Lukha 1 - Siswati 1996 Bible

Singeniso

¹ Tiyofilusi, Labanyenti bente kahle ngekubhala umbiko ngetintfo letentekile emkhatsini wetfu.

² Bakubhala loko lesakutjelwa baphatsi belivi lababetibona letintfo kusukela ekucaleni kwato.

³ Ngako-ke, Mhlonishwa, ngobe ngitifundzisise kahle kusukela ekucaleni letindzaba, ngikubone kufanele kutsi ngikubhalele ngikulandzise kahle ngato.

⁴ Loko ngikwentela kutsi wati ngalokugcwele liciniso lato tonkhe letindzaba lotifundzisiwe.

Kumenyetelwa kwekutalwa kwaJohane uMbhabhatisi

⁵ Ngesikhatsi kubusa Herodi, inkhosi yaseJudiya, kwakunemphristi labebitwa ngekutsi nguZakhariya, abewelicembu la-Abiya lebuphristi. Umkakhe abewesitukulwane sa-Aroni, libito lakhe kungu-Elizabethe.

⁶ Bobabili babephila imphilo lengcwele kuNkulunkulu, babeyigcina yonkhe imiyalo nemitsetfo yeNkhosi.

⁷ Babete bantfwana, ngobe Elizabethe abengatali, futsi bobabili besebakhulile.

⁸ Ngalelinye lilanga kwakuligema laZakhariya lekwenta umsebenti wakhe webuphristi kuNkulunkulu njengalokwakwetayelekile.

⁹ Ngelisiko lebuphristi, abedliwe yinkatho yekutsi ashise imphepho elatini. Ngako-ke wangena ethempelini leNkhosi.

¹⁰ Sicumbi sonkhe sebantfu sasithandaza ngephandle ngesikhatsi ashisa imphepho.

¹¹ Ingilosi yeNkhosi yabonakala kuye, ime ngesandleni sekudla selilati lapho kwakushiselwa khona imphepho.

¹² Nakayibona Zakhariya, wetfuka wesaba.

¹³ Kodvwa ingilosi yatsi kuye: “Ungesabi, Zakhariya! Umthandazo wakho sewuvakele, umkakho Elizabethe utakutalela indvodzana. Utayetsa libito layo utsi nguJohane.

¹⁴ Maye! Utawujabula utfokote kakhulu, nebantfu labanyenti batakujabula kanye nawe ngekutalwa kwakhe,

¹⁵ ngobe uyakuba ngumuntfu lomkhulu ebusweni baNkulunkulu, akayiwulinatsa liwayini nome-ke yini ledzakisako, uyawugcwaliswa ngaMoya Longcwele kusukela angakatalwa.

¹⁶ Uyawubuyisela bantfu labanyenti baka-Israyeli kuNkulunkulu, iNkhosi yabo.

¹⁷ Uyawuhamba embikwakhe ngemoya nangemandla njengemphrofethi Elija. Uyawuhlanganisa boyise nebantfwana babo babuye babe nebudlelwane, agucule bantfu labangalaleli babe ngulabalungile; uyakwenta bantfu balungele kuta kweNkhosi yabo.”

¹⁸ Zakhariya watsi engilosini: “Ngiyawukwati ngani kutsi loku kungiko? Mine nemkami sesibadzala kakhulu.”

¹⁹ Ingilosi yamphendvula yatsi: “NginguGabhriyeli, loma embikwaNkulunkulu, ngitfunywe kutsi ngikhulume kuwe, ngikutjele lendzaba lemnandzi.

²⁰ Kodvwa awukalikholwa livi lami, lelitawugcwaliseka ngesikhatsi lesifanele. Ngako-ke utawuba simungulu; uhlale ungakwati kukhuluma, kuze kufike lelo langa lekuyawugcwaliseka ngalo setsembiso sami.”

²¹ Konkhe loku kwenteka nje bantfu babeloku balindzele Zakhariya, sebamangele kutsi sewephuteleni kangaka ethempelini.

²² Waphuma angasakwati kukhuluma, ngako bavele bati kutsi wembulelwe umbono ethempelini. Njengobe abesasimungulu, wavele wakhuluma nabo ngetandla.

²³ Nasacedze emalanga emsebenti wakhe webuphristi ethempelini, wabuyela ekhaya lakhe.

²⁴ Emvakwesikhatsi umkakhe Elizabethe wakhulelwa, watifihla endlini tinyanga letisihlanu.

²⁵ Wase utsi: “Manje ekugcineni iNkhosi seyingisitile. Seyilisusile lihlazo lami ebantfwini.”

Kumenyetelwa kwekutalwa kwaJesu

²⁶ Ngenyanga yesitfupha Elizabethe atetfwele, Nkulunkulu watfumela ingilosi Gabhriyeli edolobheni laseGalile, lelitsiwa yiNazaretha.

²⁷ Beyitfunywe entfombini lenguMariya labesamiselwe Josefa, lijaha lelusendvo lwenkhosi Davide.

²⁸ Ingilosi yeta kuye, yefika yatsi: “E! Sikhulekile! Wena lobusisekile, iNkhosi inawe.”

²⁹ Mariya yamkhatsata kakhulu lenkhulumo yengilosi, wamangala kutsi lenkhulumo isho kutsini.

³⁰ Ingilosi yase itsi kuye: “Ungesabi, Mariya, ngobe utfole umusa kuNkulunkulu.

³¹ Utawukhulelwa utale indvodzana, uyetse libito utsi nguJesu.

³² Uyawuba mkhulu, abitwe ngekutsi yiNdvodzana yaNkulunkulu Losetikwako Konkhe. Nkulunkulu iNkhosi iyawumnika sihlalo sebukhosi sakhokho wakhe Davide,

³³ uyawuba yiNkhosi yetitukulwane taJakobe nini nanini; umbuso wakhe ungeke ube nesiphetfo.”

³⁴ Mariya wase utsi engilosini: “Kepha loko kungenteka kanjani ngingakahlangani nendvodza?”

³⁵ Ingilosi yamphendvula yatsi: “Moya Longcwele uyakwehlela kuwe, emandla aNkulunkulu Losetikwako Konkhe akusibekele. Ngako-ke lomntfwana Longcwele lotawutalwa nguwe uyawubitwa ngekutsi yiNdvodzana yaNkulunkulu.

³⁶ Khumbula sihlobo sakho Elizabethe, lebekutsiwa angeke abe nemntfwana, kepha nyalo sewunetinyanga letisitfupha atetfwele, lite asamdzala kangaka.

³⁷ Nkulunkulu akehlulwa lutfo.”

³⁸ Mariya wase utsi: “Ngiyincekukati yeNkhosi; akwenteke kimi loko, njengobe sewushito.” Yase iyamshiya ingilosi.

Mariya uvakashela Elizabethe

³⁹ Kulawo malanga Mariya watilungiselela ngekushesha waya emtini loseJudiya, eveni letintsaba,

⁴⁰ wafike wangena kaZakhariya, wabingelela Elizabethe.

⁴¹ Kwatsi lapho Elizabethe nakeva kubingelela kwaMariya, umntfwana wagcuma esiswini sakhe. Elizabethe wagcwaliswa ngaMoya Longcwele,

⁴² wakhuluma kakhulu watsi: “Ubusisiwe kubo bonkhe labasikati, nentalo yesisu sakho ibusisiwe!

⁴³ Yini ngibe nenhlanhla kutsi ngivakashelwe ngunina weNkhosi yami?

⁴⁴ Ngesikhatsi ngiva ungibingelela, umntfwana lengimetfwele udzimate wagcuma entiwa yintfokoto.

⁴⁵ Maye! Ubusisiwe lowo lokholwe kutsi tiyawugcwaliseka letintfo letakhulunywa kuye yiNkhosi!”

Ingoma yaMariya yekudvumisa

⁴⁶ Mariya watsi: “Umphefumulo wami uyayidvumisa iNkhosi,

⁴⁷ umoya wami uyatfokota ngaNkulunkulu, uMsindzisi wami,

⁴⁸ ngobe ungikhumbulile, mine ncekukati yakhe leyedzelelekile. Kusukela lamuhla tonkhe titukulwane tiyawungibita titsi ngibusisekile,

⁴⁹ ngobe Somandla ungentele tintfo letinkhulu. Libito lakhe lingcwele.

⁵⁰ Ubonakalisa sihawu sakhe kubo bonkhe labamesabako, kusukela esitukulwaneni, kuya esitukulwaneni.

⁵¹ Welulile sandla sakhe lesinemandla, wasakata labatigcabhako etinhlitiyweni tabo.

⁵² Wehlisa emakhosi lanemandla etihlalweni tawo, waphakamisa labedzelelekile.

⁵³ Wesutsisa labalambile ngalokumnandzi, wacosha labanjingile bahamba bate lutfo.

⁵⁴ Usite inceku yakhe Israyeli ngekukhumbula umusa wakhe,

⁵⁵ njengobe akhuluma kubokhokho betfu, ku-Abrahama, nakuto tonkhe titukulwane takhe, kuze kube ngunini nanini!”

⁵⁶ Mariya wahlala na-Elizabethe tinyanga letatingacishe tibe tintsatfu, wase ubuyela ekhaya.

Kutalwa kwaJohane uMbhabhatisi

⁵⁷ Sefika sikhatsi sa-Elizabethe sekubeleka, wabeleka umfana.

⁵⁸ Bomakhelwane netihlobo takhe beva kutsi iNkhosi imbusise kanganani, bajabula kanye naye.

⁵⁹ Ngelilanga lesiphohlongo umntfwana atelwe beta ekusokweni kwakhe; base batawumetsa ngelibito leyise lelalinguZakhariya,

⁶⁰ kodvwa unina watsi: “Cha! Libito lakhe kutakuba nguJohane.”

⁶¹ Batsi kuye: “Ingani kute ngisho nasinye sihlobo senu lesinalelibito.”

⁶² Base bakhuluma neyise ngetandla, babuta kutsi yena ufuna lomfana etsiwe ngaliphi libito.

⁶³ Zakhariya wacela kwekubhala, wabhala watsi: “Libito lakhe nguJohane.” Bonkhe bantfu bamangala.

⁶⁴ Ngasona leso sikhatsi lulwimi lwaZakhariya lwatfukululeka, wakhuluma, wadvumisa Nkulunkulu.

⁶⁵ Bonkhe bomakhelwane befikelwa kwesaba lokukhulu, yandza indzaba ngaloko lokwakwentekile kulo lonkhe live letintsaba laseJudiya.

⁶⁶ Bonkhe labayiva bacabanga ngayo batibuta batsi: “Ingabe lomntfwana utawuba yini?” Ngobe kwavele kwakhanya kutsi emandla eNkhosi abekuye.

Siphrofetho saZakhariya

⁶⁷ Uyise Zakhariya wagcwaliswa ngaMoya Longcwele, wase uyaphrofetha utsi:

⁶⁸ “Ayidvunyiswe iNkhosi, Nkulunkulu wema-Israyeli, ngobe ibahambele bantfu bayo, yabakhulula.

⁶⁹ Usivusele uMsindzisi lonemandla, lositukulwane senceku yakhe Davide.

⁷⁰ Ngiko loku lakusho ngemlomo webaphrofethi labangcwele basendvulo.

⁷¹ Wasetsembisa kusisindzisa etitseni tetfu, nasemandleni abo bonkhe labasitondzako.

⁷² Watsi utawubonakalisa sihawu kubokhokho betfu, akhumbule sivumelwane sakhe lesingcwele,

⁷³ wenta sifungo kukhokho wetfu Abrahama, watsi utawusenta

⁷⁴ kutsi, nase sikhululiwe esandleni setitsa tetfu, simkhonte ngaphandle kwekwesaba,

⁷⁵ sibe ngcwele, silunge kuye ngawo onkhe emalanga ekuphila kwetfu.

⁷⁶ Nawe-ke, mntfwana, uyawubitwa ngekutsi ungumphrofethi waNkulunkulu Losetikwako Konkhe; uyakwendvulela iNkhosi kulungisa tindlela tayo,

⁷⁷ nekutjela bantfu bayo kutsi bayawusindziswa ngekutsetselelwa kwetono tabo,

⁷⁸ ngenca yesihawu setibilini saNkulunkulu kitsi, ngaloko-ke kukhanya kuyawusa kitsi kuvela ngetulu

⁷⁹ kuletse kukhanya kulabo labasebumnyameni nasetfuntini lekufa, acondzise tinyawo tetfu endleleni yekuthula.”

⁸⁰ Umntfwana wakhula waba nemandla emoyeni; wahlala ehlane, kwaze kwaba lilanga lavela ngalo ebaleni kubantfu baka-Israyeli.