John 2 - Pathen Thutheng BU (BSI)

Cana Kho-a Moupui Golvah

¹ Chuin ani thum nin Galilee gama Cana kho-ah moupui golvah aumin; chua chun Jesu nu aumin ahi.

² Chule moupui golvahna-a chu Jesu le aseijuiho jong akouvu ahi.

³ Chuin lengpitwi alhahsam phatnin, anun Jesu jah-a, Lengpitwi aneitapouve, ati.

⁴ Chuin Jesu'n ajah-a, Numei, eini i-ikin umam? Keima kaphat lhung loulai hi, ati.

⁵ Anun lhachaho jah-a, Najah uva asei chan bolun, ati.

⁶ Chukoma chu Juda te dana kisuhthengna, mon ni mon thum ket cheh songbel gup uma ahin,

⁷ Jesu'n ajah uva, twibel hochu twi sung dimun, ati. Chuin amahon hicheng chu twi asung dimset taove.

⁸ Chuin aman ajah uva, Tun thalunlang golvah vaihompa henga choijun, ati. Chuin amahon achoitauve.

⁹ Chuin golvah vaihompa chun twisih lengpitwi kisosah chu atepkhah phat chun, Hoija kon ahi ahepoi (lhachaho athala pangho vang chun ahenauve), chuin golvah vaihompa chun moulang chu akouvin, ajah-a,

¹⁰ Mitinin lengpitwi achih atungdoh masa ngaijin; chule min adon khop tengle adaojep apejin; nangman tu geijin lengpitwi chih nakoi nalaije, ati.

¹¹ Jesu'n hiche melchihna kidang chu Galilee gama Cana kho-a abolpat ahin, aloupina aphongdoh tan; chule aseijuihon atahsan taove.

¹² Chuin chuche jou chun Capernaum'a agachesuh-in, amatoh anutoh chule asopiho le aseijuiho toh ahiuvin, chukoma chun ni sotpi aumpouve.

Jesu'n Houin Asuhtheng

¹³ Chuin Juda ho kalchuh kut anaitan ahile, Jesu Jerusalem'a ache toutai.

¹⁴ Chuin aman houin sungah bongle kelngoi chule vapal johho, chule sum lhengho atouvu agamu-in;

¹⁵ Chuin aman khao kiholin jepna asemin, abonchauvin, kelngoi pum le bongchal pumin houin'a konin anodoh-in, sumlheng ho sum aboh lhahpeh-in, adokhangu chu alekhup peh-in;

¹⁶ Chuin vapal johho jah-a chun, Hitehohi hia konin podoh un; ka Pa-in hi sumkolveina in'in bol hih-un, ati.

¹⁷ Hichun, na-in'a katom pana-in eine chaije, tia kisun chu aseijuihon ageldoh taove.

¹⁸ Hijeh chun Juda hon adonbutnun ajah-a, Thil hicheng nabol hi amelchihna ipi neimusah-um, atiuve.

¹⁹ Chuin Jesu'n adonbutnin ajah uva, Hiche houin hi suchimun, keiman ni thumin tungdoh inge, ati.

²⁰ Hijeh chun Juda hon, Hiche houin sahna-a kum somli le kum gup jen lut chu nangman ni thuma natundoh ding ong, atiuve.

²¹ Amanla ama tahsa houin aseina ahibouve.

²² Hijeh chun ama athi lah-a kona kaithouva aum phat chun, aseijuiten ajah uva hiche asei chu ageldoh-un, Pathen lekhabua thule Jesu thusei chu atahsan taove.

Jesu'n Lunggel Ahet

²³ Kalchuh kut laija ama Jerusalem'a aum pet chun, athilbol melchihna ho chu amuvin mi tamtah-in ama minah atahsan taove.

²⁴ Ahivangin Jesu'n amaho chu angampipoi; ajeh chu aman mi jouse ahetsoh ahin;

²⁵ Chule mi thudol min ahetsah ding chu angaipoi; ijeh-inem itile mi lung sunga ipi aum aman ahet sohkei ahi.