फीलीप्पी 1 - स्युबा1 येशु ख्रीष्टला सेमल्हुक लुगेन फीलीप्पी क्याःसाला एःक्योक कोन्ज्योइ मीःक्याला, एल्डरक्याला ओःले डीकनक्याला ङीः येशु ख्रीष्टकीइ लाबु पावल ओःले तीमोथीइ दी इःगी प्रुःदेरा एः। 2 उःइ आबा कोन्ज्यो ओःले प्रभु येशु ख्रीष्टकीइ ख्याक्याला अनुग्रह ओःले खाम्साङ्बु तेर्च्युक। फीलीप्पीइ मीःक्याइ लागी पावलगीइ थुजीछे तेर्क्योक ओःले प्रार्थना पेःक्योक 3 तेन्दुरा ख्याक्याला टेःम्बा साल्गासुना ङाःइ कोन्ज्योला ङाः थुजीछे तेर्के। 4 तेन्दुरा ख्याक्या थाम्जेरकीइ लागी प्रार्थना पेःगासुना ङाः केःदाङ पेःदी प्रार्थना पेःगे, 5 चीलेलाःना ख्याक्याइ ङाःला याःबु लेःङ्गो प्रचार पेःगेन लेःगाला तोःङ्स्योइ ङीःमामीःजीक ताःसेथुपरा रोः पेःदीरा तेःती एः। 6 कोन्ज्योइ ख्याक्याइ कील्ला याःबु लेःगा चीग छुसी, ओःले खुङगीइरा येशु ख्रीष्ट ओःङेन ङीःमाला ओःखो माःछाङ्थुप खुङगीइ मेःपोःर्केन एः लाःती ङाःइ तेःन्दामरा सेदी एः। 7 ख्याक्या थाम्जेरला ङाः सेम नाःङ मीःजीकरा च्याःम्बु पेःउए। ख्याक्याइ बारेला एःन्डुबा ठीवा साल्जे ङाःला याःबु नेसी, चीलेलाःना ताःसे ङाः चेङाङला एःकासुना ओःले चेङाङले पाङ्ला एःकासुनाङ, याःबु लेःङ्गोइ पक्षला लाःकासुना ओःले ओः लेःङ्गो तेःन्दाम एः लाःती लाःकासुना, कोन्ज्योइ अनुग्रह पेःदी उःक्या थाम्जेर ङीमु ङीमुरा लेःगा पेःजे ज्योर्ती एः। 8 ख्याक्याला फीर्च्या फ्रेचेला ङाःला काःजे सेम एः लाःती नी कोन्ज्योइरा सेउए, चीलेलाःना ख्याक्याला येशु ख्रीष्टकीइ काःन्डुले च्याःम्बु पेःउबा ङाःङ ओःन्डुलेरा पेःउए। 9 ख्याक्याइ चीगकीइ राःङ्साला माःङ्बु च्याःम्बु पेःज्युक लाःती प्रार्थना पेःउए। ख्याक्या नावाला छार्तेरा काःल्ज्युक ओःले याःबु माःइबा साल्खुगेन्दी काःल्ज्युक लाःती ङाः प्रार्थना पेःउए। 10 एःन्डुले, ख्याक्याइ काःखो लेःगा याःबु एःपा ओःखो दाम्जे खुगेन एः, ओःले ख्रीष्ट ओःङेन ङीःमाला ख्याक्या चाङ्मा ओःले चीङ दोष म्याःपा पेःदी तेःचे खुगेन एः। 11 कोन्ज्योला सेःसा ओःले प्रशंसा ख्योङ्जेला येशु ख्रीष्टकीइ ल्हेलाःम्ले ख्याक्याइ ताःक्पा लेःगाक्या पेःजे खुज्युक लाःती ङाः प्रार्थना पेःउए। ङाः सोम्बो लीःक्योकदी ख्रीष्टकीइ लागीरा इःङे 12 आतानोःक्या ओःले आजीनोःमोक्या, ख्याक्याइ दी ताम छोर्च्युक लाःती ङाःइ सेम एः, ङाःला काःल्क्योक तामक्याइ नी तेःन्दामरा याःबु लेःङ्गो फेल्जेला रोः पेःदी एः। 13 ङाःइ ख्रीष्टकीइ बारेला याःबु लेःङ्गो लाःक्योक सोङ्गारा ङाःला चेङाङला काक्योक इःङे लाःती क्याःल्खाङगीइ थाम्जेर थेक्या ओःले दीला एःक्योक राःङ्सा थाम्जेर मीःक्याइ छोर्ती एः। 14 ङाःला चेङाङला काक्योक सोङ्गारा माःङ्बु च्योःङ्रा नोःक्या प्रभुला राःम्बु काःल्दी एः, ओःले खुङक्या जीबारा माःबेबा याःबु लेःङ्गो फेल्जेला आ क्याःप्केन्दी काःल्दी एः। 15 इःङ्जे नी खुङक्या नाःङ्ला लाःलेइ ङाःला मीसेर पेःदी, खुङक्याइ राःङ्साइ भन्दा माःङ्बु पेःसी लाःती तेङ्जेला ख्रीष्टकीइ बारेला मीःक्याला प्रचार पेःउए लाःना, राःङ्साक्याइदी याःबु सेम लेःङ्दी च्याःम्बु पेःदी मीःक्याला प्रचार पेःउए। 16 दी मीःक्याइ ङाःला च्याःम्बु पेःउए, ओःले याःबु लेःङ्गोइ पक्षला लाःचेला कोन्ज्योइ ङाःला दीला चेङाङला क्याल्क्योक इःङे लाःती सेक्योक सोङ्गारा खुङक्याइ दी लेःगा पेःदेरा एः। 17 इःनाङ ङाःला मीसेर पेःगेनक्याइदी ङाः चेङाङला एःकासुना ताःरुङ तुःक्पु पाःतेर्केन ठीवा लेःङ्दी राःङला खे ओःङेन पेःदी ख्रीष्टकीइ बारेला याःबु लेःङ्गो फेल्क्योक इःङे, चाङ्मा सेम लेःङ्दी मीःङे। 18 चीरा इःनाङ एःच्युक! याःबु पेःदी एःनाङ, माःइबा सेम पेःदी एःनाङ, थाम्जेरकीइ ख्रीष्टकीइ बारेला याःबु लेःङ्गोरा फेल्देरा एः। ङाः दीखो तामला केःदाङ काःल्दी एः, 19 चीलेलाःना ख्याक्याइ पेःक्योक प्रार्थना ओःले प्रभु येशु ख्रीष्टकीइ लाइ रोः पेःक्योक सोङ्गारा ङाः ताःम्साङा ओःङेन एः लाःती ङाःइ छोर्ती एः। 20 ङाःइ पेःक्योक लेःगाइ पेःगासुना ङाःला राःङ्सा मीःक्याइ नाःमाङ ङोःछाला मेक्याल्गेन एः लाःती सेम पेःगे ओःले रेःवा पेःगे, इःनाङ तेन्दु च्योःङ्रारा ताःसेङ ङाः ख्रीष्टकीइ लागी आ क्याःप्ती ताम लाःके। ओःले ङाः सीनाङ ओःले सेन्नाङ ङाःइ थाम्जेर मीःजीलाःम्ले ख्रीष्टला सेःसा ओःङ्ज्युक लाःती ङाः सेम पेःउए। 21 चीलेलाःना ङाः सोम्बो एः लाःना दीखो ख्रीष्टकीइ लागी इःङे, ओःले ङाः सीसी लाःना ङाः सेन्जे भन्दाङ माःङ्बु याःबु ङाःला ओःङेन एः। 22 ङाः सोम्बो तेःसी लाःना ख्रीष्टकीइ लागी ङाःइ माःङ्बुरा याःबु लेःगाक्या पेःजे ज्योर्के। ओः सोङ्गारा, ङाःइ काःखो दाम्कोन लाःती ङाःइ छोर्ती म्याः। 23 दीखोइ बारेला ङाः सेम ङीइदी काःल्दी एः। दी जाम्बुलीङ पोःर्ती ख्रीष्ट ङीमुरा तेःचे ङाःला माःङ्बुरा छ्योम्बो सेम एः, चीलेलाःना दी याःबु ताम इःङे, 24 इःनाङ ख्याक्याइ लागीदी ङाः सेन्जेरा याःबु इःङे। 25 ङाःला दी ताम तेःन्दामरा ङीःन्थे एः। ओः सोङ्गारा, ख्याक्याला सेमल्हुकला छार्च्युजेला ओःले केःदाङ ज्याजेला ङाः सोम्बोरा तेःकेन एः ओःले ख्याक्या थाम्जेर ङीमु तेःकेन एः, 26 ओःले ङाः ख्याक्यासाःला फीर्च्या ओःङ्गासुना, ङाःइ पेःगासुना ख्याक्याइ येशु ख्रीष्टला माःङ्बुरा प्रशंसा पेःगेन एः। 27 छ्योम्बो तामदी दीखोरा इःङे, काःन्डुलेङ ख्रीष्टकीइ याःबु लेःङ्गोला डीक्केन पेःदी ख्याक्याइ डोलुङ तेःलुङ पेःदो। ओःले ङाःइ ख्याक्याला फ्रेनाङ मेःफ्रेनाङ, ख्याक्या थाम्जेर डीक्ती तेःक्योक ओःले सेम चीगकीइदी काःल्दी याःबु लेःङ्गोइ सेमल्हुककीइ लागी ताम लाःकुए लाःती ङाःइ कोःजे सेम एः। 28 ख्याक्याला टाः पेःगेन मीःक्या ङीमु चीङ तामला माःजी। ख्याक्याइ ओःन्डु पेःसी लाःना, खुङक्या सीःङ्दा चेती डोगेन एः ओःले ख्याक्याइदी थार्चे ज्योर्केन एः लाःती तेङ्गुए, ओःले कोन्ज्योइरा दी थाम्जेर तामक्या ओःङ्ज्युगेन एः। 29 चीलेलाःना ख्याक्याइ ख्रीष्टला सेमल्हुक लुजे चीग्रा मीःङे, इःनाङ खुङगीइ लागी तुःक्पु खुर्ती ज्योर्केन ताम ख्याक्याइ ज्योर्ती एः। 30 काःल्क्योक ङीःमाक्याला ङाःइ तुःक्पु पेःक्योक ख्याक्याइ थोङ्दी एः, ओःले ताःसेङ तुःक्पु पेःदीरा एः लाःती ख्याक्याइ कोःदी एः, ओःले ख्याक्याइयाङ ताःसे ओःखोरा तुःक्पु पेःदेरा एः। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.