SOFONÍAS
'LAQATAĜANAĜAC JANJO' NEDE
Joga'me 'uaeñe 'laqataĝanaĝac janjo' nede ca'li 'yaĝatetac joñe'me aqataĝanaĝaic Sofonías nach'ega uaue ga'me lejaliaĝa ñe'me jaliaĝanec Josías, nach'ega aleua joga'me Judá, gaa'me 'uoidi 640 chayovida'a 609 ca'li maliaĝa ja novitequena ñe'me Cristo. Joga'me lejaliaĝa ñe'me jaliaĝanec Josías, male qoyejomalegue jaga'me nede jo'ne uaye naa'me namajoĝonaĝaco (uo'e 622 ca'li maliaĝa ja novitequena joñe'me Cristo). Chane'eja joñe'me jaliaĝanec male ya'uo joda'me dalaĝaic namajoĝonaĝac da'me nepe'e joga'me tamenaĝaiqui di'me Jerusalén (2 Jaliaĝanaqa 22—23; 2 Crónicas 34—35).
Qalaĝaja jana'me janjo' nede joñe'me Sofonías yataqata joda'me ja 'yaĝatetac da'me dojo' qoyadalaĝat, uotaĝa joga'me 'laqataĝanaĝac jo'ne qoya'uo jaa'me 'uoidi yenoĝodegue ca'li ga'me noic maliaĝa ja yataqata joda'me p'iya'a joñe'me Jaliaĝanec nataq'aen degueja joda'me necachaĝac. Chane'eja naa'me naajo' jo'ne 'laqataĝanaĝaco joñe'me Sofonías nach'egaua jo'ne 'uaediñe 'uoidi joga'me lejaliaĝa di'me Josías, jo'ne ca'li maliaĝa qodique'taguelo gaa'me jaliaĝanaqa 'uaediñe joda'me maliaĝa ja jaliaĝanec ñe'me Josías (lenaqa'te da'me Manasés chayovida'a Amón).
Joga'me yataqata 'laqataĝanaĝac joñe'me Sofonías 'yaĝatetac joga'me nolo' jo'ne lejaliaĝac ñe'me Jaliaĝanec (1:7,10,14), qama'le niquiya'a joda'me lequejeguetaĝa joñe'me Judá, chayovida'alo jogaa'me noyaqa jo'ne leje'gue. Nolo' jo'ne 'uo joda'me lichic qa'a male en yem joda'me lañoqotaĝanaĝac da'me ja no'en jena'me jenjo' aleua.
Ga'me p'ategue (3:9-20), Sofonías 'uo joga'me 'laqataĝanaĝac joda'me 'uo ga'me nec'alaĝa jo'ne 'yaĝatema gaa'me ja lama'y jiyaĝa'u jena'me jenjo' noic ca'li nec'aledegue.
Uo'oe naa'me naajo' lael janjo' nede, jo'ne naq'aeta da'me qoyapaĝagueneque:
1. Male nadi'ta ga'me nolo' qom ya'uo da'me lec'atenaĝanaĝac joñe'me Jaliaĝanec (1:1—2:3)
2. Qoyapalaĝa't qomle joga'me laute'upi ñe'me Jaliaĝanec (2:4-15)
3. Qoye'uaĝa'n qomle jogaa'me uetedaue di'me Jerusalén qama'le qonec'alaĝatedegue jogaa'me p'iida'a joñe'me Jaliaĝanec (3:1-20)
