AJONJÜ 5 - ASII LAKDAP Bible (BSI)

Tiihangwan Mangchan Miitu Achujaü

¹ O Tatiwe lei, naishiq jamkho thenjen wan kai, kra ümtsan na tiitsang laq. Naishiq khushü jam tlaq ara liilaq.

² Naishiq tachong hupsam ka, wanwe jaqkhon mong niishe; pongmungti raq naihiqshong jiiwanto, raüta naishiq jam na tsangshiq sitlo.

³ Re raq naiwetiim wiita jiipbaiqto, Kra ningkhan naishiq ma anyungtiim, mantinyungre siisaq she.

⁴ Ümchaü sanha naishiq raq, kham kiimin kampho maq ri nyangchang she. Chin thamki tiikai kiimin kampho maq ri chang she.

⁵ Naishiq ka kumtoqkong ikha, riimakla kumtsong kong ikhli she. Maiqse raq sintsang doshat miili she jotlo, raüta jaqtiisham jamshatlo. Naishiq ka niitsi makaiq sitiikai. Shatmaq niitiitsak min tiinga mak.

⁶ Atra si miitu ramrit seakai Ejip mung na nai, Asiria mung na kikai.

⁷ Naititiim pat na ngarai tang wanto, shatmaq ümchaü tsangshiq ahü she. Naishiq ka tsangshiq ngarai kha na chamchao tiikai.

⁸ Ümchaü naimung rümti ka, dikong thaq na naolaqti raq pengtlo. Kra ningkhan tsangshiq jaqkhon mong wa, tsangshiq jaqkhon mong wa naishiq tiichhiketi maiq jumin ahü.

⁹ Maiqtseati kong riili she, hiqshong raprii mawanto, Ramtsi ma rum wa siqkhun theaseakai min tsaimiq khusiq lam miili she khumtiikai.

¹⁰ Songtsi ramtsi riili she pit wan kai, naikhum na tsidong rasong riilishe, winsii lumchang watum ikha, naikhum wiita khiim wanto.

¹¹ Re raq nainyungtiim ka, Jajon pum maq wiita haihii wanto. Juda mung hiqshong rap wa, naisetiim jechaksere wiita, ningkun maq lap raüta haihii wanto.

¹² Naimung wa mungtubi ka lap raüta, raü maq tiishak paq baiqto. Naimungti nyungwere ka, shummii laqpii lishe riiwanto.

¹³ Naimungti jerojongbi ka, dikong ikha tsamthaüketi miishe tiija wanto. Nosere maiqwesere ka hohotsi riili she pat raüta chamchaotlo.

¹⁴ Ümchaü nyungwere ka, ngongthun chang ba chela kilam chong na, ngamak she. Kiimaq jetu jerobi riimin shishun mak she,

¹⁵ Naishiq rilung na khoqriiq shishiiq ka ahü she, wiinum shewa la na, aho ajü walishe sitlo.

¹⁶ Man niiwa naishiq, liisaü wase rilung khushü thumto she. Naishiq raq ngarai tangkai, kriikha na ümchaü miqkai she.

¹⁷ Naishiq tsan nai mongjii bunchacha atsi, makphai rokwa rajun tang wa, mak min liilot mai she.

¹⁸ Jamkhano ngukla Jajon chela ka apaiq laqlaq li she, maiq min ahü she. Kiimaq chela rüm mong maq, miikakoi kong li she ngam rit phaq khumtlo.

¹⁹ Shatmaq O Tatiwe lei, ümniika pattup pat-sa hokham. Ümniiriika phangthum na saüli, mung mirüm wan haü.

²⁰ Ümniiraq naishiq ka jam nguto, rahiq luhea she miimbaiq wan laü? Ümniiraq naishiq ka, thongshi ri tsan na mitiima wan haü shea?

²¹ O, Tatiwe lei, naishiq ümwokhong na, jangshi ri shea wan nong laq! Richüpat wa lüwa khushü ka, naishiq ma jangkuq nong laq.

²² Shea, ümniiraq naishiq ka, pattup pat-sa miitu shea tiishaübaiq laü? ümtsankhiq walü ka, matki mak phan dea shea?