1 'Tehsolo'nika-chlee-deh: 2 - Kuo :Dele'

:Koan: :Poror' no-a 'de 'Tehsolo'nika-gwlor 'di

¹ :Yee' :a-a' 'Klae :de-di'-boi'-a:, a-a' 'jeh 'yor-eh:, a yubo-eh', :a :se-' a 'ye 'da yi yaa'e.

² A-a' 'jeh 'yor-eh:, a yubo-eh' :ka on no-a :a-a' 'kle 'ye-dih-eh, 'de on no-a :a-a' 'jle-dih-eh 'de :Fele'pa-gwlor:-', 'de jorwor: :a mu-a 'de a bo :yi. Keen' :mloror' nyor⧾ :doru' mo-: :se-' :a-a' dhih 'worn-dih:. Jorwor: :a-a' Nyorsoa po :a 'kpih bo, :a 'ye tubo-wlu:⧾ 'jeh :daa :en 'wluh-a 'de or bo po, 'de a bo.

³ :Yee' :mor eh 'dhu :a :taa Nyorsoa-a' dhih-' za 'de a bo, 'de :a :taa 'de 'kpih po, a 'ye-ih' dhih 'jeh-' po, :a-a' 'tmo sih, :a-a' :po-dih: nyor⧾ 'sleh dih, 'de mor :a-a' :bo-dih: nyor⧾ dih.

⁴ Jorwor: :ka Nyorsoa 'bhorn-a :a 'ye-a' :wlu-a' no, 'ka-: :a no :wlu-a'. Deh no-eh, or dhe :a :gwlii', 'de or 'duo: :a-uh, or po 'de or-a' tubo-wlu:⧾ 'jeh 'de :a 'kwa. :A :se-eh' no, :a 'ye :gwlor-nyor⧾-a' :porluh⧾ dih 'pehn-dih:. Jorwor: Nyorsoa :or pobo-a 'o :a-a' :porluh⧾ ken, or-a' :porluh: mo-: :a 'bhorn :a 'ye dih 'pehn-dih:.

⁵ A yubo-eh' deh 'jeh, :a :se 'de yi, :a 'ye a dhih bo po, :eh gweh-a :ka :a 'bhorn-a deh 'de a 'kwa :deh. Eh :se :a 'bhorn deh 'de a 'kwa :deh, eh-: :korn dhih :a po Nyorsoa-a' tubo-wlu⧾ 'de a bo :deh. Nyorsoa yubo: deh :a no-a 'weh.

⁶ :A :se-' deh⧾ no, a mor-: :korn mor nyor⧾ :noo'-: a 'ye :a dhih bo po.

⁷ Keen' :mloror', :ka :a 'dhu-a :Yusu'-a'a: dboo-nyor⧾-', :yee' :a :bleh-dih-eh 'i :dee', :a 'ye a deh 'yba-dih:. Jorwor: :a-a' :porluh⧾ :nmor worn ti :a :ne-a 'o a bo. Eh-: no-eh, 'de :a pobo 'o a bo dih, :eh gweh-a :ka 'de-a pobo-a 'o or-a'a: 'nynuu bo dih.

⁸ :Yee' :ybeh-eh: :a 'ble-a 'do a bo, eh-: no-eh, 'de :mor eh 'dhu deh-', 'de :a 'worn-dih-eh ken dih, :a 'ye :a-a' 'jeh 'kwla :za, :a 'ye 'meh, 'do a-a' dhih bo. Eh :se Nyorsoa-a' tubo-wlu:⧾ 'jeh :due', me-: :a 'ye-ih a :torne: :deh. Deh no-eh, :a :ybeh a-uh' 'weh 'gabaa.

⁹ Keen' 'jeh ka, :a-a' 'Klae :de-di'-boi'-a:, a yubo-eh' :ka :a no-a :koan: :no-eh 'gabaa, 'de eh zi-a 'o ken dih. Deh :korn-a dhih :a no-a :koan, 'gwie-: :glaa'e-: eh-: 'dhu :a :se-' 'bhorn :a 'ye a 'dlu :dhe ti :a po-a Nyorsoa-a' tubo-wlu:⧾ 'jeh 'de a bo.

¹⁰ A-a' 'jeh 'yor-eh yubo: deh :a no-a 'weh, 'de mor Nyorsoa yubo: deh :a no-a 'weh :ke. Ti :a :ne-a 'de a :mor :or 'dhu-a 'Klae-a' dhih 'jeh-' :po-nyor⧾ bo, :a :gweh-' :vlehehn', 'de :a no 'yi 'sleh-deh⧾, 'de mor a se 'beh-dih: a 'ye :a dhih-zon⧾ 'bhun-' :za-dih:.

¹¹ A yubo-eh' :a :za-dih: a-a' klehkpeh :daa 'weh, :ka 'nynuu :baa' no-a or-a'a: 'nynuu-' :za-dih-eh.

¹² :A po a 'kpih bo 'weh, 'de :a dhe a :porluh⧾ 'di dih, 'de :a zela: a :gwluhuh' deh 'jeh 'gboror:, a 'ye 'kmo :an 'pehn-dih-a Nyorsoa-a' :porluh dih 'kmo-' :ne-dih:, :or 'da-a a-uh, a 'ye-a 'for 'ble 'noror or-a' 'jeh-a' nyor⧾ wlu 'ken :korn-eh 'di-: 'dekorn: or-a' dhih-a' 'i 'beh-a' 'di-:.

¹³ Deh :neheh' :ne 'o, eh-: :korn dhih :a po Nyorsoa-a' 'zio 'do ti-a' klehkpeh bo. Ti :a po-a Nyorsoa-a' tubo-wlu⧾ 'de a bo, a 'worn-ih', 'de a kpon-ih dih. A kpon-ih-: dih :ka nyor-a kpon-a Nyorsoa-a' tubo-wlu⧾ dih, :en :se-a :gwlor-nyor⧾-a' :ne. Keen', en no Nyorsoa-a' tubo-wlu:⧾ 'jeh ka. 'De a :mor :or po-or dhih 'jeh-', Nyorsoa-a no :koan: 'de a-a' 'kmo :ne-eh 'di.

¹⁴ :Yee' :a-a' 'Klae :de-di'-boi'-a:, deh :eh :no-eh 'de Nyorsoa-a' 'chore-nyor:⧾ :on :ne-a :Judi'a-bluhba ken bo, :on no-a nyor⧾ :on :ne-a 'de, :on :korn-a 'de :Yusu' 'Klae bo. Eh :no-eh: :ke 'do a bo, a-a' 'jeh 'yor-eh-a' nyor⧾ :on :ne a 'ti-a dha a 'bli-bluhba ken, mo-: 'ye-dih: a 'kle. 'Ka-: :Jueh'-nyor⧾ no :ke, 'de on 'ye-dih: 'chore-nyor:⧾ :dao' 'kle :ke.

¹⁵ Mo-: :ne-a :due', mo-: 'dba :Gwlor :baa' :Yusu'-: 'dekorn: Nyorsoa-a' wele-eh: :po-nyor⧾-:. 'De on no :a dih. An po Nyorsoa-a' 'chehn-' 'gabaa. On 'nyeh nyor⧾-a' klehkpeh-' 'weh.

¹⁶ An-a' 'jeh, an vorn-' on 'ye :a 'borboa' 'i po, :a 'ye Nyorsoa-a' tubo-wlu:⧾ :po-eh 'bor 'de nyor⧾ :on :se-a :Jueh'-nyor⧾ bo :en mu-eh :no 'de on 'ye-a' 'puh. Deh⧾-zon⧾-a' klehkpeh on 'duo:-a no-a', deh-zon: :yeh :daa, on 'bor-dih:-a 'o, eh-: zi 'o en-' klehkpeh-'. 'De :kana :naa Nyorsoa-a' 'chehn-yuba 'bili: 'de on bo 'weh.

:Poror' 'bhorn or 'ye 'Tehsolo'nika-nyor⧾ 'ye :neheh'

¹⁷ Jorwor: :a :mor :mloror', 'Klae :de-di'-boi'-a:, ti :a :tehn-dih: a bo dih 'do ti-kpor-bei 'di, keen' :mloror' :a-a' 'jeh 'yor-eh-a' nyior-tu :se 'de a bo :ne, jorwor: :a na-dih a-a' dhih :gwluhuh' dih 'weh 'do ti-a' klehkpeh bo. :A 'bhorn :a 'ye-a a 'ye 'gabaa. Eh-: :korn dhih :a vorn :a 'ye a 'ye :neheh'.

¹⁸ :A 'bhorn :a 'ye a 'ye 'da yi :dee'. 'An 'yor-eh:, 'on vorn-' 'do ti :dhulu' 'di, 'on 'ye 'de yi. Jorwor: 'ku-a' 'worn.

¹⁹ Eh :se a :mor :or se-eh no 'de :a :se-' deh :gwlii' :dhe-eh-: 'mona-: 'dekorn: :a-a' 'jeh 'i 'beh-dih-eh-: 'ble-: i, 'do :a-a' :Gwlor :baa' :Yusu' ybei' 'do 'we-eh: or mu-a 'de :ya 'di :e?

²⁰ Keen' 'jeh ka, a :mor 'beh-dih: :a-a' buh⧾ 'i, 'de a po :a 'mona 'di.