Matewu 28 - Siswati 1996 Bible

Jesu uvuka ekufeni

¹ EmvakweliSabatha, ekuseni ngeluvivi ngeliSontfo, Mariya waseMagdala nalomunye Mariya baya kuyawubona lithuna.

² Kwaba khona kutamatama kwemhlaba lokukhulu, ingilosi yeNkhosi yehla ezulwini, yaligicita lelitje, yase ihlala etikwalo.

³ Lengilosi yayinjengembane, timphahla tayo tatimhlophe njengesitfwatfwa.

⁴ Kepha balinidzi befikelwa kwesaba, bachachatela, baze baba njengalabafile.

⁵ Ingilosi yatsi kulabafati: “Ningesabi, ngiyati kutsi nifuna Jesu labebetselwe esiphambanweni.

⁶ Akekho lapha; uvukile, njengobe abeshito. Wotani nitewubona indzawo lapho abelele khona.

⁷ Hambani masinyane niyewutjela bafundzi bakhe nitsi: ‘Sewuvukile kulabafile, nyalo nje sewusembili kunani uya eGalile; nitawumbona khona.’ Nibokukhumbula loku lenginitjela kona.”

⁸ Base basheshe bayesuka ethuneni, ngobe babesaba, kantsi futsi babejabule kakhulu, bagijima bayawutjela bafundzi bakhe.

⁹ Jesu wefika kubo watsi: “Kuthula akube kini!” Beta kuye, bambamba tinyawo, base bakhuleka kuye.

¹⁰ Jesu watsi kubo: “Ningesabi! Hambani nibikele bomnaketfu kutsi, abahambe baye eGalile, bayawungibona khona.”

Umbiko webalindzi

¹¹ Batsi labafati basahamba, bancandzeka, labanye balindzi baya edolobheni, babikela baphristi labakhulu ngako konkhe lokwase kwentekile.

¹² Kwatsi baphristi labakhulu netibondza nasebahlangene bakha lisu, banika balindzi imali lenkhulu,

¹³ batsi: “Nibotsi: ‘Bafundzi bakhe befike ebusuku, baseba sidvumbu sakhe, tsine sisatunywe butfongo.’

¹⁴ Lusibalukhulu nakuva loko, tsine siyawumchazela, eve kahle, ningahlupheki nine.”

¹⁵ Balindzi bayitsatsa lemali, benta njengobe babetjeliwe. Kuze kube ngulamuhla emaJuda abambelele kulawo mavi.

Jesu utibonakalisa kubafundzi bakhe

¹⁶ Kepha bafundzi labali-11 baya kulentsaba yaseGalile, lapho Jesu abebatjele kutsi baye khona.

¹⁷ Batsi nabambona bakhuleka kuye, noko labanye babo babesangabata.

¹⁸ Jesu wasondzela kubo watsi: “Ngiphiwe emandla onkhe ezulwini nasemhlabeni.

¹⁹ Ngako-ke hambani, nente tive tonkhe tibe bafundzi bami, nibabhabhatise egameni leYise, neleNdvodzana, nelaMoya Longcwele,

²⁰ nibafundzise kugcina konkhe lenginiyale ngako. Nibokwati kutsi mine nginani onkhe emalanga, kuze kube ngusekupheleni kwetikhatsi.”