Numeri 23 - Siswati 1996 Bible

¹ Bhalamu wakhuluma kuBhalaki, watsi: “Ngakhele emalati lasikhombisa, ungilungiselele tinkunzi letisikhombisa netihhanca letisikhombisa.”

² Bhalaki wakwenta konkhe loko lekwakufunwe nguBhalamu, bobabili base banikela ngenkunzi nesihhanca kulelo nakulelo lilati.

³ Bhalamu wakhuluma kuBhalaki, watsi: “Mani lapha eceleni kwemnikelo wakho, mine ngisaphambuka; ngisafuna kuhlola kutsi Simakadze utawuhlangabetana yini nami. Loko langembulela kona nawe ngitakwatisa.” Asakushito loko, wase ukhuphukela egcumeni lelingenatihlahla.

⁴ Nkulunkulu wahlangabetana naye, naBhalamu watsi kuye: “Sengilungise emalati lasikhombisa, etikwalelo nalelo lati nginikele ngenkunzi nesihhanca.”

⁵ Simakadze wabeka emavi emlonyeni waBhalamu, watsi: “Ncandzeka uye kuBhalaki, ufike umtjele lelivi.”

⁶ Ngako-ke wancandzeka wamkhandza aseme eceleni kwemnikelo wakhe kanye nebaholi bakaMowabi.

⁷ Bhalamu wakhuluma umlayeto wakhe, watsi: “Bhalaki wangisusa e-Aramu, inkhosi yakaMowabi, etintsabeni letingasemphumalanga, watsi: ‘Kota utengicalekisela Jakobe, ungijivazele Israyeli.’

⁸ Ngingabacalekisa kanjani labo labangakacalekiswa nguNkulunkulu? Ngingabajivaza kanjani labo labangakajivazwa nguSimakadze?

⁹ Ngiyababona loku ngilapha esicongweni sentsaba lesilidvwala. Yebo, ngiyababona loku ngilapha etulu ekuphakameni, ngibasinga umkhanya. Ngababona basive lesitihlalela sodvwa, sitehlukanise naletinye tive.

¹⁰ Ngubani longabala lutfuli lwaJakobe, nome abale incenye yesive saka-Israyeli? Angimane ngife kufa kwalolungile, shangatsi nesiphetfo sami singaba njengesabo.”

¹¹ Bhalaki wakhuluma kuBhalamu, watsi: “Yini lena lese uyente kimi? Ngikuletse lapha kutsi utewucalekisa letitsa tami, kodvwa kute lokwentile; esikhundleni saloko utibusisile.”

¹² Bhalamu waphendvula watsi: “Kantsi akukafaneli yini ngikhulume loko lokubekwe nguSimakadze emlonyeni wami?”

Umlayeto wesibili waBhalamu

¹³ Bhalaki wakhuluma kuye, watsi: “Kota la sihambe nawe siye kulenye indzawo, khona utawubabona; noko utawubona incenye yabo, hhayi bonkhe. Utawube sewungicalekisela bona.”

¹⁴ Ngako wamtsatsa wahamba naye baya etsafeni laseSofimu, etulu esicongweni sentsaba iPhisga, wefika lapho wakha emalati lasikhombisa, wanikela ngenkunzi nangesihhanca etikwalelo nalelo lati.

¹⁵ Bhalamu wakhuluma kuBhalaki, watsi: “Mani lapha eceleni kwemnikelo wakho, mine ngisetawuhlangana naSimakadze lapha.”

¹⁶ Simakadze wahlangana naBhalamu, wamtjela emavi lekufanele awakhulume, watsi: “Ncandzeka, uye kuBhalaki uyewumtjela lelivi.”

¹⁷ Ngako-ke wancandzeka waya kuye, wamkhandza eceleni kwemnikelo wakhe, eme nebaholi bakaMowabi. Bhalaki wambuta watsi: “Utsiteni Simakadze?”

¹⁸ Bhalamu wakhuluma umlayeto wakhe, watsi: “Sukuma, Bhalaki, ulalele, ngive kahle wena, msa waSiphori.

¹⁹ Nkulunkulu akasiye umuntfu kutsi angacala emanga, futsi akasiyo indvodzana yemuntfu legucukako engcondvweni yayo. Uyakhuluma yini angabe asenta? Uyetsembisa yini angabe asasifeza setsembiso sakhe?

²⁰ Nginikwe umyalo wekutsi ngibusise, yena sewubusisile, mine ngingabe ngisakugucula loko.

²¹ “Kute emashwa latakwehlela Jakobe, Israyeli angeke abe nelusizi. Simakadze Nkulunkulu wabo, unabo; kumenyetwa nekudvunyiswa kweNkhosi kusemkhatsini wabo.

²² Nkulunkulu lowabakhipha eGibhithe, ubalwela ngemandla lanjengewenyatsi.

²³ Kute longaloya Jakobe, kute longaphengula Israyeli; kuyawukhulunywa ngaJakobe nanga-Israyeli kutsiwe: ‘Bukani lokwentiwe nguNkulunkulu!’

²⁴ Lesive sivuka njengelibhubesi lelisikati, siphakame njengenkunzi yelibhubesi, lelingaphumuli lingakayidli layicedza inyamatane leliyibambile, linatse nengati yaleto tinyamatane lelitibulele.”

²⁵ Bhalaki wakhuluma kuBhalamu, watsi: “Njengobe awukabacalekisi, lokungenani ungababusisi.”

²⁶ Bhalamu waphendvula, watsi: “Angikakutjeli yini kutsi kufanele ngikhulume loko lengikutjelwa nguSimakadze?”

Umlayeto wesitsatfu waBhalamu

²⁷ Bhalaki wakhuluma kuBhalamu, watsi: “Kota, sihambe nawe, siye kulenye indzawo, mhlawumbe kungahle kumjabulise Nkulunkulu, akuvumele kutsi ungicalekisele lesive ukuleyo ndzawo.”

²⁸ Bhalaki watsatsa Bhalamu, bobabili benyukela esicongweni sentsaba iPheyori leyengamele lihlane.

²⁹ Bhalamu wakhuluma watsi: “Ngakhele emalati lasikhombisa lapha, ungilungisele tinkunzi letisikhombisa netihhanca letisikhombisa.”

³⁰ Bhalaki wenta njengekusho kwaBhalamu, wanikela inkunzi nesihhanca kulelo nakulelo lilati.