Talor' 3 - Kuo :Dele'

:Ka 'Klae-a' nyor⧾ :korn on 'ye-a' 'kmo :ne-eh no

¹ :Yee' :po-dih-eh nyor⧾ :gwluhuh' bo, on 'ye an-a' 'jeh ya :ya 'do nyor⧾ wlu 'ken :korn-nyor⧾-: 'dekorn: 'gomla-nyor⧾-: 'zorn, on 'ye 'o an-a' 'tele' dih dhe, on 'ye buh⧾ ken :ne 'do deh 'jeh :neh :no-eh bo.

² Zela-uh :gwluhuh', on :ne-' nyor-beh: deh⧾-zon⧾ 'bhun dih :za-dih:. An-a' :no-' jeheh-nyor⧾. :Yee' 'nyi on no 'yi :kpon-eh-nyor⧾. 'Nyi on no nyor⧾ :on :korn-a kplen :nmor-a 'yi dih 'do :gwlor-nyor⧾-a' klehkpeh bo.

³ :A-a' 'jeh :daa :ke, :a no nyor⧾ :dee', :an no-a :bobo-deh⧾. 'De :a-a' :dhe 'o Nyorsoa-a' 'tele' dih. :A :bo-dih-eh: dih. 'De :a no 'ge-nynuu :dee', 'do :porluh-a' sin-a' 'do deh⧾-zon:⧾ 'doror: 'dor bo-: 'dekorn: deh⧾ :en 'pehn-dih:-a :a-a' :porluh⧾ dih-:. :A :ne-dih: 'galo: :korn-eh-: 'dekorn: :gwlehehn'-: 'kmo :dee'. :A 'nyeh :a 'bei'-' 'weh, 'de nyor⧾ 'nyeh :a-uh' :ke.

⁴ Jorwor: Nyorsoa :or no-a :a-a' 'puh-dih-nyor, :yeh or-a' :porluh-a' 'yi dih :nmor-eh-: 'dekorn: or-a' nyor⧾ :ybeh-eh-: en :to-dih-eh: :a 'i,

⁵ :yee' or 'puh-dih: :a 'weh. Eh :se :a-a' 'yi 'sleh noo-deh:⧾ :a no-a en-' dhih, or 'puh-dih: :a-uh :deh. Jorwor: or-a' :wehlih: :korn-eh: 'o. Or 'puh-dih: :a 'weh, 'do :a-a' worlor-eh bo, :eh :ya-a: 'de 'wluh-a' :dele'-: 'dekorn: :febeh' :dele'-: :eh :yi-dih:-a or-a' Gban 'i :ne :Zulu.

⁶ Nyorsoa :yi-dih: :Yusu' 'Klae-' :or no-a :a-a' 'puh-dih-nyor, 'de or 'nyi or-a' Gban 'i :ne :Zulu :a-uh 'de or-a' :porluh-a' worn :nmor-eh 'di.

⁷ Eh-: no-eh, 'de :a no 'yi 'sleh-nyor⧾ 'do Nyorsoa ybei', :eh :yi-dih:-a or-a' mla-', 'de :a 'ye 'kmo :sie: :febeh' :a dhe-a :gwlii' :naa 'ye 'de ybei'.

⁸ Dhih :daa :a za-a-', dhih-a' 'yor-eh: 'o. :Yee' eh-a' dhih, 'an 'bhorn :on 'ye en-' wlu-' dih tli, 'do en-' :za 'da, 'de nyor⧾ :on po-a Nyorsoa-a' dhih dhih 'jeh-', on 'ye :gwluhuh' dih 'wla, on 'ye an-a' ti-a' klehkpeh-' 'duo:, 'do deh⧾ 'jeh ne-a' no-a' bo. Deh⧾ :daa, en :nmor-: 'yi, 'de en :korn :koan 'do :gwlor-nyor⧾-a' klehkpeh bo.

⁹ Jorwor: :zaa' :or se-a :toror' 'di :ne-: 'wluh-a-keli-: dhobo-eh-: 'dekorn: jeh-a' :Mose'-a' 'tele'-a' dhih-: me-: :on 'ye bo dih :tehn-dih:. Deh no-eh, en se :koan :korn, en-' po 'o nyor⧾ deh.

¹⁰ Nyor :or ya-a 'de nyor⧾-' :gble-eh, 'de nyor⧾ 'nyne-', 'dhu-or 'slen. No kpor⧾ 'sororn'. :Yee' :mor or se 'slen 'worn, :yee' za-or son 'bhun.

¹¹ :On yubo-eh', :ka nyor :or :ne :ao', or se-a 'o :gwie: 'jeh 'i :ne, 'de or no-a deh⧾-zon:⧾ :no-nyor. Or-a' 'jeh-a' kplen, me-: chehn or-a' zabe 'i.

'Tele' :eh 'bor-dih:-a 'o

¹² :Yee' :mor 'on dbo 'Atima-: 'dekorn: :Teki'kor-: an-a' nyor :due' 'de :on bo, :yee' :on :korn 'gen, 'do :dha :due' 'jeh :dao', po 'de 'kpih, :on 'ye 'de 'on bo :Nikor'poli-gwlor 'di yi. Deh no-eh, 'do :wor 'on polo-eh 'do 'on :gwlii', 'do :chehbe'-a' ti 'di, 'on 'ye 'o :ne.

¹³ Po 'de 'kpih, :on 'ye 'Zina: :or no-a 'tele' :zi-nyor-: 'dekorn: :Apor'lor-: bo 'kpa, 'de on 'ye :gwie 'i 'kpa. :Yee' 'ye-eh bo, deh⧾-a' klehkpeh on se-a 'ble, on 'ye-ih' 'ye.

¹⁴ :A-a'a: nyor⧾ :korn on 'ye an-a' ti-a' klehkpeh-' 'duo-eh 'chean', 'do deh⧾ 'jeh :ne :no-eh bo. 'De on 'ye nyor⧾ :on :korn-a son⧾ se-a 'o nyni-' :za-dih:, 'de on :ne-' 'kmo-' :ne-eh: :eh se-a deh-' 'dhu-eh: 'kmo :ne-dih:.

¹⁵ :Yee' nyor⧾-a' klehkpeh :on :ne-a 'noror 'on bo, on 'da, mo-: 'ye :on. :A :mor 'ye :a 'bei'-a' klehkpeh :on no-a 'Klae-a' nyor⧾. Mla 'do a-a' klehkpeh bo.