Tubo-wlu:⧾ 'jeh 'Lu :ya-a: 'de 2 - Kuo :Dele'

:Ka :Yusu' no-a 'wluh-a'

¹ :Yee' 'do ti :dao' 'di, 'do :wor 'Wloon-nyor⧾-a' 'keen :Agor'sin 'nyi-dih: 'tele', 'de or dbo wlu deh⧾-' dih, nyor⧾-a' klehkpeh, on 'ye 'nyne po, 'de on 'ye :zlo-eh:, 'do 'Wloon-bluhba-a' klehkpeh ken.

² Ti :Kini'nior no-a 'gomla-nyor⧾-a' nyor :klaba' 'de 'Silia-bluhba ken, 'do :wor nyor⧾ :zlo-eh: :daa, eh-a' :zai' neh :no-dih-eh.

³ Wlu :daa on :dbo-eh deh⧾-' dih, eh-: no-eh, 'de nyor⧾-a' klehkpeh, on mu 'nyne :po 'da 'de on 'bli gwlor⧾ 'di dih.

⁴ Eh-: no-eh :ke, 'de 'Joseh 'wluh 'Nazla-gwlor-' :or :ne-a 'de :Galali'i-bluhba ken, 'de or mu 'Behble'hehn, :or :ne-a 'de :Judi'a-bluhba ken, :dha 'Keen :Debe' 'wluh-dih:-a. Deh no-eh, or 'wluh 'o :Debe' 'bli neh 'i, or no :Debe' 'di-a' 'yu :due'.

⁵ :Yeh or :taa mu, :yee' or kpa :Mehle' or 'dhu-a 'sehn 'dlu, or 'ye-a' :korn, 'de :or :ne-a 'kwli-', on 'ye 'nyne po.

⁶ :Yeh on :ne-a 'de 'Behble'hehn, :yee' 'kwli 'kpa :Mehle'-' 'weh, or 'ye :gbano :za.

⁷ 'De or :za :gbano, or 'wluh or-a'a: :zai'-nyor-kpalu-yu. Or bhian-dih-or 'ylii kle-' dih. 'De or 'pehn-dih-or dih 'do :dha :nena-deh⧾-a di-dih-a deh. Deh no-eh, on :se-' 'pehn-da 'ye, 'de 'duhba⧾-gbu 'di.

'Blae'⧾-a' 'yli-eh bo 'dhu-nyor:⧾

⁸ :Yee' 'blae'⧾-a' 'yli-eh bo 'dhu-nyor:⧾, mo-: :ne 'de :peli' 'nyne-' 'do kpor :dao' 'di, mo-: :an 'dhu an-a'a: 'blae'⧾ 'yli-eh bo 'mano-'.

⁹ :Yeh on :ne-a 'o, :yee' :Gwlor :baa'-a' 'enjor :due', or-: 'wluh-dih-uh 'i. :Yee' :Gwlor :baa'-a' dhih-a' 'i 'beh-a' zorn-pli-a fan-dih-uh-: ken dih. :Yee' :fano 'yi-dih-uh-: dih.

¹⁰ Jorwor: 'enjor: :dao', or :wlu-' 'de on bo, or 'dae:, A 'bor :fano: :ple-eh. A :gbee'e:. 'An ya a tubo-wlu:⧾ 'jeh, :en mu-a 'de 'mona: :dhulu' :ya, 'do :gwlor-nyor⧾-a' klehkpeh bo.

¹¹ :Yee' dha 'zean'-we-eh: :daa 'di, 'puh-dih-nyor: :or 'dhu-a Nyorsoa-a' 'taan'-yu-', :or no-a :Gwlor :baa', or-: 'wluh 'de :Debe' 'bli :gwlor-', 'do a-a' dhih bo o.

¹² 'De deh :eh mu-a a 'yi :to-dih-deh-' 'dhu-eh 'do a bo, eh-: :dhe dih. A mu 'yu :bleheh'eh 'ye-:. Or mu 'ylii kle-' dih bhian-dih-eh:, 'de or 'ye dih 'pehn, 'do :dha :nena-deh⧾-a di-dih-a deh.

¹³ :Yee' 'yli :a bla-a 'i, 'enjor-nyor:⧾ :dhulu' :on no-a sorye' :on 'wluh-a 'de Nyorsoa 'bli yai', mo-: 'kpa 'o :yor :dao' ken, an po Nyorsoa-a' 'nyne ya, an no,

¹⁴ Dhih-a' 'i 'beh-a', 'do Nyorsoa bo :or :ne-a 'de yai'. 'De wlu-' dih 'worn-eh :ne 'o nyor⧾ :yuh, or-a' :porluh 'pehn-dih:-a ken dih, dha 'bluhba ken bo.

¹⁵ :Yee' :yeh 'enjor-nyor:⧾ :dao', on 'wluh-a 'o on bo, on mu-a 'de Nyorsoa 'bli yai' de, :yee' 'blae'⧾-a' 'yli-eh bo 'dhu-nyor:⧾ :dao', on 'dae: 'de an-a' 'jeh 'nyne-', A 'nyi, :a mu 'Behble'hehn, :a 'ye deh :daa, :eh :no-eh 'ye, :eh :korn-a dhih :Gwlor :baa' zela: :a :gwluhuh'.

¹⁶ :Yee' on 'dhobo:, on mu-', 'de on 'ye :Mehle'-: 'Joseh-: 'dekorn: 'yu :bleheh'eh-: :or 'pehn-a dih 'do :dha :nena-deh⧾-a di-dih-a deh.

¹⁷ :Yee' :yeh on 'ye-or, :yee' on po kuna' 'weh 'de nyor⧾-a' klehkpeh bo, deh 'enjor-nyor:⧾ :dao', on zela-uh-a :gwluhuh', 'do 'yu :daa, or-a' dhih bo.

¹⁸ :Yee' nyor⧾-a' klehkpeh :on 'worn-a deh 'blae'⧾-a' 'yli-eh bo 'dhu-nyor:⧾ :daa, on :za-a-', :yee' eh :florn-dih-uh-: worn.

¹⁹ Jorwor: :Mehle' 'ble-dih: deh⧾-a' klehkpeh :daa 'di dih, 'do or :gwlii'. 'De or na-dih-ih :gwluhuh' ken dih.

²⁰ 'De 'blae'⧾-a' 'yli-eh bo 'dhu-nyor⧾ mu de. :Yeh an mu-a, :yee' an 'nyi Nyorsoa-a' 'nyne dhih-a' 'i 'beh-a', 'de an po or-a' 'nyne ya, 'do deh⧾-a' klehkpeh on 'worn-a-: 'dekorn: :yih on 'ye-a :ke-: :ka 'enjor-nyor:⧾ :dao' on no-a en-' :za-a' 'tene' :kpeen:.

On 'dhu-dih: :Yusu' 'nyne

²¹ :Yee' 'do 'we-eh-a' :meheh' na neh 'di, :yeh ti nyni-a 'o, on 'ye-a' 'yu :dao' :bhlororn' 'dba, :yee' on 'dhu-dih-or :Yusu'-nyne:, 'nyne :yih 'enjor: :dao', or 'dhu-dih-or :dee' see, 'de :Mehle' 'ye-a' or-a' 'kwli-' :ne.

'Joseh-: 'dekorn: :Mehle'-: on kpa :Yusu' 'de Nyorsoa 'kwa :po 'da

²² :Yee' :yeh ti nyni-a 'o, 'Joseh-: 'dekorn: :Mehle'-: on 'ye-a :kane' dih :za, :ka :Mose'-a' 'tele' no-a mu-a', :yee' on 'duo: 'yu-' 'weh, on kpa-or :Julu'slehn:, on 'ye-or' 'de :Gwlor :baa' 'kwa po,

²³ :ka eh no-a 'chle-eh 'de :Gwlor :baa'-a' 'tele'-chlee-deh 'di, eh no-a, :Zai'-nyor⧾-kpalu⧾-nynuu-a' klehkpeh-: 'dekorn: nimi⧾-a' :zai'-nynuu-a' gblor⧾ ne-: :an mu-a 'wluh-:, on :korn on 'ye 'de :Gwlor :baa' 'kwa 'dhu-eh:.

²⁴ 'De on mu :ke, on 'ye gban 'i 'dhu-dih:, pabu'⧾ 'sororn'-: :eh beh 'gbole'e-nynuu 'sororn'-: :en no-a deh :Gwlor :baa'-a' 'tele'-chlee-deh 'da-a 'do deh :dao' bo, on 'ye-eh' no.

²⁵ :Yee' 'do ti :dao' 'di, eh :korn 'yu :due' an 'da-dih-a 'Simior, :or 'ti-a :Julu'slehn. Or no Nyorsoa-nyor: 'jeh, :or 'sleh-a 'i. Or-: fuo nyor⧾ 'puh-dih-nyor: :or :korn-a wlu Nyorsoa po-a :dhama'-' :or 'ye-a' 'Ezlea-nyor⧾ 'puh-dih:. 'De Gban 'i :ne :Zulu :ne 'o or bo.

²⁶ Gban 'i :ne :Zulu: :dao', mo-: no-eh, 'de or yubo-eh, :ka or :se-a' 'meh-: i, 'de or 'ye-a' :Gwlor :baa'-a' 'taan'-yu 'ye :weh, 'de jorwor: or 'ye-a 'meh.

²⁷ Gban 'i :ne :Zulu: 'o, mo-: :na-dih-or, 'de or mu 'o Nyorsoa-a' 'sla ybei' :mu, ti :Mehle'-: 'dekorn: 'Joseh-: on kpa :Yusu'-a' :bleheh'eh: neh 'de mor, on 'ye-a deh :Mose'-a' 'tele' 'da-a an no-a :chio'lo:, on 'ye-eh' no, 'do or bo.

²⁸ :Yee' 'Simior 'duo: :Yusu'-' 'weh, 'de or 'wla-or son⧾-' dih, 'de or po Nyorsoa-a' 'nyne ya, or 'da,

²⁹ :Gwlor :baa' Nyorsoa, wlu :on po-a :dhama'-' 'de 'on bo, on 'kpa-' dhih 'jeh 'zean'. :Yee' :kana :naa, no-eh, 'de 'mor :or 'dhu-a :an-a'a: 'bhoi-yu-', 'on 'ye :forn 'da mu, 'de :ka 'jeh nor 'di.

³⁰ Deh no-eh, 'an 'jeh-a' 'yli-eh: 'ye nyor :on dbo-a :or 'ye-a nyor⧾ 'puh-dih: 'weh,

³¹ :yor :on 'nyi-a :gwlor-nyor⧾-a' klehkpeh, on 'ye-a' 'ye.

³² Or no zorn-pli: :en mu-a nyor⧾ :on :se-a :Jueh'-nyor⧾ dhih-a' 'yor-eh 'i :to-dih:, 'de :en :ya-a: 'de dhih-a' 'i 'beh-a' 'do 'Ezlea-nyor⧾ :on 'dhu-a :an-a' nyor⧾-' bo.

³³ :Yee' :yeh 'yu :baa'-: 'dekorn: or 'de-: on 'worn-a deh 'Simior :za-a-' 'do or-a' dhih bo, :yee' an-a' :porluh⧾ 'ma-'.

³⁴ 'De 'Simior po-uh :bhorlie' bo, 'de or :wlu 'de 'yu 'de :Mehle' bo, or 'dae:, 'Yu :daa, Nyorsoa :dhe-dih-or 'for 'i, or 'ye-eh' no, :gwlor-nyor:⧾ :doru' 'ye dih 'ga, 'de nyor⧾ :dhulu' 'ye-' :sorn, 'do 'Ezlea-bluhba ken. Or-: mu 'yi :to-dih-deh :no, :eh 'wluh-a 'de Nyorsoa bo, :eh :gwlor-nyor:⧾ :doru'-a mu-a 'bhun dih :wlu-dih:.

³⁵ :Yee' eh-: mu-eh :no, 'de :gwlor-nyor:⧾ :doru'-a' 'dlu 'di dih :na-dih-deh⧾ 'ye ken :nyeh. 'De mor :ke :porluh-a' puhbeh: :eh gweh-a :ka :bhla 'jlehn-a tba-a nyor, eh mu :an-a' :porluh puhba: :ke.

³⁶ :Yee' 'nynor :or no-a Nyorsoa-a' wele-eh: :po-nyor, an 'da-dih-a :Ana', or-: :ne 'o :ke. Or no :Fanoeh'-a'a: 'nynor-kpao'-yu:, :or 'wluh-a 'de 'Aseh-a' 'cheh-dlu 'nyne-'. Or no 'nynor :bholuh :gela' :or 'ti-a nyina 'do zon⧾ :meheh' 'sorn 'di 'klein',

³⁷ 'de :or no-a :dhoba: 'nynor :or se-a nyina 'ti, :eh 'wluh-a 'o ti or-a'a: yibeor 'meh-dih:-a, 'de :eh :yeh-dih:-a or-a' zon⧾-a' :kwlaa :meheh' na 'yor :nyieh ken. 'Nynor :dao', or :se 'o Nyorsoa-a' 'sla ybei' 'wluh, 'do ti-a' klehkpeh bo. Jorwor: 'gwie-: :glaa'e-: or za Nyorsoa-a' :weheh', 'de or pa 'suehn-', 'de or wlu 'de Nyorsoa bo.

³⁸ :Yee' 'do :dha :ne-a :due', or mu 'o on bo, or po Nyorsoa-a' 'zio. 'De or :za 'yu :bleheh'eh: :dao', or-a' dhih-', 'de nyor⧾-a' klehkpeh bo, :an fuo-a ti Nyorsoa-a mu-a :Julu'slehn zelie:.

'Joseh-: :Mehle'-: 'dekorn: :Yusu'-: on mu 'Nazla de

³⁹ :Yee' :yeh :Mehle'-: 'dekorn: 'Joseh-: on gweh-a deh⧾-a' klehkpeh :Gwlor :baa'-a' 'tele' 'da-a, en-' no-a' 'i, :yee' on mu on 'bli 'Nazla-gwlor-', :or :ne-a 'de :Galali'i-bluhba ken de.

⁴⁰ :Yee' 'yu :dao', or ku-', or 'kpa-' nyor 'jeh, 'de or ku dih. Or 'ble :toror' :dhulu', 'de Nyorsoa-a' :bhorlie' :ne 'o or bo.

Nyor-kpalu-yu: :Yusu'-: 'dekorn: nyor⧾ deh :torne-nyor⧾-:

⁴¹ :Yee' zon 'o zon, or 'de-: 'dekorn: or :baa'-: an mu :Julu'slehn:, an mu 'Meh-a' :bla-dih: 'dlu dih-gor 'dhu 'da.

⁴² :Yee' :yeh or no-a zon⧾-a' :bhue: 'yor :ne-a 'sororn', :yee' on mu-' gor :dao' 'weh, :ka an no-a :dee' :chio'lo:.

⁴³ :Yeh gor :jla-a, 'de an yi-a on 'bli de, :yee' :Yusu' :sie: 'de on 'de 'weh, 'de :Julu'slehn. Jorwor: or 'de-: 'dekorn: or :baa'-: on se-eh 'i yubo: :ka or :sie:-a 'de.

⁴⁴ :Mor on :taa 'ye :dee', :yee' on 'da, or :ne 'de nyor⧾ :ne an na-a :gwie :due' bo 'klu-'. Eh-: no-eh, 'de on :na 'we-eh :due' :gwie-', 'de jorwor: on 'kpa 'o or-a' 'kwla⧾-' dih 'bhorn 'da, 'de an-a'a: 'wluh-a-nyor⧾-: 'dekorn: on 'bei'-: 'klu-'.

⁴⁵ :Yeh on se-or 'ye, :yee' on mu :Julu'slehn de, on 'ye-or 'kwla⧾-' dih 'bhorn.

⁴⁶ :Yee' :yeh 'we taan zi-a, :yee' on 'ye-or' 'do Nyorsoa-a' 'sla ybei', or :dhe dih 'de nyor⧾ deh :torne-nyor⧾ 'klu-', or to-uh :dou'⧾ bo, 'de or dhele-uh deh⧾ :nee' dih.

⁴⁷ Nyor⧾-a' klehkpeh :on 'worn-a or-a' wlu, eh :florn-dih-uh-: worn, 'do or-a' dhih yubo-eh-: 'dekorn: deh⧾ an dhele-or dih-: en-' gbor :za-eh bo.

⁴⁸ :Yee' :yeh or 'de-: 'dekorn: or :baa'-: on 'ye-or, :yee' eh :florn-dih-uh-: worn. 'De or 'de :wlu 'de or bo, or 'dae:, 'An 'yu. :Eh :korn dhih :on no :ao', :a-a' dhih :eh? :Gbee'e:. :On :baa'-: 'dekorn: 'mor-: :a 'bhorn :on 'kwla⧾-' dih, 'de :a-a' :porluh⧾-a 'beh-dih: :a 'worn dih 'suh.

⁴⁹ :Yeh or 'da :ao', :yee' :Yusu' 'dae:, :Eh :korn dhih, 'de a 'bhorn 'on 'kwla⧾-' dih :eh? A se-eh yubo: :ka 'on :korn 'on 'ye-a 'de 'On-ba-a' 'gbu 'zorn :ne :e?

⁵⁰ Jorwor: deh or :za-a-', 'de on bo, on se-eh-' dih 'worn.

⁵¹ :Yee' or zi 'o on klei' 'weh, 'de on mu 'Nazla, 'de or dhe 'o an-a' wlu dih. Jorwor: or 'de 'ble-dih: deh⧾-a' klehkpeh :daa :gwlii' :chio'lo: 'do or-a' :porluh ken.

⁵² :Yee' :Yusu' 'kpa-' nyor :klaba', 'de or-a' :toror' 'kpa ken. :Yee' or 'pehn-dih Nyorsoa-: 'dekorn: :gwlor-nyor⧾-: an-a' :porluh⧾-: dih deh 'jeh.