Numeri 8 - Siswati 1996 Bible

Kubeka tibane

¹ Simakadze wakhuluma kuMosi, watsi:

² “Tjela Aroni utsi: ‘Ngesikhatsi ulumeka letibane letisikhombisa, kufanele tikhanyise lendzawo lesembikwelutsi lwetibane.’ ”

³ Aroni wavele wakwenta loko; wemisa letibane, takhanyisa lendzawo lesembikwelutsi lwetibane, njengobe Simakadze abeshito kuMosi.

⁴ Lolutsi lwalwakhiwe ngegolide legcotjiwe, kusukela esibunu salo kuze kube ngusetimbalini talo. Lolutsi lwalwakhiwe ncamashi ngendlela Mosi labeyilayelwe nguNkulunkulu.

Kuhlanjululwa nekwehlukaniselwa kwemaLevi

⁵ Simakadze wakhuluma kuMosi, watsi:

⁶ “Yehlukanisa emaLevi emkhatsini wesive sema-Israyeli, bese uyawahlambulula.

⁷ Kufanele uwahlambulule kanje: Wafafate ngemanti ekuhlambulula, bese ahhula wonkhe umtimba, ageze timphahla tawo, atawube asayahlanteka.

⁸ Akatsatse inkunzana nemnikelo wayo walokutinhlavu kwafulaha lobhicwe nemafutsa, bese utsatsa inkunzana yesibili letawuba yemnikelo wesono.

⁹ Uyakwetfula emaLevi embikwelithende lekuhlangana, bese uhlanganisa sonkhe sive sema-Israyeli.

¹⁰ Uyakwetfula lamaLevi kuSimakadze, bese sive sema-Israyeli sibeka tandla taso etikwawo.

¹¹ Aroni uyawube sewetfula lamaLevi kuSimakadze abe ngumnikelo wekujikitiswa wesive sema-Israyeli, kuze alungele kwenta umsebenti waSimakadze.

¹² EmaLevi atawutsi angabeka tandla tawo etinhloko taletinkunzana, wena-ke bese unikela lenye ibe ngumnikelo wesono, lena lenye ibe ngumnikelo wekushiswa kuSimakadze kutekwenta inhlawulo yekubuyisana kwemaLevi naSimakadze.

¹³ “LamaLevi uyakuwemisa embikwabo-Aroni nemadvodzana akhe, bese uyawetfula njengemnikelo wekujikisiswa kuSimakadze.

¹⁴ Uyakuwehlukanisa kanjalo-ke emaLevi emkhatsini wesive sema-Israyeli; lamaLevi atawuba ngewami.

¹⁵ Emvakwaloko-ke emaLevi ayawungena ayekwenta inkonzo yawo ethendeni lekuhlangana, nase uwahlambululile wawetfula njengemnikelo wekujikitiswa.

¹⁶ Bona bangema-Israyeli lekufanele nginikwe wona ngalokuphelele. Ngititsatsele wona kutsi abe ngewami esikhundleni sematubulo onkhe latalwa ngiso sonkhe sive sema-Israyeli.

¹⁷ Onkhe ematubulo lamadvuna esive sema-Israyeli, ebantfu nome etilwane ngewami. Ngesikhatsi ngibulala onkhe ematubulo eGibhithe ngatehlukanisela wona.

¹⁸ Ngititsatsele emaLevi esikhundleni sawo onkhe ematubulo esive saka-Israyeli.

¹⁹ Emkhatsini waso sonkhe sive sema-Israyeli emaLevi ngiwaphe bo-Aroni nemadvodzana akhe kutsi abe tipho tabo, ente inkonzo ethendeni lekuhlangana egameni lesive sonkhe sema-Israyeli nekutsi asentele inhlawulo yekubuyisana sitewuvikeleka esijezisweni lesingahle sisehlele, nakwenteka sisondzela endzaweni lengcwele.”

²⁰ Ngako-ke boMosi, na-Aroni, nesive sonkhe sema-Israyeli bavele bakwenta konkhe loko kumaLevi; bakwenta kuwo njengobe Simakadze abeyale Mosi.

²¹ EmaLevi atihlambulula, ageza netimphahla tawo. Aroni wawetfula aba ngumnikelo wekujikitiswa kuSimakadze, wawentela nenhlawulo yekubuyisana, wawahlambulula.

²² Emvakwaloko emaLevi eta kutakwenta umsebenti wawo ethendeni lekuhlangana ngephansi kwa-Aroni nemadvodzana akhe. Bakwenta kumaLevi konkhe loko Simakadze abeyale Mosi macondzana nawo.

²³ Simakadze wakhuluma kuMosi, watsi:

²⁴ “Nangu umtsetfo locondzene nemaLevi: Onkhe emaLevi kusukela eminyakeni lengema-25 budzala kuye etulu ayakuyingenela lenkonzo yawo ethendeni lekuhlangana,

²⁵ kodvwa kusukela eminyakeni lengema-50 budzala ayawutsatsa umhlalaphansi, angabe asasebenta,

²⁶ kodvwa noko angasita labanakabo ekwenteni inkonzo yelithende lekuhlangana. Wona ngekwawo akufanele ayente leyo nkonzo. Uyakwenta njalo-ke, nawunika emaLevi inkonzo yawo.”