एफीसी 3 - स्युबा

राःङ्सा क्युःपाइ मीःक्याइ लागी पावलगीइ लेःगा

¹ ओः सोङ्‍गारा, ङाः पावल, ख्याक्या राःङ्सा क्युःपाइ मीःक्याइ लागी येशु ख्रीष्टकीइ लेःगा पेःक्योक सोङ्‍गारा ङाःला चेङाङला कादी एः।

² ख्याक्या राःङ्सा क्युःपाइ मीःक्याला कोन्ज्योइ अनुग्रहइ लेःङ्‍गो लाःकेन लेःगा खुङगीइ ङाःला तेर्क्योक इःङे लाःती ख्याक्याइ तेःन्दामरा कोःदी एः।

³ कोन्ज्योइ खुङगीइ सेम नाःङगीइ तेःदाम खुङगीइ ङाःला तेङ्तेर्ती एः, ओःले ङाःइ दीखोइ बारेला तीबी रेःरे नी ख्याक्याला इःगीला प्रुःदी एः।

⁴ ख्याक्याइ दी इःगी टोःमीःजीक, ख्रीष्टकीइ बारेला कोन्ज्योइ सेमगीइ नाःङ तीःङगीइ तेःदामक्या ङाःइ सेदी दु लाःकेन ताम ख्याक्याइ सेगेन एः।

⁵ दी तेःदाम तोःङगीइ मीःक्याला कोन्ज्योइ तेङ्मातेर। इःनाङ दी तेःदाम ताःसे कोन्ज्योइ चाङ्मा लालाःम्‍ले राःङगीइ चाङ्मा प्रेरीतक्याला ओःले कोन्ज्योइ लेःङ्‍गो तेर्केन मीःक्याला तेङ्तेर्ती एः।

⁶ कोन्ज्योइ सेम नाःङगीइ तेःदाम दीखोरा इःङे– राःङ्सा क्युःपाइ मीःक्याइयाङ याःबु लेःङ्‍गोलाःम्‍ले यहुदीक्याइ च्योःङ्‍रा कोन्ज्योइ मोलामक्या ज्योर्केन एः। राःङ्सा क्युःपाइ मीःक्या ओःले यहुदीक्या क्युःपा चीग ओःङेन एः, ओःले कोन्ज्योइ येशु ख्रीष्टलाःम्‍ले पेःक्योक ताःम्ज्या ख्या राःङ्सा क्युःपाइ मीःक्याइयाङ यहुदीक्या ङीमुरा ज्योर्केन एः।

⁷ कोन्ज्योइ ङाःला अनुग्रह पेःदी दी याःबु लेःङ्‍गो लाःकेन लेःगा ङाःला तेर्सी। खुङगीइ ङाःइ मीःजीला ल्हेलाःम्‍ले लेःगा पेःदी दी लेःगा तेर्क्योक इःङे।

⁸ कोन्ज्योइ मीःक्या नाःङ्ला ङाः थाम्जेर भन्दा लेःगा म्याःक्योक मीः एःनाङ, मीःइ नावाइ सेदी सेजे मीःखुगेन ख्रीष्टकीइ मोलामगीइ बारेला राःङ्सा क्युःपाइ मीःक्याला लाःचेला कोन्ज्योइ ङाःला अनुग्रह पेःदी दी लेःगा तेर्सी।

⁹ थाम्जेर तामक्या जोगेन कोन्ज्योइ तोःङ्मीःजीकरा सुलाङ तेङ्दी म्याःक्योक खुङगीइ सेम नाःङगीइ तेःदामक्या थाम्जेर मीःक्याला लाःचेला खुङगीइ ङाःला दाम्सी।

¹⁰ एःन्डुले कोःम्सालाःम्‍ले कोन्ज्योइ राःङगीइ माःङ्बुरा खालेइ नावाइ तामक्या नाःम्खालीङगीइ ठाउँक्याला क्याःल्खाप पेःगेनक्याला ओःले आङ्ज्या पेःगेनक्याला तेङ्जे छोल्क्योक इःङे।

¹¹ दी थाम्जेर कोन्ज्योइ तोःङ्मीःजीकरा पेःगेन तेःदाम पेःदी एःके, ओःले खुङगीइ उःइ प्रभु येशु ख्रीष्टलाःम्‍ले दी तेःदाम छाङ्च्युसी।

¹² चीलेलाःना ख्रीष्ट ङीमु डीक्क्योक ओःले खुङला सेमल्हुक लुक्योक सोङ्‍गारा, उःक्या कोन्ज्योइ तोःङ्ला जीबारा माःबेबा सेमल्हुक लुदी डोजे खुगेन एः।

¹³ ओः सोङ्‍गारा, ङाः ख्याक्याला वासी पेःगे, ख्याक्याइ लागी ङाःइ खुर्तेरा पेःक्योक तुःक्पु थोङ्दी हा माःले। दी थाम्जेर तामक्या ख्याक्याइ याःबुइ लागी इःङे।

एफीससकीइ कोःम्साइ लागी प्रार्थना

^14-15 ओः सोङ्‍गारा, नाःम्खालीङ रा जाम्बुलीङला एःक्योक थाम्जेर जोगेन आबा कोन्ज्योइ तोःङ्ला ङाः पीमु चुदी प्रार्थना पेःउए।

¹⁶ कोन्ज्योइ महीमाइ नोःरक्यालाःम्‍ले खुङगीइ राःङगीइ लालाःम्‍ले ख्याक्याला ल्हे तेर्च्युक ओःले ख्याक्या सेम नाःङ मीःजीकरा राःम्बु ओःङ्जे खुज्युक लाःती ङाः प्रार्थना पेःउए।

¹⁷ ख्याक्याइ ख्रीष्टला सेमल्हुक लुक्योक सोङ्‍गारा खुङ ख्याक्याइ सेमला तेःच्युक लाःती ङाः प्रार्थना पेःउए। ख्याक्याइ कोन्ज्योला ओःले चीगकीइ राःङ्साला च्याःम्बु पेःगासुना ख्याक्या राःङ्बु ओःङ्‍गुए ओःले रीःल्जे मेःज्योरए। ओः सोङ्‍गारा, ङाः प्रार्थना पेःगे, ख्याक्या

¹⁸ ओःले कोन्ज्योइ थाम्जेर मीःक्याइ ख्रीष्टकीइ उःक्याला काःजे च्याःम्बु पेःउए लाःकेन ताम सेजे खुगेन एः। ख्रीष्टकीइ उःक्याला पेःगेन च्याःम्बु कार्ती कार्चे मीःखुए ओःले नाःमाङ मीःसीःङ एः।

¹⁹ ख्रीष्टकीइ उःक्याला काःजे च्याःम्बु पेःउए लाःकेन ताम सुइयाङ थाम्जेर सेजे मीःखुनाङ, ख्याक्याइ ओःखो सेजे खुज्युक लाःती ङाः प्रार्थना पेःउए। ओःले ख्याक्या थाम्जेर तामला कोन्ज्यो च्योःङ्‍रारा छार्चे खुज्युक।

²⁰ कोन्ज्योला महीमा काःल्ज्युक। खुङ ङीमु उःक्याइ लाङ्क्योक भन्दा ओःले उःक्याइ ठीवा साल्क्योक भन्दा माःङ्बुरा छ्‍योम्बो लेःगा पेःगेन ल्हे एः, ओःले खुङगीइ उःक्या नाःङ्ला राःङगीइ ल्हेलाःम्‍ले लेःगा पेःउए।

²¹ ओःखोरा कोन्ज्योला तीःनामचीग मीःजीक राःङ्सा तीःनामथुप, येशु ख्रीष्टला सेमल्हुक लुगेन मीःक्याइ ओःले येशु ख्रीष्ट राःङगीइरा तेन्दुरा महीमा पेःज्युक। आमेन।