MARKA 2 - Thukhun Thak NT (BSI)

Jesu`n mi jeng a damsakna

¹ Ni bangjah hiam nungin Jesu Kapernaum khua ah ahung lutkik a; tualeh inn ah a om chih mipite`n athei uhi.

² Tuachi`n kongkhak kim tanpha a omna ding omlou khop in mi tampi ahung kikhawmpai ua, Aman akiang uah thu agen a.

³ Mijeng khat mi li in hungjong in a kiangah ahung paipih ua.

⁴ Tualeh mi tamjiak a Jesu kiangnai a ahung paitheihlouh tak un, a omna inntung ahong ua; aphehvang zoh un mi jengpa alupna tawh a khaikhia suk uhi.

⁵ Jesu`n aginna uh amuhtak in jeng a damloupa kiangah, “Tapa na khialhnate ngaihdam ahita,” achi hi.

⁶ Hinanleh laigelhmite khenkhat huamun a tou aom ua; a lungsim un,

⁷ “Bangding a hihpa`n Pasian gensia a hichibang thu gen ahia? Pasian chihlouh kua ahia khialhna ngaidamthei!” chi`n a ngaihtuah uhi.

⁸ Hinanleh Jesu`n a lungsim un huachibang in a ngaihtuah uh chih akha-in athei a. Aman akiang uah, “Hichibang bangding a na lungsim ua ngaihtuah nahi ua?

⁹ Mijeng kiangah, ‘Na khialhnate ngaihdam ahita,’ chih leh, ‘Thou inla na lupna la inla paita in, chih khoi a baihlam jaw ei’?

¹⁰ Hinanleh mihing Tapa in leitung ah na khialhnate uh ngaihdam theihna anei chih natheihna ding un,” mijeng kiang ah,

¹¹ “Thou inla, na lupna la inla na innlam ah paita in kungchi ahi!” achi hi.

¹² Amah a thoupai a, alupna la-in aun ua amitmuh un a pawtdokta hi. Tuachi`n aun un lamdang asa ua, “Hichibang mawng mawng i mungai naikei uh!” chi`n Pasian aphatta uhi.

Levi Sapna

¹³ Tuachi`n amah tuipigei ah apaikhia kik a, tualeh mipi jousiah a kiangah a hungpai ua, aman thu anahilh hi.

¹⁴ Tuachia apailai in Alphai tapa Levi siah donna zum a tou amu a. Aman a kiangah, “Hung juiin achi a,” tuachi`n a dingkhia a, amah ajuita hi.

¹⁵ Tualeh hichi ahung hi a, Jesu`n Levi inn ah an a im a, siah dongmi leh mikhial tampite`n Jesu leh a nungjuite a impihchiat ua. Tampi ahi ua, a nung ajui uhi.

¹⁶ Tualeh Laigelhmite leh Pharisaite`n siah dongmite leh mikhialte tawh an anekkhawm uh amuhtak un, amau`n a nungjuite kiang ah, “Bang-chidan ahia siah dongmite leh mikhialte tawh anek a, adawn?” achi ua.

¹⁷ Jesu`n hih ajaktak in, akiang uah, “Mi chidamte`n daktor a poimohkei ua, hinanleh mi chinate`n a poimohjaw uh; mi diktakte sam ding a hungpai ka hikei a, mikhialte kisiksak ding a hungpai ka hijaw hi,” achi hi.

Anngawl thua Dokna

¹⁸ Johan nungjuite leh Pharisaite`n an a ngawljel ua. Tuachi`n a hungpai ua a kiangah, “Bangding a Johan nungjuite leh Pharisaite`n an ngawl uh a, na nungjuite`n an a ngawllouh uh?” achi ua.

¹⁹ Tualeh Jesu`n a kiang uah, “Mou neipa akiang ua a om laiin Mou neipa lawmte`n an a ngawl ngai uh maw? Mou neipa amauh tawh akiang ua a omsawt laisiah an a ngawlkei ding uhi!

²⁰ Hinanleh Mouneipa akiang ua kipan a puakmang ni a hungtung ding a, tuachi`n huani chiangin a ngawl ding uhi.

²¹ “Mi kuaman puanlui puanthak them in a phawhngai kei, phawh nanle uh, a phawhna pen in aluipen a kaikek ding a, asiajaw sem ding hi.

²² Tualeh mi kuaman uain thak savun thawl luiah athunngai kei, thuntale uh uain thak in savun thawl lui aphukek ding a, uain akibua ding a amangthang ding hi. Uain thak savun thawlthak a thun ding ahijaw hi,” achi hi.

Khawlni tan thu a dokna

²³ Tualeh hichi ahi a, khawlni in Jesu buhleilak ah apaisuak a. A paikawm un a nungjuite`n buhvuite ajut ua.

²⁴ Tuachi`n Pharisaite`n a kiangah, “En in, bangding a amau`n khawlni a bawl sianglou bawl uh ahia!” achi ua.

²⁵ Aman akiang uah, “David leh a lawite a taksap ua, a gilkiallai ua a silbawl uh simkhalou nahi umaw?

²⁶ Abiathar siampi ahih lai a, Pasian inn a lut a Siampute chihlouh nek sianglou tangkou sehtuam anek a, alawite kiang a zong apiak thute,” achi hi.

²⁷ Tualeh aman akiang uah, “Khawlni mihing a ding a siam ahi a, mihing khawlni a ding a siam hilou hi.

²⁸ Tuajiakin Mihing Tapa ahihleh khawlni Toupa ahi.”