Numeri 10 - Siswati 1996 Bible

Emacilongo esiliva

¹ Simakadze wakhuluma kuMosi, watsi:

² “Yakha emacilongo lamabili esiliva legcotjiwe; lamacilongo ayawusetjentiswa ekubiteni sive nasekudzilitweni kwemathende nase kutfutfwa.

³ Nakushaywa lamacilongo lamabili, sive sonkhe siyawubutsana kuwe ekungeneni kwelithende lekuhlangana.

⁴ Kodvwa nakukhala linye licilongo kuphela, kuyawubutsana kuwe baholi bodvwa, lekungutona tinhloko tetive tema-Israyeli.

⁵ Licilongo nalikhala tikhawu letimfisha kwekucala, tonkhe tive letingasemphumalanga tiyawuphuma tihambe.

⁶ Licilongo nalikhala tikhawu letimfisha kwesibili, tonkhe tive letingaseningizimu tiyawuphuma tihambe. Ngako-ke emathende ayawudzilitwa, nangabe licilongo likhala tikhawu letimfisha,

⁷ kodvwa nangabe kubitwa sive sonkhe, liyawukhala tikhawu letindze.

⁸ Lamacilongo ayawushaywa ngemadvodzana a-Aroni, baphristi. “Lomyalo uyakwentiwa sive sema-Israyeli kuto tonkhe titukulwane.

⁹ Naniyakulwa imphi eveni lenu nihlaselwa titsa tinivimbetela, niyawukhalisa licilongo ngetikhawu tekuhlaba inyandzaleyo. Mine, Simakadze, Nkulunkulu wenu ngiyakunikhumbula nginisite, bese ngiyanephula etitseni tenu.

¹⁰ Nangemikhosi yenu yekujabula, ngemkhosi wekwetfwasa kwenyanga lensha nangaleminye imikhosi yekukhonta, niyawushaya emacilongo, nanetfula iminikelo yenu yekushiswa neminikelo yenu yekuthula lenguyona iyawuba sikhumbuto senu embikwaNkulunkulu wenu. Mine nginguSimakadze Nkulunkulu wenu.”

Ema-Israyeli ayatfutsa

¹¹ Mhlazana tingema-20, enyangeni yesibili, emnyakeni wesibili, lifu lelalisetikwelithende lesivumelwane laphakama.

¹² Sive sema-Israyeli satfutsa eHlane laseSinayi, siphuma ngeticheme taso. Lifu lahamba laze layakuma eHlane lasePharani.

¹³ Babecala kutfutsa bayalwa nguSimakadze ngemlomo waMosi.

¹⁴ Ticheme tesive sakaJuda tatfutsa kucala ngetigaba taso ngaphansi kwesiboniso sebuve baso. Umholi wato bekunguNasoni, umsa wa-Aminadabi.

¹⁵ Umholi wesicheme sesive saka-Isakhari bekunguNethaneli, umsa waSuwari.

¹⁶ Umholi wesicheme sesive sakaZebuloni bekungu-Eliyabe, umsa waHeloni.

¹⁷ Kwase kufutwa lelithende lekukhontela, emadvodzana akaGeshoni newakaMerari labenguwona etfwala lithende, aphuma ahamba.

¹⁸ Kwase kulandzela ticheme tesive sakaRubeni ngetigaba taso ngaphansi kwesiboniso sebuve baso. Umholi waso bekungu-Elisuri, umsa waShedewuri.

¹⁹ Umholi wesive sakaSimeyoni bekunguShelumiyeli, umsa waSurishadayi.

²⁰ Umholi wesicheme sesive sakaGadi bekungu-Eliyasafa, umsa waDehuweli.

²¹ Kwase kulandzela sicheme sesive semaKhohati lesasingusona setfwala tintfo letingcwele. Sona sasitsi sifika sikhandze lithende lekukhontela selakhiwe laphelela.

²² Kwase kulandzela ticheme tesive saka-Efrayimu ngetigaba taso ngaphansi kwesiboniso sebuve baso. Umholi waso bekungu-Elishama, umsa wa-Amihudi.

²³ Umholi wesive sakaManase bekunguGamaliyeli, umsa waPhedasuri.

²⁴ Umholi wesive sakaBhenjamini bekungu-Abidani, umsa waGideyoni.

²⁵ Ekugcineni kwase kulandzela tigaba teticheme tesive sakaDani ngaphansi kwesiboniso sebuve baso letaba sivikelo sema-Israyeli ngemuva. Umholi waso bekungu-Ahiyezeri, umsa wa-Amishadayi.

²⁶ Umholi wesive saka-Asheri bekunguPhagiyeli, umsa wa-Okrani.

²⁷ Umholi wesicheme sesive sakaNaftali bekungu-Ahira, umsa wa-Enani.

²⁸ Loko-ke bekungukona kuhleleka kwekuphuma kwema-Israyeli ngekweticheme tawo, njalo nje nakatfutsa.

²⁹ Mosi wakhuluma kuHobabi, umsa waRehuweli, umMidiyani, uyisetala waMosi, watsi: “Tsine sesiyatfutsa lapha, sesiya eveni latsi Simakadze utasinika lona. Hamba kanye natsi, sitakuphatsa kahle, ngobe Simakadze ema-Israyeli uwetsembise tintfo letinhle.”

³⁰ Hobabi waphendvula watsi: “Cha, ngingeke ngihambe nani; sengibuyela eveni lakitsi nasesiveni sakitsi.”

³¹ Mosi wamncenga atsi: “Mane ungasishiyi; wena phela uyati lapho kufanele simise khona kutsi ngusehlane; wena ungasisita ube liso letfu.

³² Nawungahamba natsi, siyawuhlephunelana nawe konkhe lokuhle Simakadze layakusipha kona.”

Sive siyatfutsa

³³ Satsi sive sema-Israyeli nasisuka eNtsabeni yaSimakadze, satsatsa emalanga lamatsatfu sihamba. Libhokisi lesivumelwane saSimakadze lalihamba embikwabo ngawo onkhe lawo malanga lamatsatfu, libabukela indzawo lapho kwakufanele baphumule khona.

³⁴ Babetsi njalo nje nabatfutsako, lifu laSimakadze libesetikwabo emini.

³⁵ Kwakutsi njalo nakuphuma libhokisi lesivumelwane, Mosi atsi: “Phakama Simakadze, uhlakate titsa takho, ubacoshe labo labakutondzako.”

³⁶ Kwakutsi njalo nalima lelibhokisi, atsi: “Buya Simakadze, buya etigidzigidzini temindeni yaka-Israyeli.”