Numeri 13 - Siswati 1996 Bible

Tinhloli

¹ Simakadze wakhuluma kuMosi, watsi:

² “Tfumela lamanye emadvodza kutsi ayewuhlola lelive laseKhenani lengilipha ema-Israyeli. Tfumela umholi abe munye kuleso nakuleso sive.”

³ Ngako-ke Mosi wenta njengobe abeyalwe nguSimakadze, wabatfuma aseseHlane lasePharani. Onkhe lamadvodza abebaholi bema-Israyeli.

⁴ Nankha-ke emabito awo: Esiveni sakaRubeni kwakunguShamuwa, umsa waZakhuri;

⁵ esiveni sakaSimeyoni kwakunguShafati, umsa waHori;

⁶ esiveni sakaJuda kwakunguKhalebi, umsa waJefune;

⁷ esiveni saka-Isakhari kwakungu-Igali, umsa waJosefa;

⁸ esiveni saka-Efrayimu kwakunguHosheya, umsa waNuni;

⁹ esiveni sakaBhenjamini kwakunguPhaliti, umsa waRafu;

¹⁰ esiveni sakaZebuloni kwakunguGadiyeli, umsa waSodi;

¹¹ esiveni sakaManase, lekwakusive sakaJosefa, kwakunguGadi, umsa waSusi;

¹² esiveni sakaDani kwakungu-Amiyeli, umsa waGemali;

¹³ esiveni saka-Asheri kwakunguSethuri, umsa waMikhayeli;

¹⁴ esiveni sakaNaftali kwakunguNahibi, umsa waVofisi;

¹⁵ esiveni sakaGadi kwakunguGewuweli, umsa waMakhi.

¹⁶ Ngiwo lawa-ke emabito alamadvodza latfunywa nguMosi kutsi ayewuhlola lelo live. Mosi wetsa Hosheya, umsa waNuni, libito, watsi nguJoshuwa.

¹⁷ Mosi nabatfuma kutsi baye kuyawuhlola lelo live laseKhenani, wakhuluma kubo, watsi: “Khuphukani, ningene ngaseningizimu nelive laseKhenani nize niyewufika etintsabeni.

¹⁸ Hlolisisani kutsi lelo live linjani, nekutsi labantfu labahlala kulo bacinile yini nome babutsakatsaka, nekutsi bambalwa yini nome banyenti.

¹⁹ Bahlala eveni lelinjani? Lihle yini nome libi? Bahlala emadolobheni lanjani? Lamadolobha abo akabiyelwe yini ngetibondza nome abiyelwe atinqaba?

²⁰ Umhlaba walo unjani? Uvundzile yini nome awukavundzi? Tikhona yini tihlahla nome atikho? Nibetama ngawo onkhe emandla enu kutsi niphatse titselo talo lelive!” Bekusikhatsi sekuvutfwa kwemagelebisi ekucala emnyakeni.

²¹ Benyuka, bafike balihlola lonkhe lelo live kusukela eHlane laseSini kuze kuyewufika eRehobu, edvute nemsaho, iHamathi.

²² Benyuka badzabula iNegevu, lekuyiningizimu yelive laseKhenani, baze befika eHebroni, lapho kwakuhlala khona bo-Ahimani, naSheshayi, naThalmayi, titukulwane ta-Anaki. IHebroni yayakhiwe iminyaka lesikhombisa ngaphambi kweSowani yaseGibhithe.

²³ Batsi nabefika eSihosheni sase-Eshikholi, bajuba ligala lelalinesikhehle semagelebisi. Lababili babo baletfwala ngekuletjatsa ngelubhoko emkhatsini wabo, bengeta ngemahananandza nangemakhiwa.

²⁴ Leyo ndzawo yetsiwa ngekutsi Sihosha sase-Eshikholi, ngobe ngulapho tinhloli tema-Israyeli tajuba khona sikhehle semagelebisi.

²⁵ Ekupheleni kwemalanga langema-40 babuya ekuhloleni kwabo live.

²⁶ Befika kuboMosi, na-Aroni kanye nesive sonkhe sema-Israyeli eKhadeshi, eHlane lasePharani. Befika bababikela kanye nesive sonkhe, badzimate babakhombisa netitselo talelo live.

²⁷ Betfula umbiko kuMosi, batsi: “Sihambile saya kulelive lositfume kutsi siyekulihlola; sakhandza kutsi, vele live leligcwele lubisi neluju lwetinyosi. Nati nje letinye titselo talo.

²⁸ Kodvwa bantfu labahlala kulelive banemandla, nemadolobha akhona atinqaba kantsi futsi makhulu kakhulu. Sabona ngisho netitukulwane ta-Anaki khona lapho.

²⁹ Ema-Amaleki ahlala eningizimu nelive; emaHethi, nemaJebhusi, nema-Amori wona ahlala eveni letintsaba, emaKhenani ahlala ngaselwandle, nangasemfuleni iJordane.”

³⁰ Khalebi wababindzisa bonkhe bantfu embikwaMosi, wakhuluma watsi: “Asikhuphuke siyewulidla lelive, ngobe vele singakhona kulincoba.”

³¹ Kodvwa lamadvodza labenyuke naye akhuluma atsi: “Singeke sikhone kulwa nalabantfu; bacinile kunatsi.”

³² Ngako basakata umbiko lomubi esiveni sema-Israyeli ngalelive bebayewulihlola. Bakhuluma, batsi: “Lelive lesidzabule kulo silihlola, lilive lelidla bantfu labahlala kulo. Bonkhe labantfu lesibabonile kulo badze kakhulu.

³³ Size sabona ngisho nemaNifilu, emadvodzana a-Anaki layintalelwane yemaNifilu. Sitibone singangetintsetse kubo, nabo futsi basibona singangato.”