फीलीप्पी 4 - स्युबापावलगीइ लोप्क्योक 1 ओः सोङ्गारा, ङाःइ च्याःम्बु पेःक्योक आतानोःक्या ओःले आजीनोःमोक्या, ङाः ख्याक्याला फ्रेचेला माःङ्बुरा सेम एः, चीलेलाःना ङाः ख्याक्याला च्याःम्बु पेःउए। ख्याक्याइरा ङाःला केःदाङ जोदी एः ओःले ख्याक्यारा ङाःइ ज्योर्कोःन इनाम इःङे। ङाःइ रोःक्या, ख्याक्या एःन्डुरा पेःदी प्रभुला राःम्बु पेःदी तेः। 2 इयोदीया रा सुन्तुखे ङीक्कारला प्रभुला डीक्ती तेः लाःती वासी पेःगे। 3 ङाःइ भरपर्दो ओःले ङाः ङीमुरा लेःगा पेःगेन रोः, ख्योइ ओः पेःन्पीःजा ङीला डीक्ती तेःचेला रोः पेःतेर लाःती वासी पेःगे चीलेलाःना ङाःइ याःबु लेःङ्गो फेल्गासुना खुङक्याइ ङाःला माःङ्बुरा रोः पेःदी एःके। ओःजे चीग्रा मीःङे खुङक्याइ क्लेमेस ओःले ङाःइ राःङ्सा रोःक्या ङीमुङ तुःक्पु पेःदी लेःगा पेःसी। खुङक्याइ मीःन नाःमाङ मीसीगेन मीःजीइ पेज्याला प्रुःदी एः। 4 प्रभुला तेन्दुरा केःदाङ पेःदो। ङाः फीर्च्याङ लाःके, केःदाङ पेःदो! 5 ख्याक्या नम्र एःक्योक ताम थाम्जेर मीःक्याइ छोर्च्युक। प्रभु गेबुरा लोःदी ओःङ्गुए। 6 काःन्दीङ तामगीइ लागी तुःङाल माःबे, इःनाङ ख्याक्याला ची ताम ताःसुक एःपा ओःखो थाम्जेर तामक्याइ बारेला कोन्ज्यो ङीमु प्रार्थना पेःदो। ओःले कोन्ज्योला प्रार्थना पेःगासुना ओःले लाङ्गासुना, खुङला थुजीछे तेर। 7 ओःले मीःइ नोम्साङगीइ सेजेरा मीःखुगेन पेःदी कोन्ज्योइ खाम्साङ्बुइ ख्याक्याइ सेम ओःले नावाला येशु ख्रीष्टला थार्च्युदी ज्यागेन एः। 8 ताः थाम्जेर भन्दा तीङ्ला, ङाःइ आतानोःक्या ओःले आजीनोःमोक्या, काःखो ताम तेःन्दाम एःपा, काःखो ताम सेःसाइदी एःपा, काःखो ताम डीक्पु एःपा, काःखो ताम चाङ्मा एःपा, काःखो ताम च्याःम्बु पेःखुगेन्दी एःपा, काःखो तामला मीःक्याइ सेम थेकुबा, काःखो ताम माःङ्बुरा याःबु एःपा ओःले काःखो ताम प्रशंसा पेःजे डीक्पु एःपा, ओः तामक्याला सेम तेर। 9 ङाःलाःम्ले ख्याक्याइ ची लोप्ती एःपा, ची ज्योर्ती एःपा, ची कोःदी एःपा ओःले ची थोङ्दी एःपा, ओःन्डुरा पेःदो। ओःले खाम्साङ्बु तेर्केन कोन्ज्यो ख्याक्या ङीमु ओःङेन एः। डेबाइ लागी थुजीछे 10 प्रभुला ङाः माःङ्बुरा खाम्साङा एः, चीलेलाःना माःङ्बुरा ङीःमा तीङ्ला ख्याक्याइ फीर्च्याङ ङाःला टेःम्बा साल्दी एः। तेःम्बारा ख्याक्याइ ङाःला तेन्दुरा टेःम्बा साल्दी एःके, इःनाङ ख्याक्याइ ङाःला रोः पेःजेला मौका ज्योर्ती म्याःके। 11 ङाःला ताःसुक काःल्सी लाःती ख्याक्याला दी ताम लाःक्योक मीःङे, चीलेलाःना तुःक्पु कीपु काःन्डुबारा तीःजी एःनाङ सेम सन्तोक पेःजे ङाःइ सेदी एः। 12 ङाःला ताःसुक एःनाङ, बोल्बु एःनाङ, टोःपा काःङ्क्योक एःनाङ, तोःपा तोक्योक एःनाङ, माःङ्बु एःनाङ तीबी एःनाङ, ङाःइ काःन्डुबारा तीःजीलाङ सन्तोक पेःगेन ताम सेदी एः। 13 ङाःला ल्हे तेर्केन ख्रीष्टलाःम्लेरा ङाः थाम्जेर ताम पेःखुँ। 14 इःनाङ ङाः तुःक्पुला एःकासुना ख्याक्याइ ङाःला रोः पेःदी ख्याक्याइ माःङ्बुरा याःबु पेःसी। 15 तोःङ्स्योला ङाःइ याःबु लेःङ्गो फेल्गासुना, ङाःइ माकेडोनीया पोःर्ती डोगासुना ङाःला रोः पेःगेन्दी ख्या फीलीप्पीइ मीःक्या चीग्रा एःके। दी ताम ख्याक्याइ छोर्तीरा एः। ङाःला डेबा ताङ्दी ङाःला रोः पेःगेन मीःक्या ख्याक्या चीग्रा एःके। 16 चीलेलाःना ङाः थेसलोनीकेला एःकासुनाङ ख्याक्याइ ङाःला थाङ्मा ङी डेबा ताङ्दी रोः पेःसी। 17 ङाःइ ख्याक्यालाःम्ले राःङ्साङ भेटी छोल्क्योक मीःङे, इःनाङ ख्याक्याइ ङाःला रोः पेःदी ख्याक्याइरा मोलाम ज्योर्च्युक लाःती ङाःइ सेम इःङे। 18 ङाःला कोःकेन भन्दाङ माःङ्बु ङाःइ ज्योर्ती एः। ख्याक्याइ इपाफ्रोडीटसकीइ लाःक्पाला ङाःला ताङ्क्योक डेबा ङाःइ ज्योर्ती एः ओःले ङाःला दाङ्दी एः। दी डेबा कोन्ज्योला सेम थेकेन सीःम्बु टीःमा ओःङेन साङ च्योःङ्रा काःल्दी एः। दी लेःगाइ कोन्ज्योला माःङ्बुरा केःदाङ जोदी एः। 19 येशु ख्रीष्टलाःम्ले ङाःइ कोन्ज्योइ खुङगीइ बोल्बुइ नोःर स्याःक्यालाःम्ले ख्याक्याला ताःसुक काःल्क्योक तामक्या तेर्केन एः। 20 ताः उःइ आबा कोन्ज्योला तेन्दुरा महीमा काःल्ज्युक। आमेन। तीङ्स्योइ तामक्या 21 येशु ख्रीष्टला एःक्योक थाम्जेर कोन्ज्योइ मीःक्याला ङाःइ टासीदेले लाःतेर। दीला ङाः ङीमु एःक्योक आतानोःक्या ओःले आजीनोःमोक्याइयाङ ख्याक्याला टासीदेले लाःती ताङ्दी एः। 22 थाम्जेर कोन्ज्योइ मीःक्याइ ओःले खास पेःदी रोमी क्याःल्बुइ क्याःल्खाङला लेःगा पेःगेनक्याइ टासीदेले लाःती ताङ्दी एः। 23 प्रभु येशु ख्रीष्टकीइ अनुग्रह ख्याक्या थाम्जेर ङीमु एःच्युक। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.