Matewu 20 - Siswati 1996 Bible

Tisebenti esivinini

¹ “Umbuso welizulu ufanana nemnikati wesivini, lowaphuma ekuseni ayawucasha emadvodza ekusebenta esivinini sakhe.

² Watsi asavumelene naletisebenti kutsi utatiholela denariyo munye ngelilanga, wase ubatfumela esivinini sakhe,

³ watsi uyaphuma futsi ngeli-awa lemfica, wabona lamanye emadvodza emile nje emakethe ayingilekile,

⁴ nakuwo watsi: ‘Hambani nani niyewusebenta esivinini sami, ngitaniholela loko lokunifanele.’ Bahamba-ke.

⁵ Waphindze waphuma futsi emini ngeli-awa leli-12, kwaba njalo, nangeli-awa lesitsatfu entsambama wenta njalo.

⁶ Kwakungacishe kube li-awa lesihlanu entsambama lapho atsi uyaphuma futsi, wakhandza labanye bemile. Wafike wababuta watsi: ‘Nimeleni lapha lonkhe lelilanga seloku ningenti lutfo?’

⁷ Batsi kuye: ‘Kute losicashile.’ Wase utsi nakubo: ‘Kulungile, hambani nani niye esivinini sami!’

⁸ “Kwatsi entsambama lomniyo wesivini watsi endvuneni yakhe: ‘Bita tonkhe tisebenti, utiholele imali yato, ucale ngaleti tekugcina, ugcine ngaleti tekucala!’

⁹ Kutsite natifika leti teli-awa lesihlanu entsambama, watiholela denariyo munye sisinye.

¹⁰ Nabefika laba bekucala, bebacabanga kutsi utabaholela kakhudlwana, kodvwa nabo wabaholela denariyo munye, umuntfu amunye.

¹¹ Batsi nabamemukela, bacala bakhonona kulomnikati wesivini,

¹² batsi: ‘Laba bekugcina basebente li-awa linye nje, ubalinganiseleni natsi lesitfwele bumatima lobungaka, sashiswa nalilanga lasensimini?’

¹³ “Waphendvula watsi kulomunye wabo: ‘Mnganami, phela angikoni; kantsi kakadze besingakavumelani ngadenariyo munye yini nawe?

¹⁴ Tsatsa lokukwakho sehlukane; kepha mine ngiyatitsandzela kunika nalona wekugcina liholo lelingangelakho.

¹⁵ Kantsi angikavumeleki yini kwenta lengikutsandzako ngalokukwami? Nome unemona ngekutsi ngiyephana?’

¹⁶ “Kanjalo bekugcina bayawuba bekucala, nebekucala babe bekugcina.”

Jesu ukhuluma kwesitsatfu ngekufa kwakhe

¹⁷ Watsi Jesu asesendleleni enyukela eJerusalema, wabitela bafundzi bakhe ngasense, wakhuluma nabo endleleni, watsi:

¹⁸ “Lalelani la, sesiya eJerusalema, lapho iNdvodzana yeMuntfu itawunikelwa kubaphristi labakhulu netati temtsetfo, bese bayilahla ngelicala kutsi ibulawe.

¹⁹ Batayinikela etandleni tebetive, kuze iphukutwe, bayishaye, bese bayibetsela esiphambanweni; kodvwa ngelilanga lesitsatfu itawuvuswa ekufeni.”

Sicelo senina

²⁰ Kwase kufika kuye unina wemadvodzana aZebedi nalamadvodzana akhe, wakhotsama embikwakhe, wabeka sicelo.

²¹ Jesu wambuta watsi: “Ufunani?” Watsi yena: “Yetsembisa kutsi lamadvodzana ami lamabili ayawuhlala, lenye ngesekudla sakho, lenye ngesancele sakho embusweni wakho.”

²² Jesu waphendvula watsi: “Anikwati lenikucelako. Ningayinatsa yini lendzebe yelusizi lesengitayinatsa?” Baphendvula batsi: “Singayinatsa.”

²³ Jesu watsi: “Yebo-ke, nitayinatsa leyo ndzebe, kantsi kuhlala ngesekudla sami nangesancele akusiko kwami kutsi ngephane ngako, kodvwa kwalabo labakulungiselelwe nguBabe.”

²⁴ Batsi nabakuva loko labafundzi labalishumi, batitfukutselela letelamani letimbili.

²⁵ Kepha Jesu wababita watsi: “Niyati kutsi babusi betive babusa etikwato, netikhulu tato titiphetse ngetandla letimatima.

²⁶ Akunjalo-ke lapha kini, kodvwa wonkhe umuntfu lofuna kuba mkhulu emkhatsini wenu, akabe sikhonti senu,

²⁷ nalofuna kuba wekucala emkhatsini wenu, akabe sisebenti senu.

²⁸ Njengobe neNdvodzana yeMuntfu ayitelanga kukhontwa, kepha yetela kutawukhonta nekunikela ngemphilo yayo, kutsi ibe yinhlawulo yalabanyenti.”

Jesu uphilisa timphumphutse letimbili

²⁹ Batsi nabaphuma eJerikho, sicumbi lesikhulu salandzela Jesu.

³⁰ Timphumphutse letimbili, letatihleti elusentseni lwemgwaco, teva kutsi nguJesu lona lowengcako, tase tiyamemeta titsi: “Nkhosi, Ndvodzana yaDavide! Sihawukele!”

³¹ Kepha sicumbi sebantfu satitsetsisa sitsi atibindze. Kodvwa kwaba ngukhona timemeta kakhulu titsi: “Nkhosi, Ndvodzana yaDavide! Sihawukele!”

³² Kepha Jesu wema watibita, watibuta watsi: “Nifuna nginenteleni?”

³³ Tatsi kuye: “Nkhosi, sifuna kutsi emehlo etfu avuleke.”

³⁴ Jesu watihawukela, watsintsa emehlo ato, tabona masinyane, tase tiyamlandzela.