२ थेसलोनीकी 2 - स्युबा

माःताक्पा मीः

¹ ङाःइ रोःक्या, उःइ प्रभु येशु ख्रीष्ट फीर्च्या ओःङेन एः, ओःले खुङला फ्रेचेला उःक्या थाम्जेर खेप चीगलारा जोम्ङेन एः। ओः सोङ्‍गारा, ङीःक्या ख्याक्याला वासी पेःगे,

² ख्याक्याला सुइयाङ ङीःइ लाःक्योक लाःती प्रभुइ ङीःमा ओःङ्सीःङ्दी एः लाःती अगमवाणीलाःम्‍ले, वचनलाःम्‍ले ओःले इःगीलाःम्‍ले लाःसीः लाःना, ओः तामक्या कोःदी ख्याक्याइ सेम तेःमु पेःदी माःजीज्युक ओःले हामाःलेज्युक।

³ इःनाङ ख्याक्याला सुइयाङ चीङ पेःदीङ स्योप माःक्युःर्च्युक चीलेलाःना तोःङ्ला मीःक्याइ कोन्ज्योला वीरोध पेःगेन एः। ओःले प्रभु ओःङ्जे तोःङ्ला सीःङ्दाक डोकोन्दी माःताक्पा मीः ओःङेन एः।

⁴ मीःक्याइ कोन्ज्यो लाःती आराधना पेःक्योक थाम्जेर तामक्याला ओःले मीःक्याइ चाङ्मा आराधना पेःक्योक थाम्जेर तामक्याला ओःखोइ टाःलाङ पेःदी थाम्जेर भन्दा छ्‍योम्बो चागेन एः। ओःले राःङलारा ङाः कोन्ज्यो इःङे लाःतेरा कोन्ज्योइ मन्दीरला तेःकेन एः।

⁵ ङाः ख्याक्या ङीमु एःकासुनारा ङाःइ दी तामक्या ख्याक्याला लाःती एःके, ची ख्याक्याला ओःखो ताम टेःम्बा म्याःपा ले?

⁶ ओःखो राःङगीइ तीःनामला प्रकट काःल्ज्युक लाःती काःखोइ ओःखोला ताःसे कादी ज्यादी एःपा, ओःखो नी ख्याक्याइ छोर्ती एः।

⁷ ओः छ्‍येइ ठीम नोङेन्दी राःङगीइ लेःगाक्या नाःङ नाःङ्ला छुसीङ्दी एः। ओःले ताःसेथुप ओःखोला कादी ज्यागेन्दीदी ओःखोइ लाःमले मातेङथुप ओःखोला कादीरा ज्यागेन एः।

⁸ ओः तीङ्ला लाःयोइ मीः थेङ्दी ओःङेन एः, ओःले खोला प्रभु येशुइ राःङगीइ उइ सीःङ्दाक जोगेन एः, खुङ ओःङ्‍गासुनाइ साङ्बु छेमीइ ओःखोला सीःङ्दाक जोगेन एः।

⁹ ओः माःताक्पा मीःइ शैतानगीइ ल्हे ख्योङ्दी ओःङेन एः ओःले ओःखोइ थाम्जेर खालगीइ छल पेःदी चुःन्डुलक्या तेङेन एः ओःले याःमाछाककीइ लेःगाक्या पेःगेन एः।

¹⁰ सीःङ्दाक काःल्दी डोगेनक्याला छल पेःजेला ओःखो थाम्जेर दुष्टक्या ङीमु ओःङेन एः, चीलेलाःना खुङक्याइ तेःन्दाम तामला च्याःम्बु माःबे ओःले खुङक्याइ थार्चेङ ज्योर्माःखु।

¹¹ ओः सोङ्‍गारा, छल पेःक्योक तामक्याला खुङक्याइ सेमल्हुक लुज्युक लाःती कोन्ज्योइ खुङक्याखाला छ्‍योम्बो ल्हेइ छल ताङेन एः।

¹² खुङक्याइ तेःन्दामगीइ तामला सेमल्हुक मालु, इःनाङ माःइबा लेःगाक्या पेःजेलारा खुङक्याला सेम थेसी। ओः सोङ्‍गारा, खुङक्याखाला दण्ड ज्योर्सी।

ख्याक्याला थार्च्युजेइ लागी दाम्क्योक इःङे

¹³ प्रभुइ च्याःम्बु पेःगेन ङाःइ रोःक्या, ख्याक्याइ लागी ङीःइ तेन्दुरा थुजीछे तेर्राकोःउए चीलेलाःना तोःङ्मीःजीकरा चाङ्मा लाइ चाङ्मा जोगेन लेःगालाःम्‍ले ओःले तेःन्दाम तामखाला सेमल्हुक लुदी सेन्जेला कोन्ज्योइ ख्याक्याला दाम्सी।

¹⁴ दीखोइ लागीरा ङीःइ प्रचार पेःक्योक याःबु लेःङ्‍गोलाःम्‍ले उःइ प्रभु येशु ख्रीष्टकीइ महीमा ख्याक्याइ ज्योर्चे खुज्युक लाःती कोन्ज्योइ ख्याक्याला केक्याःप्क्योक इःङे।

¹⁵ ओः सोङ्‍गारा, ङाःइ रोःक्या, ङीःइ ख्याक्याला लाःक्योक तामक्याला ओःले इःगीलाःम्‍ले लोप्क्योक तामक्याला राःम्बु पेःदी तेः ओःले ङीःन्दी तेः।

¹⁶ उःइ प्रभु येशु ख्रीष्ट ओःले आबा कोन्ज्योइ उःक्याला च्याःम्बु पेःसी ओःले खुङगीइ अनुग्रहलाःम्‍ले उःक्याइ नाःमाङ मीःसीःङेन उत्साह ओःले याःबु रेःवा तेर्ती एः।

¹⁷ खुङक्याइ ख्याक्याला ख्याक्याइ पेःक्योक थाम्जेर याःबु लेःगाक्याला ओःले याःबु तामक्याला साहस ओःले ल्हे तेर्च्युक।