इःगीइ ङोःसी
दी इःगी पावलगीइ फीलीप्पी क्याःसाला एःक्योक युरोपकीइ तोःङगीइ कोःम्साला प्रुःदी एःके। फीलीप्पीदी माकेडोनीया लाःकेन रोमी क्याःल्खापकीइ क्याःसा चीग एःके। दी इःगी प्रुःगासुना पावल चेङाङला एःके ओःले प्रभुला सेमल्हुक लुगेन चीङ मीःक्याइ खुङला टाः पेःदेरा खुङला तुःक्पु नेच्युदी एःके। ओः तीःजीला फीलीप्पीइ कोःम्साला स्योप क्युःर्ती लोप्केन लेःगाक्या पेःदेरा एःके। ओःखोइ पेःगासुनाङ खुङ छाबाछुबे काःल्दी एःके। इःनाङ दी इःगीइ पेःगासुना केःदाङ ओःले सेमल्हुक बुक्योकदी पावलगीइ ख्रीष्टला लुक्योक नाःङ तीःङगीइ सेमल्हुककीइ पेःगासुना इःङे लाःनाङ ओःङे।
दी इःगीदी पावलला कोःकासुना खुङक्याइ रोः पेःक्योक सोङ्गारा प्रभुला सेमल्हुक लुगेन फीलीप्पीइ मीःक्याला थुजीछे तेर्चेला प्रुःक्योक एःके। ओःले दीखोरा मौकाला खुङ राःङला ओःले खुङक्याला तुःक्पु ओःङेन तीःजीलाङ खुङक्याला साहस ओःले भरोसा तेर्चेला दी इःगी प्रुःक्योक इःङे। खुङक्याइ राःङला ची सेम थेपा ओःखोरा तामक्या पेःदी ओःले घमण्ड पेःदी तेःचे भन्दा येशुइ नम्र चेपाक्या लोप्च्युक लाःती टेःदाम तेर्कुए। ख्रीष्टला एःक्योक खुङक्याइ मीःजीदी कोन्ज्योलाःम्ले ज्योर्केन वरदान इःङे। खुङक्याइ यहुदीक्याइ छ्येइ ठीमक्या ङीःन्दी दी मीःजी ज्योर्क्योक मीःङे, इःनाङ खुङक्याइ प्रभुला सेमल्हुक लुदी ज्योर्क्योक इःङे लाःती खुङगीइ टेःम्बा साल्च्युउए। खुङगीइ ख्रीष्ट ङीमु मीःजी ताङेन मीःक्याला कोन्ज्योलाःम्ले केःदाङ ओःले खाम्साङ्बु ज्योर्कुए लाःकेन तामक्याङ प्रुःदी एः।
दी इःगीइ प्रभुला सेमल्हुक लुगासुना ओःले ओःन्डुलेरा मीःजी ताङ्गासुना ज्योर्केन केःदाङ, भरोसा, डीक्ती तेःकेन ताम ओःले लेःगाला तेन्दुरा लाग्तीगेन तामक्याला माःङ्बु सेम तेर्क्योक सोङ्गारा दी इःगी राःङ्सा इःगीक्या भन्दा राःङ्सारा एः। दी इःगीला पावलगीइ फीलीप्पीइ कोःम्साइ मीःक्याला काःजे च्याःम्बु पेःउए लाःकेन ताम तेङ्तेर्ती एः।
थीमी सुची
इःगीइ ङोःसी १:१-११
पावलगीइ राःङगीइ तामक्या १:१२-२६
ख्रीष्टला एःक्योक मीःजी १:२७–२:१८
तीमोथी ओःले इपाफ्रोडीटसकीइ लागी तेःदाम २:१९-३०
टाः पेःगेनक्याला ओःले खतरामीःजीक थार्केन तामक्या ३:१–४:९
पावल ओःले फीलीप्पीइ रोःक्या ४:१०-२०
ताम सीःङ्देरा लाःक्योक ४:२१-२३
