Talor' 2 - Kuo :Dele'

Nyor⧾ deh :torne-eh: 'jeh

¹ :Yee' Talor', :mor :mloror', :ka nyor⧾ deh :torne-eh: 'jeh-a' :gwie⧾ no-a mu-a', 'ka-: :on 'ye nyor⧾ deh :torne-eh no.

² :Torne: nyor⧾ :bholuh⧾ deh, on 'ye 'de 'yli 'de dih tba, 'de on 'ye an-a' 'jeh deh-' 'ye, 'de on 'ye an-a' 'jeh wlu 'ken :korn, on :ne-' deh-zon no, 'de on 'ye 'kwla :gweh 'de 'Klae-a' dhih 'jeh-' :po-eh-: :ybeh-dih-eh-: 'dekorn: :an-a' sea-: 'di.

³ 'Ka :wor :on 'ye no :ke, 'do 'nynor⧾ :bholuh⧾ bo. :Torne-eh on :ka Nyorsoa-nynor⧾-kpao'⧾ :korn on 'ye-a' 'kmo :ne-eh no, 'de on :ne-' nyor⧾ deh⧾-zon⧾ 'bhun dih :za-dih:, 'de on :ne-' nomor 'na-nyor⧾ no. Jorwor: 'nyi on :torne: nyor⧾ deh⧾ :en 'sleh-a 'i,

⁴ 'de on 'ye 'nynor⧾ :gbolo'⧾ deh :torne: :ke, :ka on 'ye-a' an-a'a: yibeor-boi'-: 'dekorn: an-a'a: 'nynuu-: an-a' dhih :kma-eh no.

⁵ :Torne-eh on, on 'ye an-a' 'jeh wlu 'ken :korn, on :ne-' deh-zon no, on 'ye :vlehehn'-' :gweh-nyor⧾ no, 'de on 'ye 'nynor⧾ 'jeh no no, :an 'dhu-a 'gbu 'yli-eh bo deh 'jeh, 'de an-a' :porluh⧾ 'ye 'yi dih :nmor, on 'ye an-a' 'jeh ya :ya 'do an-a'a: yibeor-boi' 'zorn, 'de nyor⧾ :ne-' Nyorsoa-a' wlu 'bhun dih :wlu-dih:.

⁶ 'Ka :wor :on 'ye no :ke, 'do nyor⧾-kpalu⧾-nynuu: :gbolo'⧾ bo. :Wlu 'de on bo, on 'ye an-a' 'jeh wlu 'ken :korn, on :ne-' deh-zon no.

⁷ :Mor an mu ya pobo:, 'do deh⧾-a' klehkpeh :an mu-a :no bo, :yee' deh⧾ :en :nmor-a 'yi dih, me-: :on 'ye no. :Mor :on :taa nyor⧾ deh torne, :yee' 'nyi eh tba 'de :on 'di dih, 'de mor :an-a' 'wluh-dih:-' :goba'-dhih ken dih.

⁸ :Mor :on :taa-eh no, :dha wlu :korn-a, 'do :wor :on 'ye-uh' :po-dih:, 'de nyor⧾ :ne-' ka 'ye, 'do :an-a' dhih 'bhun dih :za-dih: 'da, 'de dhen 'ye nyor⧾ :an vorn-a :on bo no. Deh no-eh, deh-zon:, on 'ye-a' :za 'do :a 'bhun, eh se :ne.

⁹ :Yee' :torne: 'ge-nynuu deh, on 'ye an-a' 'jeh ya :ya 'do an-a'a: nyor⧾ :klaba'⧾ :on korn-uh-a wlu 'ken, 'zorn, 'de deh⧾-a' klehkpeh 'di, 'de on 'ye 'de 'kpih po, on 'ye an-a'a: nyor⧾ :klaba'⧾ :dao'-a' :porluh⧾ dih 'pehn-dih:. On se :korn on 'ye-uh' worn 'i 'si.

¹⁰ 'De mor on se :korn on 'ye-uh' bo 'yli. Jorwor: on :korn on 'ye-eh on :torne: :ka on 'beh-dih:-a on 'ye-uh'-a :gwlii' dhe 'do deh⧾-a' klehkpeh bo. 'De on 'ye-eh' no, on 'ye Nyorsoa :or no-a :a-a' 'puh-dih-nyor, or-a' nyor⧾ deh :torne-eh 'nyne 'nyi, 'do deh⧾-a' klehkpeh bo.

¹¹ Deh no-eh, Nyorsoa :to-dih: or-a' mla nyor⧾-a' klehkpeh-: 'i, 'de an-a' klehkpeh 'ye 'puh-a' 'beh-dih:.

¹² Nyorsoa-a' mla :daa, or-: :torne-eh :a-uh, :ka :a 'ye-a se Nyorsoa deh-' 'ye-kplen-a' 'kpuh ya :to-eh no-: 'dekorn: :porluh-a' sin-a' 'do 'kmo bo deh⧾-a' 'bhorn-a' bo-:. Or-: :ne-a :due', or-: :torne-eh :a-uh :ka :a 'ye-a :a-a' 'jeh wlu 'ken :korn-eh no, 'de :a :ne-a' deh-zon no-: 'yi 'sleh-deh-a' no-a'-: 'dekorn: 'kmo-' :ne-eh: :eh 'pehn-dih-a Nyorsoa-a' :porluh dih-: 'noror ti :a :ne-a ken :naa 'di.

¹³ Deh⧾ :daa, me-: :a :korn :a 'ye no, :ka :a fuo-a :bhorlie'-we-eh: :a-a' klehkpeh :a dhe-a :gwlii', :eh mu-a 'de :yi 'ken. 'Do 'we-eh: :dao' 'di, :Yusu' 'Klae :or no-a :a-a' 'yi 'beh-Nyorsoa-: 'dekorn: :a-a' 'puh-dih-nyor-: or mu :a 'i 'wluh-dih:, 'de or-a' dhih-a' 'i 'beh-a' 'di.

¹⁴ Or :za or-a' 'jeh 'kwla 'weh, 'do :a-a' dhih bo, or 'ye :a zelie:, or 'ye :a 'de deh⧾-zon⧾-a' klehkpeh 'di :za, or 'ye-eh' no, 'de :a 'ye :vlehehn'-' :gweh-nyor⧾ no, :on :korn-a 'de or :due' bo, 'de :on :korn-a :porluh⧾-a: sin-a, :on 'ye-a deh⧾ 'jeh ne no.

¹⁵ :Yee' deh⧾ :daa, me-: :on 'ye nyor⧾ :torne:. :Mor :on :taa-eh no, :yee' po 'de an-a' 'kpih. No Nyorsoa-a' 'kpih, :on 'ye-uh' 'o :gwie 'i po. :An-a' 'worn-:-', an-a' nyor-beh-nyor-beh:-' :vlehn-' :on.