Matewu 14 - Siswati 1996 Bible

Kufa kwaJohane uMbhabhatisi

¹ Kwaba nguleso sikhatsi lapho Herodi, inkhosi yaseGalile, eva umbiko ngaJesu.

² Watsi etisebentini takhe: “Lona nguJohane uMbhabhatisi. Sewuvukile ekufeni. Ngiko nje lamandla asebenta kuye.”

³ Ngobe phela Herodi abebambe Johane, wambopha wamfaka ejele, ngenca yaHerodiyasi, umkaFiliphu, umnakabo.

⁴ Ngobe Johane abetsi kuye: “Akukalungi kutsi wena umtsatse!”

⁵ Herodi abefuna kumbulala, kodvwa wesaba bantfu, ngobe bebamtsatsa ngekutsi ngumphrofethi.

⁶ Kwatsi ngelilanga lekutalwa kwaHerodi indvodzakati yaHerodiyasi yeta yagidza embikwetivakashi tonkhe. Herodi wajabula kangangekutsi

⁷ wayetsembisa watsi: “Ngiyafunga kutsi ngitakunika nome ngabe yini loyicelako!”

⁸ Yona seyitjelwe ngunina yatsi: “Ngiphe inhloko yaJohane uMbhabhatisi ibekwe emgcwembeni.”

⁹ Inkhosi yadzabuka kakhulu, kepha ngenca yesifungo sayo lebeseyisentile embikwabo bonkhe lebeyihleti nabo ekudleni, yayaleta kutsi inikwe njengekufisa kwayo.

¹⁰ Ngako-ke kwatfunyelwa, Johane wajutjwa inhloko ejele.

¹¹ Inhloko yakhe yaletfwa ngemgcwembe, yanikwa intfombatana, yona yabe seyiyimikisa kunina.

¹² Bafundzi baJohane beta, basitsatsa sidvumbu sakhe, basingcwaba; base bayahamba bayawubikela Jesu.

Kwesutsiswa kwesicumbi lesinemadvodza lati-5 000

¹³ Watsi kube Jesu ayive lendzaba, wesuka kuleyo ndzawo wakhwela sikebhe, wewela waya endzaweni lete bantfu afuna kuba yedvwana. Bantfu batsi kube bakuve loko, baphuma emitini yabo bamlandzela ngetinyawo.

¹⁴ Jesu watsi uyehla esikebheni, wabona sicumbi lesikhulu sebantfu, waba nesihawu nabo. Wabaphilisa bonkhe lababegula.

¹⁵ Entsambama bafundzi bakhe beta kuye batsi: “Selishonile lilanga, kantsi nala kulihlane. Sale ubahambisa labantfu, baye emadolobheni bayewutifunela labangahle bakudle.”

¹⁶ Kepha Jesu watsi kubo: “Akudzingeki kutsi bahambe, bapheni nine kudla, badle.”

¹⁷ Batsi kuye: “Asinalutfo lapha ngaphandle kwetinkhwa letisihlanu netinhlanti letimbili.”

¹⁸ Watsi yena: “Tiletseni lapha kimi.”

¹⁹ Jesu wase utjela bantfu kutsi bahlale phansi etjanini, watsatsa letinkhwa letisihlanu naletinhlanti letimbili, wabuka etulu, wabusisa. Wahlephula tinkhwa wanika bafundzi bakhe, bona base bemukelisa leticumbi.

²⁰ Bonkhe bantfu badla, besutsa. Bafundzi babutsa timvutfuluka, tacwaba emabhasikidi lali-12.

²¹ Bantfu lababedla kwakungemadvodza labengacishe abe ti-5 000 ngaphandle kwebafati nebantfwana.

Jesu uhamba etikwemanti

²² Jesu wase utjela bafundzi bakhe kutsi bangene esikebheni bahambe embili bewelele ngesheya, yena wasale akhulula ticumbi tebantfu.

²³ Watsi asatihambisile ticumbi, wenyukela entsabeni yedvwa wayawuthandaza, kwadzimate kwahlwa solo ayedvwa kuleyo ndzawo.

²⁴ Sikebhe satsi sesihambe emakhilometha lamanyenti kusuka elusentseni, sashukunyiswa ngemagagasi, ngobe umoya bewuphambene nabo.

²⁵ Kwatsi ekuseni kuseluvivi Jesu weta kubo ahamba etikwemanti.

²⁶ Batsi kube bambone ahamba etikwemanti, bafundzi besaba kakhulu, betfuka bamemeta ngekwesaba batsi: “Sipoko!”

²⁷ Jesu washesha wakhuluma kubo watsi: “Ningesabi, manini sibindzi, ngimi!”

²⁸ Phetro wamphendvula watsi: “Nkhosi, nakunguwe, ngibite ngite lapho kuwe, ngihamba etikwemanti!”

²⁹ Jesu watsi: “Kota!” Ngako Phetro wehla esikebheni waya kuJesu ahamba etikwemanti.

³⁰ Kodvwa watsi kube abone umoya kutsi unemandla, wesaba; asacwila wakhala watsi: “Nkhosi! Ngisindzise!”

³¹ Masinyane Jesu welula sandla sakhe, wambamba watsi: “Maye, kukholwa kwakho kuncane-bo! Ungatsitelani?”

³² Basangena esikebheni umoya wabindza.

³³ Labo labebasesikebheni bamkhotsamela batsi: “Ngempela wena uyiNdvodzana yaNkulunkulu!”

Jesu uphilisa labagulako eGenesaretha

³⁴ Batsi nase bewelele ngesheya, befika eveni laseGenesaretha.

³⁵ Atsi kube emadvodza aleyo ndzawo ambone atfumela tigijimi kulo lonkhe lelo live. Bantfu baletsa kuye bonkhe labebagula.

³⁶ Bamncenga kutsi sale batsintsa nje umphetfo wengubo yakhe. Bonkhe labawutsintsa baphiliswa.