Matewu 25 - Siswati 1996 Bible

Umfanekiso ngetintfombi letilishumi

¹ “Ngaleso sikhatsi umbuso welizulu uyawufanana netintfombi letilishumi letatsatsa tibane tato, taphuma tayawuhlangabeta umyeni.

² Letisihlanu tatitilima, letinye letisihlanu tatihlakaniphile.

³ Leti letatitilima tatsatsa tibane tato, kodvwa tangete tawaphatsa emafutsa ekukhanyisa;

⁴ kantsi leti letatihlakaniphile tatsatsa tibane tato, tatiphatsela nemafutsa.

⁵ Ngenca yekwephuta kwemyeni kufika, tetela tonkhe talala.

⁶ “Kwatsi ekhatsi nebusuku kwevakala umsindvo kumenyetwa kutsiwa: ‘Nangu umyeni! Phumani, nimhlangabete!’

⁷ Tavuka-ke tonkhe leto tintfombi letatilishumi talungisa tibane tato.

⁸ Leti letatitilima tatsi kuleti letatihlakaniphile: ‘Sipheni emafutsa kulawa enu, ngobe tibane tetfu tiyacisha.’

⁹ Kepha letatihlakaniphile taphendvula tatsi: ‘Cha, ngeke asenele tsine nani. Lokuncono hambani niye kulabawatsengisako, niyetitsengela kubo!’

¹⁰ Tatsi tisehambile tiyewutsenga, wefika umyeni; leti letatilungele tangena kanye naye edzilini lemshado, umnyango wavalwa.

¹¹ “Emvakwesikhatsi tefika leti letinye tintfombi tatsi: ‘Nkhosi, Nkhosi! Sivulele!’

¹² Kodvwa umyeni waphendvula watsi: ‘Ngicinisile, ngitsi kini: Anginati.’

¹³ “Ngako-ke lindzani, ngobe lilanga nemzuzu ningakwati.”

Umfanekiso ngetisebenti letintsatfu

¹⁴ “Kunjengendvodza leyatsi seyitawuhamba emtini wayo yabita tisebenti tayo, yatinika emandla ekuphatsa timphahla tayo.

¹⁵ Lesinye yasinika emathalenta lasihlanu, lesinye yasinika aba mabili, lesinye laba linye: nguleso njengemandla aso; yesuka ekhaya yahamba.

¹⁶ “Masinyane lesi lesemukela lasihlanu sawatalisa, saze satfola lamanye lasihlanu.

¹⁷ Kanjalo futsi nalesi lesemukela emathalenta lamabili sawatalisa, atala lamanye lamabili.

¹⁸ Kepha lesi lesemukela linye sahamba sayawulimbela emhlabatsini, salifihla lithalenta lenkhosi yaso.

¹⁹ “Emvakwesikhatsi lesidze lenkhosi yefika seyitewubalisana nato.

²⁰ Seta lesisebenti lesasinikwe emathalenta lasihlanu, saletsa lamanye emathalenta lasihlanu, satsi: ‘Nkhosi, wanginika emathalenta lasihlanu; nankha lamanye lasihlanu lengiwatalisile.’

²¹ Inkhosi yaso yatsi kuso: ‘Wente kahle, sisebenti lesihle nalesetsembekile; wetsembekile etintfweni letincane, ngako ngitakubeka wengamele lokunyenti. Ngena ekujabuleni kwenkhosi yakho!’

²² “Seta nalesi lesinye sisebenti lebesemukele emathalenta lamabili, satsi: ‘Nkhosi, wanginika emathalenta lamabili; nankha lamanye lamabili lengiwatalisile.’

²³ Inkhosi yaso yatsi kuso: ‘Wente kahle, sisebenti lesihle nalesetsembekile; wetsembekile etintfweni letincane, ngako ngitakubeka wengamele lokunyenti. Ngena ekujabuleni kwenkhosi yakho!’

²⁴ “Kwase kungena lesisebenti lesasinikwe lithalenta linye, safike satsi: ‘Nkhosi, ngatile kutsi ungumuntfu lonelulaka. Uvuna lapho ungazange sewuhlanyele khona, ubutse lapho ungazange sewusakate khona.

²⁵ Ngekwesaba ngahamba ngayawulimbela lithalenta lakho. Ngako-ke naku lokukwakho.’

²⁶ “Inkhosi yaso yatsi kuso: ‘Wena sisebenti lesibi nalesivilaphako! Bewati kutsi ngivuna lapho ngingakahlanyeli khona, ngiphindze ngibutse lapho ngingakasakati khona.

²⁷ Ngako-ke, ngabe utsatse lemali yami wayifaka ebhange, bengitayikhandza seyinentalo.

²⁸ “ ‘Memukeni lelithalenta, nilinike lona lonemathalenta lalishumi!

²⁹ Ngobe ngulowo nalowo lonako uyakwengetelwa abe nako kakhulu, kodvwa lowo longenako uyakwemukwa naloko lanako.

³⁰ “ ‘Lesisebenti lesingenalusito silahleni ngephandle ebumnyameni, lapho kuyawuba khona kukhala nekugedletelisa ematinyo.’ ”

Kwehlulelwa kwekugcina

³¹ “INdvodzana yeMuntfu nayita ngenkhatimulo yayo netingilosi tayo tonkhe, iyawuhlala esihlalweni sayo sebukhosi,

³² tonkhe tive temhlaba tiyawubutselwa embikwayo. Iyawubehlukanisa labanye kulabanye, njengemelusi ehlukanisa timvu netimbuti.

³³ Iyawumisa timvu ngesekudla sayo, netimbuti ngesancele.

³⁴ “Lapho-ke iNkhosi iyawutsi kulabo labangesekudla sayo: ‘Wotani, nine lenibusiswe nguBabe! Wotani nitewudla lifa lembuso, lenawulungiselelwa seloku kwasekelwa umhlaba.

³⁵ Ngobe ngangilambile, nangipha kudla; ngangomile, nanginatsisa; ngangisihambi, nangemukela emitini yenu;

³⁶ ngangingcunu, nangigcokisa; ngangigula, nangivakashela; ngangisejele, neta kimi.’

³⁷ “Laba labalungile bayakumbuta batsi: ‘Nkhosi, kunini lapho sakubona khona ulambile sakupha kudla, nome womile sakunatsisa?

³⁸ Sakubona nini usihambi sakwemukela emitini yetfu, nome ungcunu sakwembatsisa?

³⁹ Sakubona nini ugula, nome usejele sakuvakashela?’

⁴⁰ INkhosi iyawubaphendvula itsi: ‘Ngicinisile, ngitsi kini: Konkhe loko lenanikwenta kulomunye walabanaketfu labancane, nanikwenta kimi!’

⁴¹ “Iyawutsi kulaba labangesancele: ‘Khweshani kimi, nine labacalekisiwe, niye emlilweni waphakadze lolungiselwe Sathane netingilosi takhe!

⁴² Ngobe ngangilambile, kodvwa aningiphanga kudla; ngangomile, aninginatsisanga.

⁴³ Ngangisihambi, kodvwa aningingenisanga emitini yenu; ngangingcunu, kodvwa aningigcokisanga; ngangigula, ngangisejele, kodvwa aningivakashelanga.’

⁴⁴ “Bayakumbuta batsi: ‘Nkhosi, sakubona nini ulambile, nome womile, nome usihambi, nome ungcunu, nome ugula, nome usejele, sangete sakusita?’

⁴⁵ INkhosi iyawubaphendvula itsi: ‘Ngicinisile, ngitsi kini: Loko leningakwentanga kulomunye walaba labancane, anikwentanga kimi.’

⁴⁶ Labo-ke bayawuhamba baye ekujezisweni kwaphakadze; kodvwa labalungile bayakuya ekuphileni kwaphakadze.”