Mark 3 - Pathen Thutheng BU (BSI)

Jesu'n Khut Langthipa Adamsah

¹ Chuin kikhopna in'a alut kitnin ahile, chuachun mi khutlang ngoi khat aumin ahi.

² Chuin ama chu ahehset theina dingun, cholngah ni-a aboldame aboldam hih-em, tin achang lhiuvin ahi.

³ Chuin Aman khutlang ngoipa jah-a chun, Alaija hung dingdoh-in, ati.

⁴ Chuin ajah uva, Cholngah ni-a apha bol angaiha, ase bol angaiham? Lhagao huhhing angaiha, suhmang angaiham? atin ahile, amaho athip chetchut jengun ahi.

⁵ Chuin Aman alungtah jeh-u chun alungphamon, lungsatenin amaho chu ave kimvelin, chuin mipa jah-a chun, Nakhut lhangin, ati. Chuin alhangin ahile, akhut chu alangkhat bangin adamtan ahi.

⁶ Chuin Pharisai ho chu apotdoh-un, amachu iti suhmang dingham ngaiton, Herod miho chutoh akihoutoh paitaove.

Dillen Panga Mipi ho

⁷ Chuin Jesu aseijuite toh dillen lama chun achetauve. Chule mipi tamtah-in ajuijin, Galilee gama kon, Juda gama kon,

⁸ Jerusalem khopi-a kon, Idumia gama kon, Jordan gala kon, Tyre le Sidon gam kimvela kon chule mihonpi tamtah ahiuvin, athilbol loupitah ho ajah phatnun, ahengah ahungun ahi.

⁹ Mipi jeh chun kongneo gotsa koijin aseijuite asolin, achuti loule eineh khauvinte, ati.

¹⁰ Mi tamtah adamsah ahitah jeh chun, natna nei jousen ama atohkhah theina dingun Ama aumchah jengun;

¹¹ Lhagao boh chengse jong chun ama amuchanun a-angah aboh khupmun, Nang Pathen Chapa chu nahi, tin asamjiuvin ahi.

¹² Ahin Aman ama chu aphondoh louna dingun amaho chu akhamchah-in ahi.

Jesu'n Solchah Somleni Alhen

¹³ Chuin mol chunga akaltouvin, aman angaichat chengse chu akouvin, amaho ahenga ahungun ahi.

¹⁴ Chuin akoma um dingle, thuhil lhangle-a asol dingin, somleni alheng doh-in,

¹⁵ Damlou ho damsah theina thahat neidingle, thilhaho nodoh theina thunei dingin:

¹⁶ Simon aman Peter asah-in;

¹⁷ Zebedee chapa Jacob, chule anaopa John, amani chu amin Boanerges asah-in; hichu van gin chate, tina ahi;

¹⁸ Andrew, Philip, Bartholomew, Matthew, Thomas, Alphaeus chapa Jacob, Thaddaeus, Canaan mi Simon,

¹⁹ Chule Ama matsah-a pang Judas Iscariot ahiuve. Chuin amaho insunga alut taovin ahi.

Jesu Le Beelzebul

²⁰ Chuin mihonpi ahung kikhom kit taovin ahile, an tahbah jong anethei tapouvin ahi.

²¹ Hichu a-inkoten ajahdoh phatnun, angola hitakhu atiuvin, ahung konun thahatsana mat dingin ahung gouvin ahi.

²² Chule Jerusalem'a kona hungsuh danthu sunho jong chun, Beelzabul vop ahi, chule thilha anodoh jong hi thilhaho lengpa vanga anodoh hija hi, atiuvin ahi.

²³ Chuin Aman amaho chu akouvin, thulemin aseijin ajah uva, Satan'in Satan iti anodoh thei dingham?

²⁴ Gamsung khat amale ama kidouto hen kikhenle, hiche gam chu dingdoh thei louding ahi.

²⁵ Insung khat amale ama kidouto henlang hileh, hite insung chu dingdoh thei pouvinte.

²⁶ Satan jong amale ama kidouto henlang kisep khenle, dingdoh thei louva mangthahjo ding ahi.

²⁷ Koiman mihat chu kanchom masa louvin, a-in'a alutnin athilkeu achompeh theipoi; akanchom masatna chutengle achom dingbou ahi.

²⁸ Chule tahbeh-a kaseipeh nahiuve, Mihem chate hi achonsetnao itobang hijongle, Pathen ataitom nao hijongle, taitomna jouseu chu kingaidam ding ahi.

²⁹ Amavang koi hileh Lhagao Theng taitom vang chun imatih chana ngaidam amulou ding; tonsot themo channa-a chua ahitai, ati.

³⁰ Lhagao boh vop ahi, ati jeh uva chutia chu asei ahi.

Jesu Nu le Asopiho

³¹ Chuin anu le asopite ahungun, inpoa adingun, ama kouvin mi asolun ahi.

³² Chule avela chu mihonpi touchah khet ahin, amahon ajah-a chun, Ven, inpoa khun nanu le nasopiten nahol uve atiuve.

³³ Chuin Aman ajah uva, Kanu le kasopite koi koi hiuvem? tin adonbutne.

³⁴ Chuin akimvela touho chu ave golin, Hiteho hi kanu le kasopite ahiuve.

³⁵ Ijeh-inem itile Pathen lunglama chonpatah chu kasopipa le kasopinu chule kanu ahi, ati.