ಫಿಲಿಪ್ಪಿಯೆರೆಗ್ 2 - ಪೊಸ ಒಡಂಬಡಿಕೆ

ಕ್ರಿಸ್ತನ ನಡತೆ ಉಪ್ಪಡ್

¹ ಕ್ರಿಸ್ತಡ್ದ್ ಉಮೇದ್ ಉಂಡಾಪಿನಾಂಡ, ಆಯ ಪ್ರೀತಿಡ್ದ್ ಆಧರಣೆ ತಿಕ್ಕುನಾಂಡ, ಪರಿಶುದ್ಧಾತ್ಮಡ್ ಅನ್ಯಮನ್ಯ ಉಂಡಾಪಿನಾಂಡ, ನಿಕ್ಲೆ ಉಡಲ್ ಮೆದುಲಾ ಕನಿಕರದವುಲಾ ಉಪ್ಪುನಾಂಡ

² ನಿಕುಲು ಒಂಜೇ ಮನಸ್‌ದಾಕುಲಾದ್, ಒಂಜೇ ಪ್ರೀತಿ ಉಪ್ಪುನಾಕುಲಾದ್ ಅನ್ಯಮನ್ಯೊಡು ಇತ್ತಿನಾಕುಲಾದ್ ಅಂಚೆನೇ ಒಂಜೇ ಅಭಿಪ್ರಾಯದಾಕುಲು ಆದಿತ್ತ್‌ದ್ ಎನ ಸಂತೋಷೊನು ಪೂರ್ತಿ ಮಲ್ಪುಲೆ.

³ ಸ್ವಾರ್ಥದಾಕುಲಾವಡೆ, ನನೊರಿಯನ್ ಮೆಚ್ಚಾವೆರೆ ಪೋವಡೆ, ತಗ್ಗಾವೊನ್ಲೆ, ನನೊರಿಯನ್ ತನ್ಕುಲೆಡ್ದ್ ಹೆಚ್ಚ್‌ದಾಕುಲು ಅಂದ್‌ದ್ ಎನ್ನ್‌ಲೆ.

⁴ ನಿಕ್ಲೆಡ್ ಪ್ರತಿ ಒರಿಲಾ ತನ ಎಡ್ಡೆನ್ ಮಾತ್ರ ತೂವಂದೆ ಬೊಕ್ಕೊರಿಯನ ಎಡ್ಡೆನ್ಲಾ ತೂವೊಡು.

⁵ ಕ್ರಿಸ್ತ ಯೇಸುಡು ಇತ್ತಿನಂಚಿನ ಮನಸ್ ನಿಕ್ಲೆಡ್ಲಾ ಉಪ್ಪಡ್.

⁶ ಆಯೆ ದೇವೆರೆ ರೂಪೊಡು ಉಪ್ಪುನಾಯೆ ಆದಿತ್ತ್‌ಂಡಲಾ, ದೇವೆರೆಗ್ ಸರಿ ಸಮಾನ ಆದಿತ್ತಿನ ಪಧವಿನ್ ಬುಡ್ಪುಜಿ ಪಂಡ್ದ್ ಪನಂದೆ,

⁷ ಐತ ಪಗತೆಗ್, ತನ ದೈವಿಕ ಪದೊನು ಬುಡ್ದು ಕೊರ್ದು, ದಾಸನ ರೂಪೊನು ದೆತ್ತೊಂದು ನರಮಾನಿ ಆದ್ ತೋಜಿದ್ ಬತ್ತೆ.

⁸ ಇಂಚ ಆಯೆ ನರಮಾನಿ ರೂಪೊಡು ತೋಜಿದ್ ಬತ್ತಿನಪಗ, ಆಯೆ ತನನ್ ತಗ್ಗಾವೊಂದು ಮರಣ ಮುಟ್ಟ ಪಂಡ, ಕ್ರುಸ್ಸುದ ಮರಣದ ಮುಟ್ಟ ಒಪ್ಪಿಸಾದ್ ಕೊರಿಯೆ.

⁹ ಈ ಕಾರಣೊಡ್ದು ದೇವೆರ್ ಆಯನ್ ಮಿತ್ತ್‌ದ ಮಾನಾದಿಗೆದ ಸ್ಥಾನೊಗು ಏರಾದ್, ಮಾತ ಪುದರ್‌ಡ್ದ್‌ಲಾ ಮಿತ್ತ್‌ದ ಪುದರ್‌ನ್ ಆಯಗ್ ಕೊರಿಯೆ.

¹⁰ ಅಂಚಾಯಿನೆಡ್ದ್ ಪರಲೋಕ, ಭೂಮಿ, ಭೂಮಿದ ತಿರ್ತ್ ಉಪ್ಪು ಮಾತೆರ್ಲಾ ಯೇಸು ಇನ್ಪಿ ಪುದರ್‌ಗ್ ಮೊರಂಪೂರ್ದು,

¹¹ ಯೇಸು ಕ್ರಿಸ್ತನ್ ಕರ್ತವೆ ಅಂದ್‌ದ್ ಮಾತ ನಾಲಯಿ ಅರಿಕೆ ಮಲ್ತ್‌ದ್, ಅಮ್ಮೆ ಆದುಪ್ಪು ದೇವೆರೆಗ್ ಮೈಮೆನ್ ಸಂದಾವೆರ್.

ಕ್ರಿಸ್ತಗಾದ್ ಬೊಲ್ಪು ಕೊರ್ಪಿನವು

¹² ಅಂಚಾಯಿನೆಡ್ದ್ ಪ್ರೀತಿದಾಕುಲೇ, ನಿಕುಲು ಎನ ಪಾತೆರೊಲೆನ್ ಏಪಲಾ ಕೇಂಡಿಲೆಕ್ಕ ಇತ್ತೆಲಾ ಕೇನ್ಲೆ. ಯಾನ್ ನಿಕ್ಲೆಡೊಪ್ಪ ಉಪ್ಪಂದಿನಪಗಲಾ ದಿಂಜ ಪೋಡಿಗೆಡ್ ನಡುಗುನಾಕುಲಾದ್ ನಿಕ್ಲೆ ರಕ್ಷಣೆದ ಫಲೊನು ತೋಜಾವೆರೆಗ್ ಪ್ರಯತ್ನ ಮಲ್ಪುಲೆ.

¹³ ದಾಯೆಗಂದ್ಂಡ ದೇವೆರ್ ನಿಕ್ಲೆಡ್ ಬೇಲೆ ಮಲ್ತ್‌ದ್, ಆಯಗ್ ಮೆಚ್ಚಿಗೆ ಇತ್ತಿನೆನ್ ಮಲ್ಪುನ ಆಸೆನ್ ನಿಕ್ಲೆಡ್ ಪುಟ್ಟಾದ್ ಐಕ್ ಬೋಡಾಪಿ ತ್ರಾಣೊನು ಕೊರ್ಪೆ.

¹⁴ ಗುಣುಗುಟ್ಟಂದೆಲಾ ವಾದ ಮಲ್ಪಂದೆಲಾ ಮಾತೆನ್ ಮಲ್ಪುಲೆ.

^15-16 ಅಪಗ ನಿಕುಲು ತಪ್ಪುದಾಂತಿನಾಕುಲಾದ್‌ಲಾ ಯಥಾರ್ಥ ಮನಸಿತ್ತಿನಾಕುಲಾದ್‌ಲಾ ವಂಚನೆದ ದುಷ್ಟ ಜನೊಕುಲೆ ನಡುಟು ದೇವೆರೆ ಕಲಂಕ್‌ದಾಂತಿನ ಜೋಕುಲಾಪರ್. ನಿಕುಲು ಮಾತೆರೆಗ್ಲಾ ಜೀವದ ಪಾತೆರೊಲೆನ್ ತೋಜಾದ್ ಕೊರ್ಪಿನಾಕುಲಾದ್ ಲೋಕೊಡು ಮಿಂಚುನ ಬೊಳ್ಳಿದಲೆಕ್ಕ ತೋಜಿದ್ ಬರ್ಪರತ್ತಾ. ಇಂಚ ನಿಕುಲು ನಡತರ್ಡ ಯಾನ್ ಮಲ್ತ್‌ದಿನ ಸಾದನೆಲಾ ಬೇಲೆಲಾ ಪ್ರಯತ್ನಲಾ ವ್ಯರ್ಥ ಆತಿಜಿ ಪನ್ಪಿನ ಹೆಮ್ಮೆ ಕ್ರಿಸ್ತನ ದಿನೊಟು ಎಂಕ್ ಉಂಡಾಪುಂಡು.

¹⁷ ನಿಕ್ಲೆನ ನಂಬಿಕೆ ಪನ್ಪಿ ಬಲಿನ್ ದೇವೆರೆಗ್ ಅರ್ಪಣೆ ಮಲ್ಪುನ ಸೇವೆಡ್ ಯಾನೇ ನೀರ್‌ದ ಲೆಕ್ಕ ಕರಗ್‌ದ್ ಬಲಿ ಆವೊಡಾಂಡಲಾ ಎಂಕ್ ಸಂತೋಷ.

¹⁸ ಅಂಚೆನೇ ನಿಕುಲುಲಾ ಸಂತೋಷ ಮಲ್ತ್‌ದ್ ಎನಡೊಪ್ಪ ಸಂತೋಷ ಮಲ್ಪುಲೆ.

ತಿಮೋಥಿ ಬೊಕ್ಕ ಎಪಫ್ರೊದಿತೆ

¹⁹ ಆಂಡ ಕರ್ತವೆ ಆದುಪ್ಪು ಯೇಸುನ ಚಿತ್ತ ಇತ್ತ್ಂಡ, ಯಾನ್ ನಿಕ್ಲೆ ಕೈತಲ್‌ಗ್ ತಿಮೋಥಿನ್ ಬೇಗೊಡು ಕಡಪುಡೊಡು ಅಂದ್‌ದ್ ಉಲ್ಲೆ. ಆಯಡ್ದ್ ನಿಕ್ಲೆ ಸಂಗತಿಲೆನ್ ತೆರಿದ್ ಎಂಕ್ ಸಂತೋಷ ಆವು.

²⁰ ಆಯ ಲೆಕ್ಕ ಕಪಟದಾಂತೆ ನಿಕ್ಲೆ ಎಡ್ಡೆ ಕಾರ್ಯೊಲೆ ಬಗೆಟ್ ಯಥಾರ್ಥತೊಡು ಚಿಂತೆ ಮಲ್ಪುನಾಕುಲು, ಎನ ಕೈತಲ್‌ ಬೇತೆ ಏರ್ಲಾ ಇಜ್ಜೆರ್.

²¹ ಬೇತೆ ಮಾತೆರ್ಲಾ ಸ್ವಂತ ಕಾರ್ಯೊಲೆ ಮಿತ್ತ್ ಮನಸ್ ದೀಪೆರತ್ತಂದೆ, ಯೇಸು ಕ್ರಿಸ್ತನ ಕಾರ್ಯೊಲೆ ಮಿತ್ತ್ ಮನಸ್ ದೀಪುಜೆರ್.

²² ಆಂಡ ತಿಮೋಥಿ ಎಂಚ ನಡತ್ತ್‌ದೆ ಅಂದ್‌ದ್ ನಿಕುಲೇ ತೆರಿದರ್. ದಾಯೆಗ್ ಪಂಡ, ಮಗೆ ಅಮ್ಮೆರೆಗ್ ಎಂಚನಾ, ಅವ್ವೇ ತರೊಟು ಆಯೆ ಎನಡೊಪ್ಪ ಸುವಾರ್ತೆದ ಪ್ರಚಾರೊಗಾದ್ ಸೇವೆ ಮಲ್ತ್‌ದ್ ಯೋಗ್ಯದಾಯೆ ಅಂದ್‌ದ್ ನಿಕ್ಲೆಗ್ ಗೊತ್ತುಂಡು.

²³ ಅಂಚಾಯಿನೆಡ್ದ್ ಎನ ಸಂಗತಿಡ್ ದಾನೆ ಆವು ಪನ್ಪಿನೆನ್ ತೆರಿ ಕೂಡ್ಲೆ, ಆಯನ್ ಕಡಪುಡಿಯೆರೆ ಬಯಕುವೆ.

²⁴ ಬೊಕ್ಕ ಆಯಿನಾತ್ ಬೇಗ ಯಾನ್ಲಾ ನಿಕ್ಲೆನ್ ತೂವೆರೆ ಬರುವೆ ಪನ್ಪಿ ಭರವಸ ಕರ್ತವಡ್ ಎಂಕುಂಡು.

²⁵ ಎನ ಸಹಾಯೊಗು ಬೋಡಾದ್ ನಿಕುಲು ಕಡಪುಡ್ದಿನ ಎನ ಸಹೋದ್ರೆಲಾ ಜತೆಸೇವಕೆಲಾ ಜತೆಸೈನಿಕೆಲಾ ಆಯಿ ಎಪಫ್ರೊದಿತನ್ ನಿಕ್ಲೆ ಕೈತಲ್‌ ಕಡಪುಡುನ ಅಗತ್ಯ ಉಂಡು ಅಂದ್‌ದ್ ಎನ್ನಿಯೆ.

²⁶ ಆಯೆ ನಿಕ್ಲೆನ್ ತೂವೊಡು ಅಂದ್‌ದ್ ಆಸೆ ಮಲ್ಪುವೆ, ಆಂಡ ತಾನ್ ಸೌಖ್ಯದಾಂತಿನೆನ್ ನಿಕುಲು ಕೇಂಡ್ದರ್ ಅಂದ್‌ದ್ ತೆರಿದ್ ಆಯಗ್ ಬೇಜಾರ್ ಆಂಡ್.

²⁷ ಆಯೆ ಸೀಕ್‌ಡ್ ಬೂರ್ದು ಸೈಯೆರಾದಿತ್ತೆ ಪನ್ಪಿನವು ನಿಜನೇ. ಆಂಡ ದೇವೆರ್ ಆಯ ಮಿತ್ತ್ ದಯ ದೀಯೆರ್. ಆಯನ್ ಮಾತ್ರತ್ತಂದೆ ಎಂಕ್ ಒಂಜೆತ್ತ ಮಿತ್ತ್ ಒಂಜಿ ದುಃಖ ಆವಂದಿಲೆಕ್ಕ ಎಂಕ್ ಕರುಣೆ ತೋಜಪಾಯೆರ್.

²⁸ ಅಂಚಾಯಿನೆಡ್ದ್ ನಿಕುಲು ಆಯನ್ ತೂದು ಕುಡೊರ ಸಂತೋಷ ಆವೊಡು ಅಂದ್‌ದ್ ಬೊಕ್ಕ ಎಂಕ್‌ಲಾ ದುಃಖ ಕಡಿಮೆ ಆವೊಡು ಪಂಡ್ದ್‌ಲಾ ಆಸಕ್ತಿಡ್ ಆಯನ್ ಕಡಪುಡ್ವೆ.

^29-30 ದಾಯೆಗ್ ಪಂಡ ನಿಕುಲು ಮಲ್ಪೆರೆ ಆವಂದಿ ಸತ್ಕಾರೊಡು ಕೊರತೆ ಇತ್ತಿನೆನ್ ಪೂರ್ತಿ ಮಲ್ಪೆರೆಗಾದ್ ತನ ಜೀವದ ಆಸೆನ್ ಲಕ್ಷ ಮಲ್ಪಂದೆ, ಕ್ರಿಸ್ತನ ಸೇವೆಡ್ ಸೈಪಿನ ಸ್ಥಿತಿಡಿತ್ತೆ. ಆಯನ್ ಪೂರ್ತಿ ಸಂತೋಷೊಡು ಕರ್ತವ ಪುದರ್‌ಡ್ ಸೇರಾಲೆ. ಇಂಚಿತ್ತಿನಾಕುಲೆಗ್ ತಕ್ಕದ ಮರ್ಯಾದಿನ್ ಕೊರ್ಲೆ.