2 'Tehsolo'nika-chlee-deh: 3 - Kuo :Dele'

A :wlu 'de Nyorsoa bo 'do :a-a' dhih bo

¹ :Yee' eh-a' klehkpeh-a' 'dlu-' :jla 'da, :a-a' 'Klae :de-di'-boi'-a:, a :wlu 'de Nyorsoa bo, 'do :a-a' dhih bo, 'de tubo-wlu:⧾ :a po-a, :en kor-a :Gwlor :baa' 'i, en 'ye 'dhobo: en 'ye deh⧾-a' klehkpeh 'dlu gweh, 'de nyor⧾-a' klehkpeh 'ye-ih' dih kpon, 'de deh-' 'ye ka 'di, :ka en :ne-a 'de a 'nyne-' :ke.

² A :wlu 'de Nyorsoa bo :ke, 'de :a :ne 'de deh⧾-zon:⧾ :no-nyor⧾-: 'dekorn: 'kulu-nyor⧾-: 'kwa 'kpa. Deh no-eh, eh :se nyor⧾-a' klehkpeh, mo-: po tubo-wlu:⧾ :daa dhih 'jeh-' :deh.

³ Jorwor: :Gwlor :baa' no :dhehehn-nyor:. Or mu a dih :ku-dih:, 'de or 'ye 'o a bo dih pobo:, 'kulu-deh :ne 'o a bo yi.

⁴ :Yee' or-: no-eh, 'de :a :kpa-dih: a :gwluhuh', :ka deh⧾ :a zela: a :gwluhuh', a no-ih-a, 'de mor a mu en-' no-a' 'dlu bo :kpa 'gboror:.

⁵ 'Nyi :Gwlor :baa' no-eh, 'de a 'ye Nyorsoa-' :ybeh. 'De a 'ye :ao', a se sea, :ka 'Klae no-a :ke.

'Klae-a' dhih 'jeh-' :po-nyor⧾-a' klehkpeh on :korn on 'ye :koan no

⁶ :Yee' :a-a' 'Klae :de-di'-boi'-a:, :a zela a :gwluhuh' 'de :Gwlor :baa' :Yusu' 'Klae-a' 'nyne 'di, a 'ye 'Klae :de-di'-boi'-a' klehkpeh :on :ne-dih:-a vlaan 'kmo bo dih :tehn-dih:, 'de :on se-a 'o 'tele' :a :torne-uh-a klei' zi.

⁷ A-a' 'jeh 'yor-eh:, a yubo-eh' deh 'jeh, deh :a no-a, eh-: a :korn a 'ye no :ke. Ti :a :ne-a 'o a bo, :a-a' no vlaan-deh⧾.

⁸ Dii-deh⧾-a' klehkpeh a 'nyi :a-uh, :a dhen-ih'. :A no :koan: 'gabaa, eh :zi 'o ken dih, :a :ne-' a-a' nyor 'dlu :dhe, eh-: :korn dhih :a no :koan 'gwie-: :glaa'e-:.

⁹ Eh :se, :a se :korn :a 'ye a deh 'yba-dih: eh-: :korn dhih :a no-eh :deh. Jorwor: :a no-eh', 'de a 'ye 'o :a-a' 'gor klei' zi :dhih 'o.

¹⁰ Ti :a :ne-a 'o a bo, :a zela: a :gwluhuh' 'weh, 'do ti-a' klehkpeh bo, :a 'da, Nyor :or se-a :koan: :no-dhih 'worn-dih:, nyor-a' 'worn-:-' or-a' :di-' deh.

¹¹ Deh :korn-a dhih :a :za-a deh :daa-', eh-: 'dhu, :a 'worn-ih' :ka nyor⧾ :noo'-a no-a vlaan-deh⧾ 'de a 'nyne-'. An-a' 'worn-dih: :koan: :no-dhih. Jorwor: an po nyor⧾-a' dhih buh 'di.

¹² Eh-a' nyior-tu:⧾ :dao', :a 'nyi-uh 'tele' 'de :Gwlor :baa' :Yusu' 'Klae-a' 'nyne 'di, 'de :a 'dhu-uh 'slen, on 'ye :dha :due' dih :dhe, on 'ye an-a' 'jeh-a' dii-deh⧾-a' :koan no.

¹³ :Yee' a :mor :mloror', 'an 'Klae :de-di'-boi'-a:, a 'bor sea-a' 'do deh 'jeh-a' no-a' bo.

¹⁴ :Yee' :mor eh 'dhu nyor se 'o 'tele' :eh :ne-a 'noror 'chlee-deh: :daa 'di dih dhe, :yee' a 'dhu-or 'yli-eh bo, or :ne a-a' nena:-' bo, 'de eh 'ye-or' dhen-' dih po.

¹⁵ Nyor-a' 'duo-or' 'nyeh-eh-dih-nyor: ka. Jorwor: a 'dhu-or 'slen :ka a mu-a a-a' 'de-di'-a' 'slen 'dhu-eh:-' :no :dee'.

'Bor-dih: 'o-wlu:⧾

¹⁶ :Yee' 'nyi :Gwlor :baa' :or 'nyi-a nyor⧾ wlu-' dih 'worn-eh or-a' 'jeh 'yor-eh, 'nyi a wlu-' dih 'worn-eh: 'do ti-a' klehkpeh bo-: 'dekorn: 'de deh⧾-a' klehkpeh 'di-:. :Yee' 'nyi or :ne 'o a-a' klehkpeh bo.

¹⁷ 'Mor :or 'dhu-a :Poror'-', 'an 'jeh 'yor-eh-a' son, mo-: 'on no 'de 'on 'chle-a 'yee'-wlu:⧾ :daa bo. 'Ka-: 'an no 'an 'nyne-a' 'chle-a' 'do 'an-a: 'chlee-deh⧾-a' klehkpeh-a' 'dlu-' :jla 'da. 'Ka-: 'an no en-' 'chle-a'.

¹⁸ 'Nyi :a-a' :Gwlor :baa' :Yusu' 'Klae-a' mla :ne 'o a-a' klehkpeh bo.