Obadiya 1 - Siswati 1996 Bible

Simakadze uyawujezisa Edomu

¹ Umbono wa-Obadiya: Loku ngulokwakhulunywa yiNkhosi Simakadze ngesive saka-Edomu: Sivile livi leliphuma kuSimakadze. Utfumele lincusa lakhe etiveni, watsi: “Sukumani, sambe siyekulwa na-Edomu.”

² Simakadze ukhuluma ku-Edomu, utsi: “Ngitakwenta ube ngulomncane emkhatsini wetive, ngikwente wedzeleleke kakhulu.

³ Kutigcabha kwenhlitiyo yakho kukwedukisile, wena uhlala endlunkhulu yakho lesemifantwini yemadvwala. Umuti wakho usetulu etintsabeni. Wena utitjela utsi: ‘Ngubani nje longangehlisela phansi?’

⁴ Nome likhaya lakho ungalakha etulu, njengelusweti, nome ungalakha emkhatsini wetinkhanyeti, mine ngiyawukudzilitela phansi.

⁵ “Kube bewungagcekezelwa ngemasela nome-ke ungenelwe tigelekece ebusuku, betingeke tatitapela ngekufuna kwato yini? Kube bavuni bemagelebisi bebete kuwe bebangete bawachulula kusale abe mbalwa yini? Kodvwa titsa tiyakunicitsa niphele nya.

⁶ Nine titukulwane ta-Esawu, umcebo wenu lebewufihliwe sewuphangiwe.

⁷ Bonkhe labo bewubambisene nabo bakukhohlisile, batakuhlehlisela emnyeleni welive lakho. Bantfu benihletisene nabo ngekuthula nyalo sebakwehlulile. Bangani bakho bewudla nabo sebakwetsiyele lugibe, badzimate bakhuluma bodvwa ngawe, batsi: ‘Kuphi-ke lokuhlakanipha kwakhe?’ ”

⁸ Simakadze ukhuluma utsi: “Mhlazana ngijezisa Edomu ngiyewubhubhisa netati takhe ngicedze konkhe kuhlakanipha kwakhe etintsabeni taka-Esawu.

⁹ Emabutfo akho, Themani, ayakutfutfumela, bonkhe bantfu labaseveni letintsaba, lekulive laka-Edomu, bayakubulawa.”

Sizatfu sekujeziswa kwa-Edomu

¹⁰ “Ngenca yebudlova bakho lobente kubomnakenu, titukulwane taJakobe, uyakwembeswa ngelihlazo, ubhujiswe ingunaphakadze.

¹¹ Mhlazane ume untontomele ngesikhatsi bafokati batfumba umcebo wakhe, nebetive bangena emasangweni akhe, benta inkatho ngeJerusalema, nawe kwakungatsi umdvumo munye nabo.

¹² Bekungakafaneli umbukele phansi umnakenu, nakavelelwe ngulokubi. Bewungakafaneli utsakase nangabe bakaJuda behlelwa yimbhubhiso. Yebo, bewungakafaneli kubacoloshela namzukwane behlelwa yinhlupheko.

¹³ Bewungakafaneli kungena emasangweni ebantfu bami ngesikhatsi behlelwa sigemegeme. Bewungakafaneli kubabukela phansi bantfu bami ngelilanga lekuhlupheka kwabo. Bewungakafaneli kuwuphanga umcebo webantfu bami.

¹⁴ Bewungakafaneli kuma emahlanganweni emigwaco khona utebabamba labo labaphunyulile. Bewungakafaneli kunikela ngensali yabo ngelilanga lekuhlupheka kwabo.”

Nkulunkulu uyakutehlulela tive

¹⁵ “Lilanga laSimakadze lekwehlulela tonkhe tive selisondzele. Njengobe wentile nawe Edomu kuyakwentiwa njalo nakuwe; tento takho tiyawuphindziselwa kuwe.

¹⁶ Njengobe nawe wanatsa indzebe yekujezisa kwami entsabeni yami lengcwele, netive tonkhe tiyawuyinatsa khona siphelane; tiyawunatsa, tinatse kuze kube shangatsi atizange setibe khona.”

Kuncoba kwa-Israyeli

¹⁷ “Kodvwa eNtsabeni iSiyoni kuyawuba nenkhululeko; kuyawuba yindzawo lengcwele. Umndeni wakaJakobe uyawulidla lelive lekulifa lawo.

¹⁸ Umndeni wakaJakobe uyawuba ngumlilo, umndeni wakaJosefa ube lilangabi. Umndeni waka-Esawu uyawuba tibi, bayakuwokhela ngemlilo bawushise uze uphele. Kuyawubate insali emndenini waka-Esawu. Mine, Simakadze, sengishito.”

¹⁹ Sive lesichamuka eNegevu siyawuhlala eveni letintsaba lekungela-Edomu. Sive lesisuka emaceleni etintsaba siyawulitfumba live lemaFilisti. Yebo, ema-Israyeli ayawulitsatsa live laka-Efrayimu nelaseSamariya. BakaBhenjamini bona bayawutsatsa lakaGileyadi.

²⁰ Lama-Israyeli ladzingisiwe, laseKhenani, ayawulidla lelo live, lize liyekuma ngeSarefathi. Labadzingisiwe bekusuka eJerusalema, labaseSefaradi kwanyalo, bayakuwadla emadolobha aseNegevu.

²¹ Emachawe aseJerusalema ayawuyincoba iNtsaba iSiyoni alibuse lelive laka-Edomu. Lowo mbuso uyakwenganyelwa nguSimakadze.