Lukha 4 - Siswati 1996 Bible

Kulingwa kwaJesu

¹ Jesu wabuya eJordane, asagcwele Moya Longcwele. Moya Longcwele wamholela ehlane,

² lapho alingwa nguSathane emalanga langema-40. Abengadli lutfo kulawo malanga, kodvwa indlala wayiva ekupheleni kwawo.

³ Sathane watsi kuye: “Nangabe uyiNdvodzana yaNkulunkulu, tjela nali litje ligucuke libe sinkhwa.”

⁴ Jesu wamphendvula watsi: “UmBhalo utsi: ‘Umuntfu angeke aphile ngesinkhwa sodvwa.’ ”

⁵ Sathane wamphakamisa, wamkhombisa ngekushesha lokukhulu yonkhe imibuso yemhlaba,

⁶ watsi: “Ngitakunika onkhe lamandla, nabo bonkhe lobunjinga, ngobe bonkhe banikwa mine, futsi ngingabunika nome ngubani lengimtsandzako.

⁷ Konkhe loku kungaba kwakho nawungamane ungikhotsamele kanye nje.”

⁸ Jesu wamphendvula watsi: “UmBhalo utsi: ‘Khotsama iNkhosi Nkulunkulu wakho, umkhonte yena yedvwa!’ ”

⁹ Sathane wamtsatsa wamyisa eJerusalema wafike wambeka esicongweni selithempeli watsi: “NawuyiNdvodzana yaNkulunkulu, tijike lapha phansi.

¹⁰ “Ngobe umBhalo utsi: ‘Uyawutfumela tingilosi takhe tikunakekele.’

¹¹ Futsi utsi: ‘Tiyawukugona ngetandla tato, kuze ungalimali netinyawo takho tingakhutjwa ngematje.’ ”

¹² Jesu wamphendvula watsi: “UmBhalo futsi utsi: ‘Ungayilingi iNkhosi, Nkulunkulu wakho.’ ”

¹³ Sathane asacedze kumlinga ngako konkhe, wesuka wamshiya kwesikhashana.

Jesu ucala umsebenti wakhe eGalile

¹⁴ Jesu wabuyela eGalile agcwele emandla aMoya Longcwele. Indzaba yakhe yandza yasakateka naso sonkhe leso sigodzi.

¹⁵ Wafundzisa emasinagogeni abo, bonkhe bantfu bamdvumisa.

Jesu akemukeleki eNazaretha

¹⁶ Jesu waya eNazaretha lapho abekhulele khona, kwatsi ngeliSabatha waya esinagogeni njengaloku abevamisile. Wasukuma asatawufundza imiBhalo.

¹⁷ Bamnika incwadzi ya-Isaya, umphrofethi. Wayisombulula watfola indzawana, wayifundza itsi:

¹⁸ “UMoya weNkhosi ukimi, ngobe ungigcobile kutsi ngishumayele tindzaba letimnandzi etimphuyeni; ungitfumile kutsi ngimemetele inkhululeko kulabatfunjiwe, nekuvula emehlo etimphumphutseni, nekukhulula labacindzetelekile,

¹⁹ ngimemetele umnyaka iNkhosi letakukhombisa umusa wayo ngawo.”

²⁰ Wase uyayigocota lencwadzi uyinika sikhonti ubuyela phansi uyahlala. Bonkhe bantfu esinagogeni bambukisisa.

²¹ Wacala wakhuluma kubantfu watsi: “Lamuhla lomBhalo ugcwalisekile, njengobe nitivele nje kutsi utsini.”

²² Bonkhe bantfu batsatseka ngaye bamangala ngalamagama lamahle lawakhuluma batsi: “Akusiye umsa waJosefa yini lona?”

²³ Watsi kubo: “Ngiyati kutsi nitangivulela lamavi alesiga lesitsi: ‘Nyanga tiphilise,’ niphindze futsi nitsi kimi: ‘Yenta nakuwo lomuti wakini letintfo leseva kutsi utentile eKhaphanawume!’ ”

²⁴ Jesu wachubeka watsi: “Ase nginitjele naku, kutsi umphrofethi akemukeleki endzaweni yangakubo.

²⁵ “Lalelani la kimi, kuliciniso kutsi bekunebafelokati labanyenti ka-Israyeli ngesikhatsi sa-Elija, ngesikhatsi lingani iminyaka lemitsatfu netinyanga letisitfupha, kwase kuba khona indlala lenkhulu eveni lonkhe.

²⁶ Noko Elija akatfunyelwanga ngisho nakumunye wabo, kepha watfunyelwa kulomfelokati abewaseSarepta, esigodzini saseSidoni.

²⁷ Kwakunemalephelo lamanyenti ka-Israyeli ngesikhatsi semphrofethi Elisha, noko kute nalinye lelaphiliswa emkhatsini wawo ngaphandle kwaNahamani, umSiriya.”

²⁸ Bonkhe bantfu esinagogeni bagcwala kutfukutsela nabeva loko,

²⁹ basukuma ngekutfukutsela, bamcosha kulelidolobha bamcondzisa esiweni salentsaba, lapho belakhiwe khona, bentela kumhholokoshisela kuso,

³⁰ kodvwa waphicaphicela emkhatsini wesicumbi sebantfu, wahamba.

Indvodza lenelidimoni

³¹ Jesu wehlela eKhaphanawume, lidolobha laseGalile, lapho afundzisa khona ngemaSabatha.

³² Bamangala bonkhe bantfu ngendlela labekafundzisa ngayo, ngobe emavi akhe bekanemandla.

³³ Bekunendvodza lapho esinagogeni lebeyinelidimoni; yamemeta kakhulu yatsi:

³⁴ “Awu! Jesu waseNazaretha ufunani kitsi? Sewutele kutesibhubhisa yini? Ngiyakwati kutsi ungubani; unguLongcwele waNkulunkulu.”

³⁵ Jesu wawekhuta lomoya watsi: “Thula! Phuma futsi kulomuntfu!” Lidimoni lamjika phansi embikwabo bonkhe, noko laphuma kuye lingakamlimati.

³⁶ Bantfu betfuka bonkhe, bakhuluma bodvwana batsi: “Livi lini leli? Ngeligunya nangemandla lamakhulu lomuntfu ukhalimela imimoya lemibi iphume.”

³⁷ Lendzaba ngaJesu yandza naso sonkhe leso sigodzi.

Jesu uphilisa uninatala waSimoni nebantfu labanyenti

³⁸ Jesu wesuka esinagogeni waya ekhaya kaSimoni. Uninatala waSimoni abephatseke kakhulu ngumkhuhlane; base babikela Jesu ngalowo mkhuhlane wakhe.

³⁹ Jesu waya kuye, wafike wema eceleni kwembhedze wakhe wawekhuta lomkhuhlane; umkhuhlane waphela masinyane kuye, wasukuma khona lapho wayawubalungisela labakudzingako.

⁴⁰ Kwatsi ekushoneni kwelilanga bonkhe labebagulelwa tihlobo tabo tiphetfwe tifo letehlukene batiletsa kuJesu; tonkhe watibeka tandla, watiphilisa.

⁴¹ Kwaphuma nemadimoni ebantfwini labanyenti. Amemeta atsi: “Wena uyiNdvodzana yaNkulunkulu!” Jesu abewekhuta angawavumeli kutsi akhulume, ngobe abemati lamadimoni kutsi unguKhristu.

Jesu ushumayela emasinagogeni aseJudiya

⁴² Jesu waphuma kuseluvivi kulelo dolobha waya lapho kungenabantfu khona. Bantfu base bacala kumfuna, batsi kube bamtfole, betama kumvimbela kutsi angabashiyi.

⁴³ Kodvwa watsi kubo: “Kufanele ngishumayele liVangeli ngembuso waNkulunkulu nakulamanye emadolobha, ngobe Nkulunkulu ungitfume kwenta kona loko.”

⁴⁴ Ngako washumayela emasinagogeni kulo lonke laseJudiya.