एफीसी 2 - स्युबानीङ्बा रा सेम्बा मीःली 1 ख्याक्याइ कोन्ज्योइ आज्ञाक्या माःङीन्क्योक सोङ्गारा ओःले लाःयोक्या चीग्रा पेःक्योक सोङ्गारा तोःङगीइ तीःजीला ख्याक्या कोन्ज्योइ तोःङ्ला सीसीङ्दी एःके। 2 ओः तीःजीला ख्याक्या दी जाम्बुलीङगीइ माःइबा मीःक्याइ च्योःङ्राले राःङगीइ मीःजी सेन्गुके ओःले नाःम्खाला एःक्योक लाक्याइ गोछेस्योला ङीःन्गुके। कोन्ज्योला मीःङीःङेन मीःक्याला ताःसे ओःखोरा लाइ राःङगीइ आङ्ज्याला ज्यादी एः। 3 तोःङ्ला उःक्याङ थाम्जेर खुङक्या च्योःङ्रा पेःदी मीःजी ताङ्गुके ओःले राःङगीइ जुबुइ ओःले नावाइ ची सेम थेपा ओःन्डुरा पेःदी डोउके। उःक्याङ ओःन्डुबारा एःक्योक सोङ्गारा, राःङ्सा मीःक्याइ च्योःङ्रारा उःक्याइयाङ सजय ज्योर्कोःन्दी एःके। 4 इःनाङ कोन्ज्योइ उःक्याला माःङ्बुरा नीङ च्योःउए ओःले माःङ्बुरा च्याःम्बु पेःउए। 5 ओः सोङ्गारा, उःक्याइ लाःयोइ पेःगासुना सीसीङ्दी एःनाङ खुङगीइ उःला ख्रीष्ट ङीमुरा सोम्बो लोसी। कोन्ज्योइ ख्याक्याला अनुग्रह पेःक्योक सोङ्गारा खुङगीइ ख्याक्याला थार्च्युसी। 6 कोन्ज्योइ उःक्याला येशु ख्रीष्ट ङीमुरा सोम्बो लोसी, ओःले ख्रीष्ट ङीमुरा नाःम्खालीङला तेःच्युदी एः। 7 येशु ख्रीष्टकीइ उःक्याइ लागी च्याःम्बु पेःदी पेःक्योक लेःगाक्यालाःम्ले कोन्ज्योइ उःक्याला काःजे माःङ्बु नीङ च्योःउदु लाःती मीःक्याइ तीङ्ला थोङ्ज्युक लाःती कोन्ज्योइ दी थाम्जेर तामक्या पेःक्योक इःङे। 8 कोन्ज्योइ ख्याक्याला अनुग्रह पेःक्योक सोङ्गारा खुङगीइ ख्याक्याला थार्च्युसी, चीलेलाःना ख्याक्याइ ख्रीष्टला सेमल्हुक लुसी। ख्याक्याइ पेःक्योक लेःगाइ पेःगासुना ख्याक्याला खुङगीइ थार्च्युक्योक मीःङे, इःनाङ ख्याक्याला खुङगीइ एःन्दाराङ थार्च्युक्योक। 9 ख्याक्याइ पेःक्योक काःन्दीङ याःबु लेःगालाःम्ले ख्याक्या थार्च्ये ज्योर्क्योक मीःङे, ओः सोङ्गारा, काःन्दीङ मीःइयाङ घमण्ड पेःकोःन तामरा म्याः। 10 चीलेलाःना उःक्याला जोगेन्दी कोन्ज्योरा इःङे। खुङगीइ उःक्याला याःबु लेःगाक्याइ लागी येशु ख्रीष्टलाःम्ले जोक्योक इःङे। उःक्याइ ओः याःबु लेःगाक्या उःक्याइ पेःज्युक लाःती कोन्ज्योइ ओः लेःगाक्या तोःङ्लाःम्लेरा दाम्दी एःके। ख्रीष्टला थाम्जेर मीःक्या च्योङेम्बा इःङे 11 ख्याक्या राःङ्सा क्युःपालाःम्ले केक्योक ताम टेःम्बा माःचे। खतना पेःक्योक यहुदीक्याइ ख्याक्याला खतना माःबेक्योक मीःक्या लाःती लाःकुके। (इःनाङ दी खतना नी मीःक्याइ लाःक्पाइ जुबुला पेःगेन रीमठीम चीग्रा इःङे।) 12 ओः तीःजीला ख्याक्या ख्रीष्टलाःम्ले थारीःङ्बु एःके। ख्याक्या कोन्ज्योइ दाम्क्योक इस्राएलगीइ मीःक्या च्योःङ्रा काःल्दी म्याःके ओःले कोन्ज्योइ इस्राएलीक्याला पेःक्योक ताःम्ज्या ख्याक्याइ ज्योर्ती म्याःके। दी जाम्बुलीङला ख्याक्या नी चीङ तामगीइ रेःवा म्याःक्योक ओःले कोन्ज्यो म्याःक्योक मीःक्या एःके। 13 तोःङ्ला ख्याक्या कोन्ज्योलाःम्ले थारीःङ्बु एःके, इःनाङ ख्याक्या ताःसे ख्याक्या येशु ख्रीष्ट ङीमु डीक्ती एः, ओःले कोन्ज्योइ ख्याक्याला ख्रीष्टकीइ ठालाःम्ले खुङगीइ थामाला ख्योङ्दी एः। 14 चीलेलाःना उःक्याला खाम्साङ्बु तेर्केन्दी ख्रीष्टरा इःङे। खुङगीइरा यहुदीक्या रा राःङ्सा क्युःपाइ मीःक्याला डीक्च्युदी खुङक्याला चीग्रा जोसी। ओःले खुङक्याला खाफ्याच्युगेन ओःले टाः पेःच्युगेन चीक्पाला खुङगीइ रोम्तेर्सी। 15 ओःले येशु ख्रीष्टकीइ यहुदीक्याइ छ्येइ ठीमक्या ओःले रीमठीमक्या सीःङ्च्युजेला खुङ राःङ सीसी। ओःले खुङगीइ यहुदीक्या रा राःङ्सा क्युःपाइ मीःक्याला डीक्च्युदी खुङ ङीमु चीग्रा ओःङेन क्युःपा चीग जोसी। खुङगीइ राःङगीइ सेम्बा क्युःपा चीग जोसी। एःन्डुले खुङगीइ खाम्साङ्बु ख्योङ्सी। 16 खुङ क्रुसला सीदी यहुदीक्या ओःले राःङ्सा क्युःपाइ मीःक्या ङीःक्कारला कोन्ज्यो ङीमु डीक्च्युसी। एःन्डुले खुङगीइ चीगकीइ राःङ्साला टाः पेःगेन तामला सीःङ्च्युसी। 17 खुङ ओःङ्मीःजीक कोन्ज्योलाःम्ले थारीःङ्बु एःक्योक ख्याक्या राःङ्सा क्युःपाइ मीःक्याला ओःले कोन्ज्योइ थामाला एःक्योक यहुदीक्याला खाम्साङ्बु तेर्केन याःबु लेःङ्गो लाःसी। 18 चीलेलाःना खुङलाःम्लेरा उःक्या यहुदीक्या ओःले राःङ्सा क्युःपाइ मीःक्या थाम्जेरकीइ चीग्रा चाङ्मा ला ज्योर्ती आबा कोन्ज्योसाःला डोजे खुगेन्दी काःल्दी एः। 19 ओः सोङ्गारा, ताः ख्या राःङ्सा क्युःपाइ मीःक्या फीइ मीःक्या ओःले ङोःमासेक्योक मीःक्या मीःङे, बरु ख्याक्या नी कोन्ज्योइ मीःक्या ङीमुरा छोबा चीगकीइदी काःल्दी एः, ओःले ख्याक्या कोन्ज्योइ खीम फेबेइ मीःक्या काःल्दी एः। 20 उःक्यादी खीम च्योःङ्रा इःङे, ओःले प्रेरीतक्या रा कोन्ज्योइ लेःङ्गो तेर्केनक्यादी ओः खीमगीइ चार च्योःङ्रा इःङे, ओःले येशु ख्रीष्टदी चारकीइ मुल तोः च्योःङ्रा इःङे। 21 खुङगीइ पेःगासुनारा खीमगीइ थाम्जेर तोःक्या डीक्ती तेःकुए ओःले ओःखो प्रभुइ मीःनला क्याप च्योल्क्योक चाङ्मा मन्दीर ओःङ्गुए। 22 ख्रीष्टला ख्या राःङ्सा क्युःपाइ मीःक्याङ राःङ्साक्या ङीमुरा कोन्ज्यो चाङ्मा लालाःम्ले तेःकेन खीम च्योःङ्रा काःल्देरा एः। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.