Numeri 25 - Siswati 1996 Bible

Sive sema-Israyeli ePheyori

¹ Ngesikhatsi sive sema-Israyeli siseseShithimu, emadvodza acala kungenela kulalana nalabasikati besive semaMowabi.

² Laba labasikati bawamema lamadvodza kutsi ete atekwenta umhlatjelo kubonkulunkulu babo. Lamadvodza adla, akhotsama, akhonta labonkulunkulu bemaMowabi.

³ Ngako sive sema-Israyeli sahlanganyela ekukhonteni Bhali wasePheyori. Lulaka lwaSimakadze lwabavutsela.

⁴ Simakadze wakhuluma kuMosi, watsi: “Tsatsa bonkhe baholi balesive, ubabulale, bese ubeneka emini kubona wonkhe umuntfu embikwaSimakadze, khona kutewutsi lulaka lolwesabekako lwaSimakadze lungetiwusivutsela lesive saka-Israyeli.”

⁵ Mosi wakhuluma nebaholi baka-Israyeli, watsi: “Ngulowo nalowo wenu kufanele abulale onkhe emadvodza esive sakabo lahlanganyele ekukhonteni Bhali wasePheyori.”

⁶ Lenye indvodza yem-Israyeli yeta nalomsikati umMidiyani yamngenisa ethendeni layo, Mosi abuka, nesive sonkhe sema-Israyeli sisalila ekungeneni kwelithende lekuhlangana.

⁷ Watsi kube akubone loko Finehasi, umsa wa-Eleyazare, umsa wa-Aroni, umphristi, washiya sonkhe lesive, watsatsa sikhali ngesandla sakhe,

⁸ walandzela lendvodza yem-Israyeli waze wayawungena ethendeni layo. Wafike wabagwaza bobabili, sikhali sangena kulom-Israyeli saze sayawuphumela ngale kulona lomsikati. Lesishayo lesasihlasele ema-Israyeli sakhawula,

⁹ kodvwa labesebafile ngaso bese bati-24 000.

¹⁰ Simakadze wakhuluma kuMosi, watsi:

¹¹ “Finehasi, umsa wa-Eleyazare, lotalwa ngu-Aroni, umphristi, sewukuncandzile kutfukutsela kwami ngitfukutselela sive sema-Israyeli, ngobe nguye yedvwa emkhatsini wabo lobe nenshisekelo yekugcina ludvumo lwami; ngiko nje ngingakasicedzi ngelulaka sive sema-Israyeli.

¹² Ngako-ke mtjele kutsi sengenta sivumelwane sekuthula naye.

¹³ Yena netitukulwane takhe batawuba nesivumelwane sebuphristi baphakadze naphakadze, ngobe waba nenshisekelo yekugcina ludvumo lwami, wenta inhlawulo yekubuyisana kwesive sonkhe sema-Israyeli nami.”

¹⁴ Libito lalom-Israyeli lowabulawa kanye nemMidiyani lomsikati bekunguZimri, umsa waSalu, umholi wemndeni wakaSimeyoni.

¹⁵ Libito lalona lomsikati bekunguKhozibi, indvodzakati yaSuri, sikhulu semndeni lotsite wesive semaMidiyani.

¹⁶ Simakadze wakhuluma kuMosi, watsi:

¹⁷ “Sive semaMidiyani niyawusiphatsa njengetitsa nisibulale,

¹⁸ ngobe naso saniphatsa njengetitsa, ngesikhatsi siniyenga ngalendzaba yasePheyori, nangenca yadzadzewabo, Khozibi, labeyindvodzakati yemholi wesive semaMidiyani. Khozibi nguye lona lowafa ngekubulawa, nakufika lesishayo sasePheyori.”