Numeri 14 - Siswati 1996 Bible

Bantfu bayasola

¹ Kubo lobo busuku bonkhe bantfu bakhihla lesikhulu sililo.

² Onkhe ema-Israyeli asola boMosi na-Aroni atsi kubo: “Kube samane safela eGibhithe nome ehlane.

³ Simakadze usiletseleni kulelive kutsi sitewubulawa bese kutfunjwa bafati betfu nebantfwabetfu? Kungete kwaba ncono yini kutsi sincandzeke sibuyele eGibhithe?”

⁴ Bakhuluma bodvwana batsi: “Asikhetse umholi, sincandzeke sibuyele eGibhithe.”

⁵ BoMosi na-Aroni bakhotsamisa buso babo embikwesive sonkhe sema-Israyeli lesasihlangene lapho.

⁶ Joshuwa, umsa waNuni, naKhalebi, umsa waJefune, lababehambe nalamadvodza labeyewuhlola lelive, badzabula timphahla tabo,

⁷ bakhuluma kulesive sonkhe sema-Israyeli, batsi: “Lelive silihambe lonkhe, silihlola; salikhandza kutsi lihle kakhulu.

⁸ Nangabe Simakadze asitfokotela, utasihola, siyewungena kulelive leligcwele lubisi neluju lwetinyosi, asiphe lona.

⁹ Musani kuhlubuka Simakadze, futsi ningabesabi nalabantfu balelive, ngobe sitabagwinya. Sivikelo sabo sesihambile, kodvwa Simakadze unatsi. Ningabesabi.”

¹⁰ Sonkhe sive savele satimisela kubagcoba ngematje. Kwase kubonakala inkhatimulo yaSimakadze ethendeni lekuhlangana; onkhe ema-Israyeli ayibona.

Mosi uthandazela sive

¹¹ Simakadze wakhuluma kuMosi, watsi: “Labantfu batawuchubeka nekungedzelela kuze kube ngunini? Batakwala kukholwa ngimi kuze kube ngunini, etikwaletibonakaliso temimangaliso lengitente kubo?

¹² Ngitawubashaya ngesifo sitekubabhubhisa, kodvwa wena ngitakwenta ube nguyise wesive lesitawuba sikhulu sibe nemandla kunabo.”

¹³ Mosi wakhuluma kuSimakadze, watsi: “EmaGibhithe atakuva ngaleyontfo. Lesive wasikhipha emkhatsini wawo ngemandla akho.

¹⁴ Loko ayakukutjela letive letakhe kulelive. Nabo labantfu bakulesive sebevile kutsi wena, Simakadze, usemkhatsini walesive nekutsi wena, Simakadze, ubonakala kuso buso nebuso; lifu lakho lihlala etikwabo, nekutsi emini uhamba embikwabo ngensika yelifu, bese kutsi ebusuku uhambe embikwabo ngensika yemlilo.

¹⁵ Nawusibulala ngasikhatsi sinye lesive sonkhe, tonkhe letive letiwuvile lombiko ngawe tiyawutsi:

¹⁶ ‘Simakadze wehlulekile kungenisa lesive sakhe eveni labefunge kutsi utasingenisa kulo; wababulalela ehlane bonkhe.’

¹⁷ Ngako-ke ngicela kutsi Simakadze akhombise emandla akhe, njengobe asho, watsi:

¹⁸ ‘Simakadze uyephuta kutfukutsela andze ngemusa, atsetselele sono nekuhlubuka. Noko lonelicala akamshiyi angakamjezisi; yena ujezisa bantfwana ngesono saboyise situkulwane sesitsatfu nesesine.’

¹⁹ Njengobe wena, Simakadze, unelutsandvo lolukhulu, tsetselela sono salabantfu njengobe bewusolo ubatsetselela, kusukela besuka eGibhithe kuze kube ngunyalo.”

²⁰ Simakadze wamphendvula watsi: “Sengibatsetselele, njengobe ucelile.

²¹ Kodvwa ngiyetsembisa ngitsi ngifunga kuphila kwami nenkhatimulo yami legcwele umhlaba wonkhe,

²² kute nome munye walabantfu lababona inkhatimulo yami netibonakaliso letiyimimangaliso lengatenta eGibhithe nasehlane kodvwa bangete bangilalela, bangilinga emahlandla lalishumi,

²³ kute namunye wabo loyawulibona lelive lengafunga ngalo kuboyisemkhulu kutsi ngitabanika lona. Kute namunye lotalibona kulabo labangedzelela.

²⁴ Kodvwa njengobe inceku yami Khalebi anemoya lowehlukile futsi ungilandzela ngenhlitiyo yakhe yonkhe, ngitamngenisa kulelive laya kulo, nebatukulu bakhe bayawulidla libe lifa labo.

²⁵ Njengobe ema-Amaleki nemaKhenani ahlala kulesigodzi, ncandzeka kusasa ucondze ngasehlane ngemgwaco lobheke ngaseLwandle Lolubovu.”

Simakadze ujezisa bantfu ngekusola kwabo

²⁶ Simakadze wakhuluma kuboMosi na-Aroni, watsi:

²⁷ “Kutawuze kube ngunini lesive lesikhohlakele singisola? Sengikuvile kusola kwalama-Israyeli lakhononako.

²⁸ Ngako-ke batjele utsi: ‘Simakadze utsi: Ngifunga kuphila kwami kutsi ngitakwenta kini tona kanye leto tintfo benginive nitisho.

²⁹ Nitakufa, tidvumbu tenu tigcwale lonkhe lelihlane, nonkhe nine lenineminyaka lengema-20 kuya etulu nangenela lubalo, nangisola nekungisola.

³⁰ Kute nome munye wenu loyawungena kulelo live lengalifungela ngekuphakamisa sandla kutsi kutawuba likhaya lenu, ngaphandle kwaboKhalebi, umsa waJefune, kanye naJoshuwa, umsa waNuni.

³¹ Bantfwabenu lenakhuluma ngabo natsi batawubulawa batfunjwe, mine-ke ngitabangenisa futsi balati lelive lenilalile.

³² Kodvwa nine nitawufela lapha ehlane.

³³ Bantfwabenu batawuba belusi khona lapha, kuze kuphele iminyaka lengema-40, bahlupheka ngenca yekungetsembeki kwenu, kuze kufe newekugcina wenu.

³⁴ Niyawuhlupheka kuze kuphele iminyaka lengema-40 ngenca yetono tenu, umnyaka umele lilanga linye lalawo langema-40, lenawacitsa nihlolisisa lelive, kuze nati kahle kutsi kuyini kumelana kwenu nami.’

³⁵ Mine, Simakadze, sengikhulumile, futsi ngitakwenta loko kuso sonkhe lesive lesonakele lesihlanganele kumelana nami. Batawuhlangana nesiphetfo sabo lapha kulelihlane, baphelele khona.”

³⁶ Ngako lamadvodza labetfunywe nguMosi kuyawuhlola lelive ase abuya afaka umoya wekusola kuso sonkhe sive ngalombiko wawo lomubi ngalelive,

³⁷ yebo, lamadvodza lafike asakata lomoya wekusola ngekuletsa umbiko lomubi ngalelive, ashaywa ngesifo afa, embikwaSimakadze.

³⁸ Emkhatsini walamadvodza laya kuyawuhlola lelive kwasala boJoshuwa, umsa waNuni, naKhalebi, umsa waJefune.

Imitamo yekucala yekuhlasela lelo live

³⁹ Watsi kube Mosi awabikele onkhe ema-Israyeli loko, akhala kakhulukati.

⁴⁰ Ekuseni ngeluvivi ngakusasa enyukela etulu acondza eveni letintsaba, afike atsi: “Sonile, sitakuya eveni Simakadze lasetsembisa lona.”

⁴¹ Mosi wakhuluma watsi: “Pho, nentelani lokungawulaleli umyalo waNkulunkulu? Loku ngeke kuphumelele!

⁴² Ningacali nenyuke, ngobe Simakadze akekho emkhatsini wenu. Titsa tenu titawunehlula,

⁴³ ngobe ema-Amaleki nemaKhenani atawuhlangana nani lapho. Njengobe nisukile kuSimakadze, naye angeke abe nani, ngako nitakuwa ngelusiko lwenkemba.”

⁴⁴ Noko bajinge benyukela etulu eveni letintsaba, nome Mosi kanye nelibhokisi lesivumelwane lalingakesuswa enkambu.

⁴⁵ Ema-Amaleki nemaKhenani labehlala kulelo live letintsaba ehla atewubahlasela, abehlula abacosha, adzimate ababeka eHoma.