्रकट हुइके अपनएके नम्र करी, और परमेश्वरको आज्ञा मनके मरनके फिर तयार रहए, और एक अपराधी हानी क्रूसको मृत्यु फिर सहीलै।

⁹ जहेमारे दौवा परमेश्वर, येशूके सबसे उँचो पदमे पुगाइ, और बाके बो नाउँ दइ जो सबसे उँचो हए।

¹⁰ कि स्वर्गमे, पृथ्वी उपर और पृथ्वी तरे हए, बे सब येशूके नाउँके सम्मान करनके ताहीं घुँटो टेकंगे।

¹¹ और दौवा परमेश्वरको महिमाके ताहीं सब आदमी खुल्लम-खुल्ला घोषणा करंगे, कि येशू ख्रीष्टए प्रभु हए।

उजियारो हानी चमक्नो

¹² जहेमारे हे मेरे प्रिय सँगीउ, जब मए तुमर सँग रहओं, तओ तुम सब परमेश्वरको आज्ञा मानतए रहे। अब मए तुमसे दुर भओ हओं, तहुँफिर तुमके जे बातके मानन पणैगो। और तुम सब जनै डरातए, और लग्लागात बे सब काम करओ जो तुमर ताहीं ठिक हए, जौन तुमके परमेश्वर मुक्ति दइ हए।

¹³ काहेकी परमेश्वर तुममे काम कर रहोहए, तभीमारे तुमके बो सब काम करन इच्छा और शक्ति देतहए, जौन काममे परमेश्वर खुसी होतहए।

¹⁴ बिना दिक्काएके और बिना बिबादसे सब काम करओ।

¹⁵ ताकी तुम निर्दोष और सिद्ध हुइके खराब और भ्रष्ट पिढीके आदमीनके बीचमे परमेश्वरको निष्‍कलङ्क सन्तान हुइ पाबओ, और जीबनको बचन सुनाएके तुम जा संसारके आदमीनके बीचमे बादरको तारा हानी चम्कन पणैगो।

¹⁶ और तुम जीबनको अच्छो समाचारके मजबुतसे पकणे रहाबओ। अइसो करे कहेसे जब ख्रीष्ट फिरसे आबैगो, तओ मिर दौड और मेहेनत बेकामको नाए गओ हए कहिके मए घमण्ड कर पामंगो।

¹⁷ जब मए तुमके अच्छो समाचार सुनाओ, तओ तुम प्रभु येशूमे बिश्वासको बलिदान करे, और बाको सेवाके ताहीं अपनो जीबनके समर्पित करदए। जहेमारे, अगर मए मरंगो तहुँफिर मए तुमरसँग आनन्दित और खुसी रहामंगो।

¹⁸ उइसी तुम फिर आनन्दित होबओ, और मेरे सँग आनन्द मनाओ।

तिमोथी और इपाफ्रोडिटस

¹⁹ मोके प्रभु येशूमे आसरा हए, कि मए तिमोथीके तुमर ठिन तुरन्त पठामंगो, ताकी तुमर खबर सुनके मए प्रोत्साहित हुइपामओं।

²⁰ काहेकी सच्चो मनसे तुमर वास्ता करन बारो तिमोथी बाहेक मेरे सँग और कोइ नाएहए।

²¹ काहेकी सब अपने स्वार्थके खोजीमे रहात हएं, बे येशू ख्रीष्टसे जुडे भए बातके बारेमे चिन्ता नाए करत हएं।

²² पर तुम जानत हओ, कि कैसे तिमोथी अपनएके बिश्वासयोग्य दिखाइ हए, कि जैसे लौंणा दौवाके सेवा करत हए, उइसीयए बो अच्छो समाचारके फैलानमे मेरे सँग मेहेनत करी।

²³ देखओ, कि मोके का होबैगो! बे बात पता होत खिनक मए तिमोथीके पठानके आसरा करो हओं।

²⁴ प्रभुको इच्छा हए, कहेसे मए फिरसे जल्दी आनके बिश्वास करो हओं।

²⁵ मए इपाफ्रोडिटसके तुमर ठिन पठानके जरुरी सम्झो। बो मिर भइया, और मेरे सँग परमेश्वरको काम करन बारो सेवक और अच्छो समाचारके रक्षा करनके ताहीं मेरे सँग एक योद्धा, तुमर खबर पुगान बारो आदमी, और खास बातमे मिर सेवा टहल करन बारो आदमी हए।

²⁶ तुम सबसे भेँटन इपाफ्रोडिटसको मनमे बडो इच्छा हए। और तुम, इपाफ्रोडिटस बिमार भओ सुने कहिके बो बहुत चिन्ता कर रहोहए।

²⁷ और नेहात्तओ बो बिमार त हुइगओ रहए, हियाँतककी मरनमे आइगओ रहए, पर परमेश्वर बोके दया दिखाइ, और केबल बोके इकल्लो नाए पर परमेश्वर मोके फिर जद्धा दुख नाए होन दइ।

²⁸ जहेमारे मए इपाफ्रोडिटसके पठान बहुत जद्धा कोसिस करो हओं, कि तुम बोसे दुबारा भेँट करके आनन्दित हुइजाबओ, और मिर चिन्ता फिर दुर हुइजाए।

²⁹ जहेमारे तुम प्रभुमे इपाफ्रोडिटससे बहुत आनन्दसे भेँट करीयओ, और तुमके इपाफ्रोडिटसके और बहे हानी आदमीनके सम्मान करन पणैगो।

³⁰ काहेकी इपाफ्रोडिटस ख्रीष्टके कामके ताहीं अपनो प्राणके कष्टमे डारके मरनमे आइगओ रहए, ताकी इपाफ्रोडिटस बे तरिकासे मिर मदत करपाबए जो तुम नाए करपाएरहे हओ, काहेकी तुम बहुत दुर हओ।